အောက်တိုဘာ-၂၂၊ ၂၀၂၅။ ထားမြတ်/People’s Spring
ရှမ်းပြည်နယ်မြောက်ပိုင်း၊ ကျောက်မဲမြို့နယ် မိုင်းလုံမြို့ကို အာဏာသိမ်းစစ်ကောင်စီတပ်က ဒီကနေ့ (အောက်တိုဘာ ၂၂ရက်) မနက်အစောမှာ လေကြောင်းကနေ ဗုံးကြဲတိုက်ခိုက်ခဲ့လို့ ကလေးငယ် တစ်ဦးနဲ့ အမျိုးသမီး တစ်ဦး ဒဏ်ရာရရှိခဲ့ကြောင်း တအာင်းတပ်မတော်(TNLA)က သတင်းထုတ်ပြန်ပါတယ်။
TNLA ထိန်းချုပ်ဒေသတွေကို စစ်ကောင်စီတပ်က လေကြောင်း စစ်ဆင်ရေးဆက်တိုက် လုပ်ဆောင် နေတဲ့ အခြေအနေမှာ ဒီကနေ့ မနက်မှာလည်း တိုက်ပွဲမရှိတဲ့ မန်စံရွာကို ပေါင် ၂၅၀ ဗုံး ၂လုံး ကြဲချတိုက်ခိုက်လာတာပါ။
ဗုံးကြဲတိုက်ခိုက်မှုကြောင့် နေအိမ်ပျက်စီးမှုတွေရှိခဲ့ကြောင်းလည်း အသိပေးထားပါတယ်။
Public Service Announcement
ကျောက်မဲမြို့နယ် မိုင်းလုံမြို့ကို စစ်ကောင်စီတပ် လေကြောင်းကနေ ဗုံးကြဲအပြီး ပျက်စီးမှုများ။ ဓာတ်ပုံ – TNLA 
ကျောက်မဲမြို့နယ် မိုင်းလုံမြို့ကို စစ်ကောင်စီတပ် လေကြောင်းကနေ ဗုံးကြဲအပြီး ပျက်စီးမှုများ။ ဓာတ်ပုံ – TNLA 
ကျောက်မဲမြို့နယ် မိုင်းလုံမြို့ကို စစ်ကောင်စီတပ် လေကြောင်းကနေ ဗုံးကြဲအပြီး ပျက်စီးမှုများ။ ဓာတ်ပုံ – TNLA
စစ်ကောင်စီဟာ အောက်တိုဘာ ၁ရက်ကနေ အောက်တိုဘာ ၂၁ ရက်အထိ TNLA ထိန်းချုပ်ဒေသတွေကို လေကြောင်း ဗုံးကြဲမှု ၃၄ ကြိမ်ပြုလုပ်ခဲ့ပါတယ်။ မန်တုံ၊ ကျောက်မဲ၊ သီပေါ၊ မိုင်းငေါ့၊ မိုင်းလုံ၊ နမ့်ဆန်၊ နမ္မတူ၊ မိုးမိတ်နဲ့ မိုးကုတ်စတဲ့ ဒေသတွေက ပြည်သူလူထုနေထိုင်ရာတွေကို အဓိက ပစ်မှတ်ထား တိုက်ခိုက်ခဲ့လို့ ကလေးငယ် ၁၀ဦး၊ အမျိုးသမီး ၂၁ဦး အပါအဝင် စုစုပေါင်း ပြည်သူ ၅၀နီးပါး သေဆုံးကာ ပြည်သူ ၆၀ကျော် ဒဏ်ရာရခဲ့ပါတယ်။
လေကြောင်းတိုက်ခိုက်မှုကြောင့် နေအိမ် ၊ စာသင်ကျောင်း၊ ဘုန်းကြီးကျောင်း အပါအဝင် အဆောက်အဦးမျိုးစုံ ၂၀၀ နီးပါးနဲ့ ကား၊ ဆိုင်ကယ်အပါအဝင် ပြည်သူပိုင်ပစ္စည်းများစွာ ထိခိုက်ပျက်စီးခဲ့ရပါတယ်။
စစ်ကောင်စီဟာ တအာင်းဒေသကိုသာမက ကချင်လွတ်လပ်ရေးတပ်မတော်(KIA) ထိန်းချုပ်ထားတဲ့ နယ်မြေတွေကိုလည်း လေကြောင်း စစ်ဆင်ရေးတွေအရှိန်မြှင့်လုပ်ဆောင်နေပြီး အောက်တိုဘာ ၂၁ရက် တရက်တည်းမှာ KIA ထိန်းချုပ်နယ်မြေက ဝိုင်းမော်၊ ဖားကန့်၊ ဆော့လော် လန်ဆယ်ဒေသ စုစုပေါင်း နေရာ ၁၁နေရာကို လေကြောင်းဗုံးကြဲတိုက်ခိုက်ခဲ့ကြောင်း KIA က အသိပေးထားပါတယ်။
လေကြောင်းတိုက်ခိုက်မှုကြောင့် ပြည်သူထိခိုက်မှုတွေရှိခဲ့တယ်လို့လည်း KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောပြပါတယ်။
ကချင်နဲ့ တအာင်းဒေသသာမက နိုင်ငံတဝန်းမှာ စစ်ကောင်စီက လေကြောင်းတိုက်ခိုက်မှုတွေ ဆက်တိုက်ပြုလုပ်နေပြီး ပြည်သူတွေကို ပစ်မှတ်ထား တိုက်ခိုက်နေလို့ ပြည်သူတွေ သတိရှိဖို့ လေကြောင်းရန်ကာကွယ်ရေးဆိုင်ရာနည်းလမ်းတွေ လိုက်နာဖို့ တော်လှန်ရေးတပ်ဖွဲ့တွေက နှိုးဆော်ထားပါတယ်။
ဒါ့အပြင် စစ်ကောင်စီရဲ့လုပ်ရပ်ဟာ ပြည်သူအပေါ် စစ်ရာဇဝတ်မှုကျူးလွန်နေခြင်းဖြစ်ကြောင်း TNLAက ထုတ်ပြန်ထားပါတယ်။
