မတ်-၁၉၊၂၀၂၆။အိမ်သွင်/People’s Spring
ကျွန်းလှမြို့နယ်၊ သဖန်းဆိပ်ဆည်ထဲက ဒေသခံတွေတူးဖော်နေတဲ့ တပိုင်တမိုင်ရွှေမျှောတွေကို အာဏာသိမ်းစစ်တပ်က လေကြောင်းကနေဗုံးကြဲတာကြောင့် ဒေသခံပြည်သူ ၁၃ဦးထက်မနည်းသေဆုံးပြီး ဒဏ်ရာအပြင်းအထန်ရသူတွေနဲ့ ပျောက်ဆုံးနေသူတွေလည်းရှိတယ်လို့သတင်းရရှိပါတယ်။
သဖန်းဆိပ်ဆည်ထဲကရွှေမျောတွေကို မတ်လ ၁၅ ရက် ညနေ ၃ နာရီခန့်မှာ စစ်တပ်ကဂျက်ဖိုက်တာ ၂ စီးနဲ့ဗုံးကြဲပြီး ၊ လက်နက်ကြီးတွေနဲ့ပါပစ်ခတ်သွားတာလို့ ဒေသခံတစ်ဦးကပြောပါတယ်။
“ လေကြောင်းသတင်းရရုံပဲရှိသေးတယ် ပစ်တာ။ သူတို့ပြစ်တဲ့နေရာကတပိုင်တနိုင် ရွှေရှာတဲ့နေရာတွေ။ စစ်တပ်သတင်းပေးတွေက အမှားတွေပြောတာကို အမှန်ထင်ပြီး ကြဲသွားတာ” လို့ ဒေသခံတဦးကပြောပါတယ်။ စစ်တပ်ဝါဒဖြန့် တယ်လီဂရန်ချန်နယ်နဲ့ အကောင့်တွေက ကျွန်းလှမြို့နယ်ထဲကရွှေမျောတွေကနေ PDF တွေအခွန်ငွေတွေရတယ်ဆိုပြီး ဗုံးကြဲဖို့ ဆက်တိုက်လှုံ့ဆော်တာကိုသူကရည်ညွှန်းပြောကြားတာဖြစ်ပါတယ်။
Public Service Announcement
စစ်တပ်က ကျွန်းလှမြို့နယ်၊သဖန်းဆိပ်ဆည်ထဲကတပိုင်တနိုင်ရွှေမျောတွေကိုဗုံးကြဲပြီးနောက်မီးလောင်ကျွမ်းပျက်စီးနေစဥ်။ဓါတ်ပုံ-Infinity Group 
စစ်တပ်က ကျွန်းလှမြို့နယ်၊သဖန်းဆိပ်ဆည်ထဲကတပိုင်တနိုင်ရွှေမျောတွေကိုဗုံးကြဲပြီးနောက်မီးလောင်ကျွမ်းပျက်စီးနေစဥ်။ဓါတ်ပုံ-Infinity Group 
စစ်တပ်က ကျွန်းလှမြို့နယ်၊သဖန်းဆိပ်ဆည်ထဲကတပိုင်တနိုင်ရွှေမျောတွေကိုဗုံးကြဲပြီးနောက်မီးလောင်ကျွမ်းပျက်စီးနေစဥ်။ဓါတ်ပုံ-Infinity Group 
စစ်တပ်က ကျွန်းလှမြို့နယ်၊သဖန်းဆိပ်ဆည်ထဲကတပိုင်တနိုင်ရွှေမျောတွေကိုဗုံးကြဲပြီးနောက်မီးလောင်ကျွမ်းပျက်စီးနေစဥ်။ဓါတ်ပုံ-Infinity Group
အဲဒီတိုက်ခိုက်မှုအတွင်း မတ်လ ၁၅ရက်ညနေအထိပြည်သူ ၃ဦးသေဆုံးပြီး ၃၀ ခန့်ဒဏ်ရာရခဲ့ကာ မတ်လ ၁၆ရက်မှာတော့ သေဆုံးသူဦးရေထပ်တိုးလာတာလို့ သိရပါတယ်။
“ ဗုံးကြဲပြီး ရော့ကတ်ပါပစ်တော့ဘယ်ခံနိုင်မလဲဗျာ။ ဒဏ်ရာတွေပြင်းပြင်းထန်ထန်ရထားတာ။ ထပ်ပြီးသေဆုံးတာက ၁၀ ဦး။ ဒါတောင် ရုပ်အလောင်း ပျောက်နေသူတွေလည်းရှိတယ်။ ဆေးကုဖို့ရောစာရင်းလုပ်ဖို့ရောမလွယ်ဘူး” လို့ ကျွန်းလှမြို့ခံတဦးက People’s Spring ကိုပြောပါတယ်။
သေဆုံးသူနဲ့ ဒဏ်ရာရတွေဟာ အမျိုးသားအများစုဖြစ်ပြီး အမျိုးသမီးအချို့လည်းပါဝင်တယ်လို့ ပြောပါတယ်။
စစ်တပ်က အဆိုပါလေကြောင်းတိုက်ခိုက်မှုကိုဟုမ္မလင်းလေတပ်ကိုအသုံးပြုပြီးတိုက်ခိုက်ခဲ့တာဖြစ်ပါတယ်။ မတ်လ ၁၅ရက်နောက်ပိုင်းမှာလည်း မတ်လ ၁၉ရက်မနက်ပိုင်းအထိ ကျွန်းလှနဲ့တန့်ဆည်မြို့နယ်ထဲကို ဟုမ္မလင်း လေတပ်တက် ဂျက်ဖိုက်တာတွေနဲ့ ၄ကြိမ်ဗုံးထပ်မံကြဲခဲ့တယ်လို့ ဒေသခံတွေကပြောပါတယ်။
ကျွန်းလှနဲ့ တန့်ဆည်အပါအဝင် စစ်ကိုင်းတိုင်းထဲက မော်လူး၊ဗန်းမောက်၊အင်းတော်၊ဝန်းသို၊ကောလင်း၊ပင်လည်ဘူး၊ဖောင်းပြင်၊မော်လိုက်၊ ခမ်းပါတ်နဲ့တမူးမြို့နယ်တွေကို ဗုံးကြဲဖို့အတွက် စစ်တပ်က ဟုမ္မလင်းလေတပ်ကိုအများဆုံးအသုံးပြုနေတာဖြစ်ပါတယ်။
ကချင်ပြည်နယ်နဲ့စစ်ကိုင်းတိုင်းအတွင်း မြို့တွေကို စစ်ကောင်စီတပ်က လေကြောင်းကနေတိုက်ခိုက်ရာမှာ ဟုမ္မလင်းလေတပ်ကို အဓိကအသုံးပြုနေတဲ့အတွက် လေကြောင်း အန္တရာယ်ကိုအထူးဂရုပြုကြဖို့ ကချင်လွတ်လပ်ရေးတပ်မတော်(KIA)က သတိပေးထားပါတယ်။
“ ဟုမ္မလင်းလေတပ်ကနေတက်လာတာတွေက သတိပေးချိန်နည်းပါတယ်။ဒါကြောင့် ပြည်သူတွေအနေနဲ့က ဝေဟင်သတင်းတွေ ပိုပြီးနားစွင့်နေဖို့ ပြောလိုပါတယ်” လို့ KIA ပြန်ကြားရေးတာဝန်ခံ ဗိုလ်မှူးကြီးနော်ဘူက People’s Spring ကိုပြောပါတယ်။
