မိထက်/People’s Spring
ရှမ်းပြည်နယ်မြောက်ပိုင်းကျောက်မဲမြို့တွင် နှစ်ရက်ဆက်တိုက်ပွဲပြင်းထန်နေကြောင်း သတင်းရရှိသည်။
” မြို့ထဲရော မြို့ပြင်ရော ဖြစ်နေတာ။ မနေ့ကရော ဒီနေ့ရော။ လူသေဆုံးတာလည်း ရှိတယ်”ဟု ဒေသခံတစ်ဦးကပြောသည်။
Public Service Announcement
ယနေ့(ဇူလိုင် ၂၁ရက်နေ့) တစ်နေကုန်နီးပါးမြို့ထဲတွင် တိုက်ပွဲဖြစ်ခဲ့ပြီး ညပိုင်း၌ မြို့မြောက်ဘက် ၂ မိုင်အကွာရှိ စစ်ကောင်စီတပ်အမှတ်၅၀၂ ခြေမြန်တပ်ရင်း( ခမရ ၅၀၂) တွင် တိုက်ပွဲပြင်းထန်နေသည်ဟု မြို့ခံများကပြောသည်။
” စစ်ကောင်စီလေကြောင်းက လာနေတယ်။ ကုတင်အောက်မှာ အိပ်နေရတယ်” ဟု ဒေသခံတစ်ဦးကပြောသည်။
ဇွန် ၂၁ ရက် နေ့လယ် ကလေကြောင်းတိုက်ခိုက်မှု၌ ကျောက်မဲမြို့ နမ့်တုံရပ်မှ အိမ်တစ်လုံးပေါ် ကျရောက်ပေါက်ကွဲခဲ့ပြီး အမျိုးသမီးတစ်ဦးသေဆုံးခဲ့ကြောင်းသတင်းရရှိသည်။
ကျောက်မဲမြို့တွင် ဇွန်လ ၂၅ရက်မှစ၍ တိုက်ပွဲများဆက်တိုက်ဖြစ်ပွားနေပြီးဒေသခံအများစုသည် မန္တလေးမြို့အပြင် အနီးနားကျေးရွာများသို့ သွားရောက်တိမ်းရှောင်ခဲ့ကြသည်။ မြို့ထဲတွင်ပိတ်မိနေသူများလည်းရှိသည်။
“အိမ်ဘေးနားမှာတိုက်ပွဲဖြစ်နေလည်းအိမ်ထဲဝပ်နေရင်ရတယ်။အခုကလေကြောင်းရန်ကိုပဲကြောက်နေရတာ။ အိပ်လို့တောင်မရဘူး”ဟုမြို့ခံတစ်ဦးကပြောသည်။
ကျောက်မဲမြို့ပေါ်ရှိစစ်ကောင်စီစခန်းများ နှင့် ဌာနဆိုင်ရာရုံးများအားလုံးကို TNLA ပူးပေါင်းတပ်က တိုက်ခိုက်သိမ်းယူထားသည်။ မြို့မြောက်ဘက် ၂ မိုင်အကွာရှိ ခမရ(၅၀၁) ၊ ခမရ (၅၀၂)တပ်စခန်းနှစ်ခု ကျန်ရှိနေသေးသည်။ ယခင်ရက်များက မြို့ထဲ၌တိုက်ပွဲဖြစ်ပွားခြင်းမရှိခဲ့ဘဲ ဇူလိုင် ၂၀ ၊ ၂၁ ရက်တိုက်ပွဲများတွင် မြို့တွင်း၌ ပါ တိုက်ပွဲပြင်းထန်နေခြင်းဖြစ်ကြောင်းဒေသခံများကပြောသည်။
