မတ်-၂၂၊၂၀၂၆။ဇော်ရမ်း/People’s Spring
စစ်တပ်ရဲ့ တြိဂံဒေသတိုင်းစစ်ဌာနချုပ်ရှိတဲ့ ရှမ်းပြည်နယ်အရှေ့ပိုင်း၊ကျိုင်းတုံမြို့မှာလူသတ်ဓားပြတိုက်မှုဖြစ်ခဲ့ပြီးတရားခံတွေလွတ်မြောက်နေပါတယ်။
မတ်လ ၂၁ ရက် ညနေက ကျိုင်းတုံမြို့၊ ရပ်ကွက် (၄) နောင်ခမ်းမီးပွိုင့်အနီးမှာရှိတဲ့ နေအိမ်တစ်အိမ်ကို လူငါးဦးက ကားနဲ့လာပြီး ဓားပြတိုက်တာဖြစ်ပါတယ်။
“ သေနတ်မောင်းတင်ပြီးဝင်လာတာ။အိမ်ရှင်ကို ပစ်သတ်သွားတယ်။ ပြီးတော့ ကားမောင်းပြေးတယ်။ လွယ်လွယ်လေးလုပ်သွားတာ” လို့မြို့ခံတစ်ဦးက ပြောပါတယ်။
Public Service Announcement
ကျိုင်းတုံမြို့မှာ တြိဂံဒေသတိုင်းစစ်ဌာနချုပ်ရှိပြီး စစ်ကောင်စီတပ်အဓိက အခြေစိုက်ထားပါတယ်။ ခရိုင်မြို့လည်းဖြစ်ပြီး စစ်ကောင်စီက လုံခြုံရေး တင်းကျပ်ထားတာပါ။ အခု ဓားပြတိုက်သွားတဲ့ဖြစ်စဉ်မှာ စစ်ကောင်စီတပ်နဲ့ ဆက်စပ်သူတွေပါဝင်ပတ်သက်လိမ့်မယ်လို့ မြို့ခံတချို့က သုံးသပ်ပါတယ်။
” ဒီလောက်တောင်ဖြစ်သွားတာကို ဒီနေ့အထိ တရားခံမမိဘူး။ မဖမ်းဘူး။စစ်တပ်အသိုင်းအဝိုင်းလည်း ပါးစပ်ပိတ်နေတယ်” လို့ မြို့ခံတစ်ဦးက ပြောပါတယ်။
စစ်ကောင်စီထိန်းချုပ်ထားတဲ့ လားရှိုးမြို့မှာလည်း လူသတ်ဓားပြတိုက်မှုတွေ မကြာခဏဖြစ်ပွားနေပြီး အချို့အမှုတွေမှာ စစ်ကောင်စီတပ်ဖွဲ့ဝင်တွေ ပါဝင်ပတ်သက်နေတယ်လို့ ဒေသခံတွေကပြောပါတယ်။
