ဇီးကုန်းမြို့နယ်တိုက်ပွဲစစ်သား၈ဦးသေ၊ လက်နက်အချို့သိမ်းရဟုဗျူဟာ၂၂ ထုတ်ပြန်

မတ်-၂၃၊၂၀၂၆။ထားမြတ်/People’s Spring

ပဲခူးတိုင်းအနောက်ခြမ်း၊ဇီးကုန်းမြို့နယ်မှာပြည်သူ့ကာကွယ်ရေးတပ်မတော်(PDF) ပူးပေါင်းတပ်နဲ့ စအာဏာသိမ်းစစ်တပ်တို့ တိုက်ပွဲဖြစ်ပွားခဲ့ပြီး စစ်သား ၈ ဦးသေဆုံးကာ လက်နက်အချို့ သိမ်းရခဲ့ကြောင်း PDF ဗျူဟာ ၂၂ က သတင်းထုတ်ပြန်ပါတယ်။

မတ်လ ၂၂ရက် မနက်က ပဲခူးတိုင်းအနောက်ခြမ်း၊ သာယာဝတီခရိုင်၊ ဇီးကုန်းမြို့နယ်မှ ဆိုင်ကယ်​တွေနဲ့ စစ်ကြောင်းထွက်လာတဲ့ စစ်သား​တွေကို ကြားဖြတ်တိုက်ခိုက်ခဲ့သလိုစစ်ကူလာတဲ့ ယာဉ်တွေကိုလည်း တိုက်ခိုက်ခဲ့တာလို့ ​ဖော်ပြပါတယ်။

စစ်တပ်ကဆိုင်ကယ် ၁၂ စီးနဲ့ စစ်ကြောင်းထိုးလာတာကို ဇီးကုန်းမြို့နယ် ဘဲအင်းလမ်းဆုံမှာ PDF​တွေက ကြားဖြတ်တိုက်ခိုက်ခဲ့သလို တိုက်ပွဲဖြစ်နေစဥ်အတွင်း စစ်ကူလာတဲ့ ကား ၃ စီးကိုလည်း ဇီးကုန်းမြို့ တစ်မိုင်ခန့်အကွာမှာ ကြားဖြတ်တိုက်ခိုက်ခဲ့တာလို့အသိပေးပါတယ်။

Public Service Announcement

တိုက်ပွဲတွေအတွင်း စစ်ကောင်စီတပ်သား ၈ ဦး သေဆုံးပြီး ၉ ဦး ဒဏ်ရာရရှိခဲ့သလို လက်နက်ခဲယမ်းတွေနဲ့ စစ်အသုံးအဆောင်တွေ သိမ်းပိုက်ရရှိခဲ့တယ်လို့ ထုတ်ပြန်ပါတယ်။ စစ်ဆင်ရေးအတွင်း PDF ရဲဘော်တွေ အထိအခိုက်မရှိဟု အသိပေးပါတယ်။

ဗျူဟာ ၂၂ က ထုတ်ပြန်တဲ့ မှတ်တမ်း ဓာတ်ပုံတွေမှာလက်နက် ၅လက်နဲ့ ကျည်တွေ သိမ်းရခဲ့တာ တွေ့ရပါတယ်။

ဇီးကုန်းမြို့နယ် တိုက်ပွဲ အခြေအနေ အပါအဝင် ဒေသတွင်း စစ်ရေး အခြေအနေတွေ မေးမြန်းဖို့ ဗျူဟာ ၂၂ တာဝန်ရှိသူထံ People’s Spring က ဆက်သွယ်ထားဆဲဖြစ်ပြီးအဆက်အသွယ်မရသေးပါဘူး။

ဇီးကုန်းမြို့နယ်စစ်ဆင်ရေးကိုအမှတ်(၂) စစ်ဆင်ရေးနယ်မြေ၊ပဲခူးတိုင်းစစ်ဌာန၊ဗျူဟာ (၂၂) ကွပ်ကဲမှူအောက်ရှိ ၊ သာယာဝတီခရိုင် ၃၈၀၂ တပ်ရင်း တပ်ခွဲ (၄) UGF Okpo နဲ့ တပ်ခွဲ (၅) BTZM တို့ တိုက်ခိုက်ခဲ့လို့​ဖော်ပြထားပါတယ်။

PDF ဗျူဟာ ၂၂ အပါအဝင် ပဲခူးတိုင်းစစ်ဌာန လက်အောက်ခံ တပ်ရင်းတပ်ဖွဲ့တွေအနေနဲ့ ၂၀၂၅ နှစ်ကုန်ပိုင်းနဲ့ အခု နှစ်ဆန်းပိုင်းမှာ စစ်ကောင်စီ တပ် အထိနာတဲ့ စစ်ဆင်ရေးတွေ မကြာခဏဖော်ဆောင်ခဲ့သလို စစ်ရေးအရှိန် ပိုမိုတိုးမြှင့်ဆောင်ရွက်ဖို့ရှိလို ပြည်သူတွေ သတိနဲ့ နေထိုင်သွားလာဖို့ အသိပေးထားပါတယ်။