ကချင်ပြည်နယ်နှင့် နာဂ​ဒေသတွင် ရေကြီး၊​ မြေပြိုနေ

​မေ-၃၁၊၂၀၂၅။ကဖေး၊ထားမြတ်/People’s Spring

ဧရာဝတီ နှင့် ချင်းတွင်းမြစ်ဖျားပိုင်းဒေသများမိုးသည်းထန်စွာရက်ဆက်ရွာသွန်းနေ​သော​ကြောင့်ကချင်ပြည်နယ်အထက်ပိုင်းဒေသများ နှင့် နာဂဒေသ၊ ချင်းပြည်နယ်တို့တွင် ရေကြီးမှုနှင့် မြေပြိုမှုဘေးအန္တရာယ်ကြုံတွေ့နေသည်။

ဧရာဝတီမြစ်ဖျားပိုင်းဒေသများဖြစ်သည့်မေခ၊မလိခမြစ်ဆုံရာဒေသများ၊ ပူတာအိုခရိုင်အတွင်းရှိမြို့နယ်များ၊ တရုတ်နိုင်ငံနှင့်ထိစပ်နေသော ပန်ဝါ၊ဆော့လော်မြို့စသည့်​ဒေသများအပါအဝင် ကချင်လွတ်လပ်ရေးတပ်မတော်(KIA)ထိန်းချုပ်ထားသော မြို့နယ်များတွင် မေလ ၂၅ရက်မှ စ၍ မိုးသည်းထန်စွာရွာသွန်းခဲ့ပြီး မေလ ၃၁ရက်ည‌နေအထိ မိုးကောင်းနေသည်။

ကချင်ပြည်နယ်အတွင်းချီဖွေ၊ ဆော့လော်၊ ပန်ဝါမြို့တို့တွင် ရေကြီးပြီး စစ်ဘေးရှောင်စခန်းများနှင့် နေအိမ်ပျက်စီးမှုများရှိနေသည်။ တရုတ်နယ်စပ်ဒေသများ၌ မြေပြိုမှုဘေး ရင်ဆိုင်နေရသည်။

Public Service Announcement

စစ်ရှောင်စခန်းများ အတွက် အရေးပေါ် အကူအညီလိုအပ်လာပြီး မြစ်ကြီးနားမြို့အပါအဝင် ဧရာဝတီမြစ်ကမ်းဘေး​ဒေသများ ရေတက်လာနိုင်ကြောင်း လက်ရှိရေးဘေးကြုံနေသော ဒေသမှ ဒေသခံများကသတိ​ပေးသည်။

●မေခ ၊မလိခမြစ်ရေ ကြီး၍ နေအိမ်နှင့်ကျောင်းအချို့ ရေမျော

မိုး​သည်းထန်စွာရွာသွန်းသဖြင့်မေခ နှင့် မလိခမြစ်ရေများ ဆက်လက်မြင့်တက်လျက်ရှိရာ နေအိမ်အဆောက်အဦးများ နေနစ်မြုပ်နေပြီး နေအိမ်နှင့် စာသင်ကျောင်းအချို့ ရေထဲမျောပါသွားဟု ​ဒေသခံအချို့ထံမှသိရသည်။

မေခမြစ်ရေကြီး၍ ချီဖွေမြို့နယ်တွင် နေအိမ် အဆောက်အဦးများစွာ ရေနစ်မြှုပ်နေသည်ကို ဒေသခံအချို့က လူမှုကွန်ရက်တွင် ရုပ်သံ​တင်ထားသည်ကိုတွေ့ရသည်။

“အဖြစ်က မနှစ်ကနဲ့မတူတော့ဘူးကွာ ဒီနှစ်က ပိုဆိုးသွားပြီ။ ပိုဆိုးမှာပဲလေ နော့။ ရာသီဥတု အခြေအနေရော ရေလမ်းကြောင်းပြောင်းတာရော အဲဒီမှာလုပ်လိုက်တဲ့ဥစ္စာတွေရော” ဟု ဒေသခံ အမျိုးသား တဦးက ရေနစ်မြှုပ်နေသည့် နေအိမ်အဆောက်အဦများကို ရုပ်သံရိုက်ကူး ပြောကြားခဲ့သည်။

အခြားကချင်​ဒေသခံတဦးက “ အသေအပျောက်တော့ မကြားရသေး။ ရေက ဆက်လက်မြင့်တက်နေဆဲ။ ဒါက မချမ်းဘော ။ စိုးရိမ်ရေမှတ်ကျော်ပြီး။ မလိခမြစ်ပါ။” ဟု ပြောသည်။

မေခနှင့် မလိခမြစ်များရေဆက်တက်နေ၍ ဧရာ၀တီ မြစ်ကြောင်းတလျောက်ရှိ မြို့ရွာများအားလုံး ရေဘေးအန္တရာယ် ကြုံရနိုင်သည်ဟု ၎င်းက ပြောသည်။

မြစ်ကြီးနားနေပြည်သူအချို့ကလည်း ရေဘေးကြောင့် လယ်ကုန်း၊ ကြက်ပေါင်ခြံ၊ မြို့သစ်ကြီး ၊ ရမ်ပူ၊ ကျွန်းပင်သာ၊ ကချင်စု၊ ရွှေညောင်ပင်၊ မန်ခိန်၊ စီတာပူ၊ အေးစေတီ၊ ခေမာသီရိ၊ ဒူကထောင်ရန်ကြီးအောင် ၊ ပမ္မတီး စသည့် ရပ်ကွက်များ ရေဝင်ရောက်နိုင်ကြောင်း ခန့်မှန်းအသိပေးချက်ကို ဖော်ပြထားသည်ကိုတွေ့ရသည်။

●နာဂ ​ဒေသတွင် ​မြေပြို

စစ်ကိုင်းတိုင်း၊ နာဂဒေသ၌လည်းမေလ ၂၄ရက်မှစ၍ မိုးကောင်းနေပြီး နန်းယွန်း၊ လေရှီး၊ ဆွမ္မရာမြို့တို့တွင် မြေပြိုကာ လမ်းပန်းဆက်သွယ်ရေးခက်ခဲနေပြီဟု ဒေသခံများကပြောသည်။

“နာဂနဲ့ အိန္ဒိယဆက်ထားတဲ့ မဏိပူရ်ပြည်နယ်ချင်းဆက်လမ်းမကြီးလည်း ​မြေပြိုမှု​တွေရှိ​နေပါတယ်။ ချက်ခြင်းမပြုပြင်ရင်ကုန်​စျေးနူန်းတွေတက်မှာပါ။ မိုးကမရပ်သေးသေးဘူး။ စိုးရိမ်စရာပါ”ဟုနာဂဒေသခံတစ်ဦးကပြောသည်။

နာဂဒေသ၊ချင်းပြည်နယ်တို့နှင့်ဆက်စပ်နေသော အိန္ဒိယနိုင်ငံဘက်ခြမ်းတွင်လည်းမိုးများပြီးမြေပြိုမှုဘေး ရင်ဆိုင်နေရကြောင်း သတင်းရရှိသည်။

●မိုးသည်းထန်ရခြင်းအ​ကြောင်းအရင်း

ယခုရက်ပိုင်းရွာနေသော မိုးသည် မေလ ၂၉ရက်က ဘင်္ဂလားဒေ့ရှ်ကို ဝင်သွားသော မုန်တိုင်းငယ်က မြန်မာ-အိန္ဒိယနယ်စပ်အနီးအထိ ကုန်းတွင်း လေဖိအားနည်းရပ်ဝန်းအဖြစ်ဖြတ်နေခြင်းကြောင့်ဟု အိန္ဒိယမိုးဇလကထုတ်ပြန်ထားသည်။ကချင်ပြည်နယ်၊ စစ်ကိုင်းတိုင်းအထက်ပိုင်း၊ ချင်းပြည်နယ်၊ ရခိုင်ပြည်နယ်တို့တွင် မေလကုန်ပိုင်းတွင် မိုးရေချိန် ၃ လက်မ ခန့် မှ ၉ လက် မခန့်အထိ ရွာနိုင်ကြောင်း သတိပေးထားသည်။ မိုးရေချိန် ၃လက်မထက် ကျော်ပါက ရေဘေးအန္တရာယ်ရှိနေသည်။

လက်ရှိရေးဘေးနှင့် မြေပြိုမှုဘေးကြောင့် ထိခိုက်မှုများကို အသေးစိတ်မသိရှိရသေးပေ။ မိုးဆက်ကောင်းနေ၍ စိုးရိမ်စရာအခြေအနေဟု ကချင်ပြည်နယ်နှင့် နာဂဒေသမှ ဒေသခံအချို့ကပြောသည်။

မေလ ၂၉ရက်က ကုန်းတွင်းဝင်ခဲ့သော မုန်တိုင်းငယ်အရှိန်ကြောင့် ဘင်္ဂလားပင်လယ်အော်၊ကပ္ပလီပင်လယ်ပြင်နှင့်မုတ္တမကွေ့ တို့တွင် မုတ်သုံလေအားကောင်းရာမှ အားအလွန်ကောင်းနေပြီးချင်းပြည်နယ်၊ကချင်ပြည်နယ်၊ ရခိုင်ပြည်နယ်၊ စစ်ကိုင်းတိုင်းနှင့်မကွေးတိုင်းတို့တွင် လျှပ်တပြက်ရေကြီးခြင်းနှင့်မြေပြိုခြင်းများကို အထူးသတိပြုသင့်ကြောင်း အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)က သတ်ိပေးထားသည်။