ဖေဖော်ဝါရီ-၂၈၊ ၂၀၂၆ ဇေအောင်/People’s Spring
ပုဂံ၊ညောင်ဦး-ကျောက်ပန်းတောင်းလမ်းပိုင်းမှာ စစ်ကောင်စီလှည့်ကင်းကား ကြားဖြတ် တိုက်ခိုက်ခဲ့ရာ ၄ဦးသေဆုံးပြီး လက်နက်ခဲယမ်းတွေ သိမ်းဆည်းရမိကြောင်း ပခုက္ကူမြို့နယ် ပြည်သူ့ကာကွယ်ရေးအဖွဲ့ (ပကဖ)က ထုတ်ပြန်ပါတယ်။
ဒီနေ့ ဖေဖော်ဝါရီ ၂၈ရက် မနက် ၇နာရီခွဲဝန်းကျင်မှာ ပုဂံ၊ညောင်ဦးမြို့အခြေစိုက် ခလရ (၄၁၅)တပ်ရင်းက ထွက်လာတဲ့ စစ်ကောင်စီတပ်သားတွေပါတဲ့ ပတ်ကင်းကားတစ်စီးကို ဝါးခင်းကြီးချောင်းအနားအရောက်မှာ တော်လှန်ရေးရဲဘော်တွေက ပြောက်ကျားစနစ်နဲ့ စောင့်ကြိုတိုက်ခိုက်ခဲ့တာဖြစ်ကြောင်း ပခုက္ကူမြို့နယ် ပြည်သူ့ကာကွယ်ရေးအဖွဲ့ (ပကဖ)ရဲ့ သတင်းနဲ့ပြန်ကြားရေး တာဝန်ခံ ရဲဘော်မှိုင်းက ပြောပါတယ်။
မိနစ် ၂၀ခန့်ကြာ အပြန်အလှန်ပစ်ခတ်မှုဖြစ်ပွားခဲ့ပြီး စစ်ကောင်စီတပ်က ၄ဦး နေရာမှာတင် ပွဲချင်းပြီး သေဆုံးသွားခဲ့တယ်လို့ ပခုက္ကူပကဖက အသိပေးပါတယ်။
Public Service Announcement
“ ၅ဦးပါတာ။ ၄ ဦး သေဆုံးတယ်။ တစ်ကောင်က ထွက်ပြေးလွတ်မြောက်သွားတယ်။” လို့ ပခုက္ကူပကဖ သတင်းနဲ့ပြန်ကြားရေးတာဝန်ခံ ရဲဘော်မှိုင်းက ပြောပါတယ်။
ဒါ့အပြင် MA-3 သေနတ် ၂လက်၊ ကာဘိုင် ၂ လက်နဲ့ ကျည်ဆန်အများအပြားကို တော်လှန်ရေးတပ်ဖွဲ့တွေက သိမ်းဆည်းနိုင်ခဲ့ပါတယ်။
အဲဒီစစ်ဆင်ရေးကို ရဲဘော်ဒီးနဲ့ ရဲဘော်ပုဂံကြီးတို့ ဦးဆောင်တဲ့ တပ်စိပ် နှစ်စိပ်နဲ့ Pakokku Special Task Force (ပခုက္ကူမြို့နယ် ပကဖ)၊ Bagan Nyaung Oo Special Task Force၊ မကွေးတိုင်း ပကဖ အမှတ် (၄)အထူးလှုပ်ရှားစစ်ကြောင်းတို့ ပူးပေါင်းပြီး လုပ်ဆောင်ခဲ့တာလို့ သိရပါတယ်။
ပြီးခဲ့တဲ့နှစ် နိုဝင်ဘာအတွင်းကလည်း မြင်းခြံ-ညောင်ဦးလမ်းမှာ သီတာယုမွန်ရဲ့တပည့်တွေလိုက်ပါလာတဲ့ကားကို ပခုက္ကူပကဖနဲ့တော်လှန်ရေးအဖွဲ့တွေတိုက်ခိုက်ခဲ့လို့ ၅ ဦးထက်မနည်း သေဆုံးခဲ့ပါသေးတယ်။
(သိမ်းဆည်းရမိခဲ့သောလက်နက်များနှင့် ပစ်ခတ်ခံရသော စစ်တပ်ပတ်ကင်းကားအား တွေ့ရစဥ်။ ဓါတ်ပုံ-ပခုက္ကူပကဖ)
