ဇန်နဝါရီ-၃၊ ၂၀၂၆။ ဟန်နွေ/People’s Spring
ကရင်အမျိုးသားအစည်းအရုံး(KNU) မြိတ်ထားဝယ်ခရိုင်ကရင်အမျိုး သားလွတ်မြောက်ရေးတပ်မတော်(KNLA) တပ်မဟာ(၄)နယ်မြေမှာ စစ်ကောင်စီ ရဲ့ ရွေးကောက်ပွဲ ဆန့်ကျင်တဲ့ ဆန္ဒပြပွဲကို ဆက်လက်ပြုလုပ်လျက်ရှိကြောင်း KNU မြိတ်ထားဝယ်ခရိုင်က ထုတ်ပြန်ပါတယ်။
စစ်တပ်ရွေးကောက်ပွဲ ကျင်းပခဲ့တဲ့ ၂၀၂၅ ဒီဇင်ဘာ ၂၈ရက် မတိုင်ခင်ကလည်း KNU မြိတ်ထားဝယ်ခရိုင်အတွင်း နယ်မြေတွေမှာ ကရင်လူငယ်တွေဦးဆောင်တဲ့ စစ်တပ်ရွေးကောက်ပွဲ ဆန္ဒထုတ်ဖော်မှုတွေ လုပ်ဆောင်ခဲ့သလို ၂၀၂၆ ဇန်နဝါရီ လဆန်းမှာလည်း ဆန္ဒပြပွဲ ဆက်ရှိနေကြောင်း အသိပေးထုတ်ပြန်ခဲ့တာပါ။
ဇန်နဝါရီ ၁ရက်က KNU မြိတ်ထားဝယ်ခရိုင် လယ်မူလား(ပုလော)မြို့နယ်မှာ ပြုလုပ်ခဲ့တဲ့ ဒေသခံ ပြည်သူတွေ ရဲ့ စစ်တပ်ရွေးကောက်ပွဲ ဆန္ဒထုတ်ဖော်မှု ရုပ်သံကို မနေ့က ဇန်နဝါရီ ၂ရက် ညပိုင်းမှာ ထုတ်ပြန်ခဲ့ပါတယ်။
Public Service Announcement
ပုလောဒေသခံတွေက စစ်တပ်ရွေးကောက်ပွဲ အလိုမရှိ၊ စစ်အာဏာရှင် အလိုမရှိ၊ အတုအယောင်ရွေးကောက်ပွဲ အလိုမရှိ ဟု ကြွေးကြော်ကာ လမ်းလျှောက် ဆန္ဒထုတ်ဖော်ခဲ့ကြတာပါ။
“ဘာဖြစ်လို ဒီလိုဆက်ပြီးတော့ ဆန္ဒပြရတဲ့ အကြောင်းအရင်းက စစ်အာဏာရှင် လုပ်တဲ့ ရွေးကောက်ပွဲကို လက်မခံလို့ ကျနော်တို့ဆန္ဒဖော်ထုတ်နေတာ။ စစ်အာဏာရှင် သို့မဟုတ် စစ်အစိုးရရဲ့ အုပ်ချုပ်မှုအောက်မှာ ကျနော်တို့က မရှင်သန်ချင်တော့ဘူး။ မနေချင်တော့ဘူး။ ကျနော်တို နေလာတာလည်း နှစ်ပေါင်းများစွာ ရှိပြီလေ။ အဲဒါကြောင့်မို့လို့ ဒါတွေ မခံစားချင်တော့လို့ကျနော်တို့ ဆန္ဒဖော်ထုတ်တာဖြစ်တယ်” KNU မြိတ်ထားဝယ်ခရိုင် ကရင်လူငယ်ခေါင်းဆောင်တဦးက ပြောပါတယ်။
ဒီဇင်ဘာလကုန်ပိုင်းကလည်း တနင်္သာရီမြို့နယ် မောတောင်မြို့၊ ထားဝယ်မြို့နယ် ထီးမိုပွာဒေသ၊ ကစယ်ဒို(သရက်ချောင်း)မြို့နယ် တို့မှာ ကရင်လူငယ်တွေ ဦးဆောင်ပြီး ဒေသခံ ပြည်သူတွေ ဆန္ဒထုတ်ဖော်ခဲ့ကြပါတယ်။
အလားတူ KNU အခြားခရိုင်နဲ့ တပ်မဟာ အသီးသီးမှာလည်း စစ်တပ်ရွေးကောက်ပွဲ ဆန့်ကျင်တဲ့ လှုပ်ရှားမှုတွေကို နည်းမျိုးစုံနဲ့လုပ်ဆောင်ခဲ့ပြီး KNU တပ်မဟာ(၁)သထုံခရိုင် ၊ တပ်မဟာ(၅) ဖာပွန်ခရိုင်တို့မှာလည်း ဒေသခံ ပြည်သူအများအပြား ပါဝင်တဲ့ဆန္ဒပြပွဲတွေ ပြုလုပ်ကာ စစ်တပ်ရွေးကောက်ပွဲ ဆန့်ကျင် ကြောင်း ပြသခဲ့ပါတယ်။
ရုပ်သံ – KNU-MTD
