ဒီဇင်ဘာ -၂၈ ၊၂၀၂၅/People’s Spring
စစ်ကိုင်းတိုင်း၊ ကလေးမြို့မှာ စစ်ကောင်စီရဲ့ ရွေးကောက်ပွဲမဲပေးတဲ့နေ့မှာ အပြင်မထွက်သပိတ်မှာ ပြည်သူတွေပါဝင်ခဲ့လို့ လမ်းမတွေပေါ်မှာ တိတ်ဆိတ်ခြောက်ကပ်နေတယ်လို့ ကလေးမြို့လူထုတိုက်ပွဲဦးဆောင်ကော်မတီက ထုတ်ပြန်ပါတယ်။
စစ်အုပ်စုကရွေးကောက်ပွဲ ကျင်းပရန် ကြေညာထားသော်လည်း ကလေးမြို့ပေါ်ရှိ လူနေရပ်ကွက်တွေအတွင်း မဲပေးသူ မရှိသလောက် နည်းပါးခဲ့တယ်လို့ ဆိုပါတယ်။
ကလေးမြို့မှာ ပုံမှန် တနင်္ဂနွေနေ့များတွင် စည်ကားလေ့ရှိသော်လည်း ယနေ့မှာ မနက်ခင်းဈေးသွားဈေးလာ အချိန်ကစ၍ လမ်းမကြီးများ၊ လူစည်ကားရာနေရာတွေနဲ့ ရွေးကောက်ပွဲကျင်းပဖို့ သတ်မှတ်ထားတဲ့ နေရာတွေမှာ လူသူသွားလာခြင်းမရှိဘဲ တိတ်ဆိတ်ခြောက်ကပ်နေတယ်လို့ ကလေးမြို့လူထုတိုက်ပွဲဦးဆောင်ကော်မတီက ထုတ်ပြန်ပါတယ်။
Public Service Announcement
စစ်အာဏာရှင်အပါအဝင် အာဏာရှင်မှန်သမျှ ကျဆုံးရေးအတွက် (၅) နှစ်တာကာလအတွင်း အထွေထွေဖိနှိပ်မှုများကြားမှ တော်လှန်ရေးရဲ့ တောင်းဆိုမှုအရပ်ရပ်အပေါ် တာဝန်ကျေပွန်ကြောင်း ပြသလျက်ရှိတဲ့ ကလေးမြို့ဒေသခံ ပြည်သူတစ်ရပ်လုံးရဲ့ ပူးပေါင်းပါဝင်မှုအပေါ် အလေးအနက် မှတ်တမ်းတင်အပ်ပါတယ်လို့ထပ်မံဖော်ပြထားပါတယ်။
ကလေးဒေသအခြေပြု တော်လှန်ရေးအဖွဲ့အစည်းအသီးသီးအနေနဲ့ ဒေသခံပြည်သူတစ်ရပ်လုံးရဲ့ အမြင့်မားဆုံးသော ပူးပေါင်းပါဝင်မှုကို အားပြုကာ၊ ညီညွတ်ခြင်းရဲ့ တပ်ဦးအလံကို အမြင့်ဆုံးလွင့်ထူလျက် ဘုံရန်သူစစ်အုပ်စု အမြစ်ပြတ်ကျဆုံးရေး အားသွန်ခွန်စိုက် တိုက်ပွဲဝင်ကြဖို့ တိုက်တွန်းထားပါတယ်။
