ဘဏ်အကောင့်တွေ အပိတ်ခံရတာ ရှိနေဦးမှာ လို့ ထိုင်းဗဟိုဘဏ်ပြော

စက်တင်ဘာ – ၁၈ ၊၂၀၂၅

ထိုင်းမှာ ဘဏ်အကောင့်တွေ အပိတ်ခံနေရတဲ့ ကိစ္စက နောက်ထပ်လည်း ကြုံနေဦးမှာလို့ ထိုင်းဗဟိုဘဏ်က အတည်ပြု ပြောကြားခဲ့ပါတယ်။

ထိုင်းမှာ ဆိုက်ဘာ ရာဇဝတ်မှုနဲ့ အွန်လိုင်း ငွေလိမ်ဂိုဏ်းတွေနဲ့ ဆက်စပ်တယ်လို့ ယူဆရတဲ့ ငွေအလွှဲအပြောင်းမျိုး ရှိနေတဲ့ ဘဏ်အကောင့်တွေကို ဗဟိုဘဏ် ညွှန်ကြားချက်နဲ့ ပိတ်နေတာကြောင့် ဘဏ်စနစ် သုံးစွဲသူတွေကြား အတော်လေး ဂယက်ထနေပါတယ်။

အစောပိုင်းက အဲဒီ ပိတ်ပင်မှုတွေဟာ နိုင်ငံခြားသား အကောင့်ပိုင်ရှင်တွေကိုသာ သက်ရောက်ခဲ့ရာကနေ အခုတော့ ထိုင်းနိုင်ငံသားတွေပါ ကြုံတွေ့ ခံစားနေရပါတယ်။

Public Service Announcement

ထိုင်းနိုင်ငံရဲ့ ဗဟိုဘဏ်ဖြစ်တဲ့ ထိုင်းဘဏ်ကတော့ အပိတ်ခံရတဲ့ အကောင့်ပိုင်ရှင်တွေ အနေနဲ့ စိတ်မပူဖို့ နှစ်သိမ့်ထားပြီး ရာဇဝတ်မှုတွေနဲ့ ဆက်စပ်မှု မရှိကြောင်း စစ်ဆေး အတည်ပြုပြီးတာနဲ့ အကောင့်တွေကို ပြန်ဖွင့်ပေးမယ်လို့ ကြေညာထားပါတယ်။

အဲဒီလို စိစစ်တဲ့ လုပ်ငန်းကိုလည်း အမြန်ပြီးမြောက်အောင် ဆောင်ရွက်ပေးနေတယ်လို့ ဗဟိုဘဏ်က ပြောပါတယ်။

ဒါပေမဲ့ အဲဒီပြဿနာဟာ ထိုင်းလူထုကြားမှာ အတော်လေး လူပြောများနေပြီး စိတ်ပျက်လက်ပျက် ဝေဖန်မှုတွေလည်း ရှိနေပါတယ်။

ဒီအခြေအနေကို နားလည် သဘောပေါက်ပေမယ့်လည်း ထပ်ပြီး အကောင့်တွေ ပိတ်ပင်ခံရတာတွေ ကြားနေ၊ မြင်နေရလိမ့်ဦးမယ်လို့ ဗဟိုဘဏ်က စက်တင်ဘာ ၁၈ ရက်နေ့မှာ သတိပေးခဲ့ပါတယ်။

အဲဒီလုပ်ရပ်ဟာ လူကြိုက်မများပေမယ့်လည်း လိမ်လည်မှုတွေ ခံရပြီး ဆုံးရှုံးနစ်နာခဲ့တဲ့ ပြည်သူတွေရဲ့ ငွေကြေးတွေကို ရနိုင်သမျှ ပြန်ယူပေးဖို့ မဖြစ်မနေ လုပ်ရမယ့်ကိစ္စလို့ ဗဟိုဘဏ်က ပြောပါတယ်။

ထိုင်းရဲ့ အွန်လိုင်း လိမ်လည်မှု တိုက်ဖျက်ရေး စင်တာ (AOC)ဟာ ငွေလိမ်ဂိုဏ်းတွေနဲ့ ဆက်နွှယ်တယ်လို့ ယုံကြည်ယူဆတဲ့ ဘဏ်အကောင့်တွေ အမြောက်အမြားကို ပိတ်ချထားခဲ့ပြီး ဖြစ်တယ်လို့ ဗဟိုဘဏ်ရဲ့ သုံးစွဲသူ ကာကွယ်ရေးဌာန ဒုတိယ အကြီးအကဲ ဒါရန်နီ ဆယ်ဂျူက ပြောကြားခဲ့ပါတယ်။

ဒါပေမဲ့ ရာဇဝတ် လုပ်ရပ်တွေနဲ့ ဆက်စပ်မှုရှိတဲ့ အကောင့်တွေနဲ့ ငွေအလွှဲအပြောင်း လုပ်ထားတဲ့ ဘဏ်စာရင်းတွေကိုပဲ ပိတ်တာပါလို့ သူက ဆိုပါတယ်။

တစ်ချိန်တည်းမှာပဲ ဘဏ်အကောင့်တွေ ပိတ်ခြင်း၊ ပြန်ဖွင့်ခြင်းနဲ့ ပတ်သက်တဲ့ လက်ရှိ လုပ်ငန်းစဉ်တွေမှာ သုံးစွဲသူတွေ ကြုံရတဲ့ ပြဿနာတွေကို လျှော့ချနိုင်ရေး နည်းလမ်းတွေအတွက် ဗဟိုဘဏ်ဟာ AOCရော၊ ပုဂ္ဂလိက ဘဏ်တွေနဲ့ပါ ဆွေးနွေးမှုတွေ ဆက်တိုက် လုပ်နေတယ်လို့လည်း သိရပါတယ်။

အခုသီတင်းပတ်ကုန်မှာ နောက်ထပ် ဆွေးနွေးမှုတွေ ထပ်လုပ်ပြီးရင် အပြောင်းအလဲတွေကို ချက်ချင်း ကြေညာသွားမယ်လို့လည်း ဒါရန်နီက ဆိုပါတယ်။

ဘဏ်အကောင့်တွေကို စုံစမ်းစစ်ဆေးမှု ကာလအတွင်း ယာယီ ပိတ်ထားတာ ဖြစ်ရင်တောင်မှ သုံးစွဲသူတွေအတွက် သက်ရောက် ထိခိုက်မှုတွေ ရှိစေတယ် ဆိုတာကို သဘောပေါက်တယ်လို့လည်း ဒါရန်နီက ဆက်ပြောပါတယ်။

သူက ဘဏ်အကောင့် အပိတ်ခံရသူတွေဟာ ထိုင်းမှာ ကြေညာထားတဲ့ hotlineတွေဆီအမြန်ဆုံးဖုန်းခေါ်ပြီး စိစစ်မှုတွေ မြန်မြန်ပြီးမြောက်အောင် ခံယူနိုင်ကြောင်း၊ သက်ဆိုင်ရာ စုံစမ်းရေး အေဂျင်စီတွေကလည်း စိစစ်မှု အဆင့်တွေကို အမြန်ဆုံး ပြီးစီးအောင် အရှိန်မြှင့် ဆောင်ရွက်ပေးမှာဖြစ်ကြောင်း ကတိပေးသွားပါတယ်။

ကိုးကား – Bangkok Post