စက်တင်ဘာ-၂၉၊ ၂၀၂၅။ ရှိန်း/People’s Spring
မန္တလေးမြို့မှာ စစ်ကောင်စီ ရွေးကောက်ပွဲသတိပေးချက်တွေ လိုက်လံ ကြေညာနေတဲ့ ပျူစောထီးကားက လမ်းပိတ်လို့ဆိုပြီး ပြည်သူတွေကို ဆဲဆိုကြိမ်းမောင်းသွားတယ်လို့ မြို့ခံတွေဆီက သိရပါတယ်။
ဒီနေ့ညနေပိုင်းမှာ စစ်ကောင်စီက ပြုလုပ်မယ့် ရွေးကောက်ပွဲနဲ့ပတ်သက်တာတွေကို ရပ်ကွက်တိုင်းမှာ လော်စပီကာတွေနဲ့လိုက်အော်တယ်လို့ ဆိုပါတယ်။
အဲဒီလိုလိုက်အော်တဲ့ကားဟာ ညနေ၆နာရီခွဲလောက်မှာ မဟာအောင်မြေမြို့နယ်၊ မဟာမြိုင်(၂)ရပ်ကွက် ၆၆လမ်းတလျှောက် လိုက်အော်နေချိန် ကားလမ်းပိတ်လို့ဆိုပြီး လမ်းပေါ်က ပြည်သူတွေကို ဆဲဆိုသွားတယ်လို့ ဒေသခံတွေက ပြောပါတယ်။
Public Service Announcement
“အိမ်စီးကားအနက်ရောင်နဲ့လာတာ။ ရှေ့ကတယောက်က စစ်ယူနီ ဖောင်းဝတ်ထားတာ။ သူကမန္တလေးက တက်တူးနဲ့ပျူစောထီးကောင်ပဲ။ လော်စပီကာကိုင်ထားတဲ့သူက အရပ်ဝတ် စွပ်ကျယ်နဲ့။ ယူနီဖောင်းဝတ်ထားတဲ့ကောင်က တလမ်းလုံးကိုဆဲတာ။ ဆဲတာကတော့ တကားလုံးကဆဲတာ။ ပိုဆိုးတာက အဲဒီကောင်။ ရုံးဆင်းချိန်ဆိုတော့ လမ်းအရမ်းပိတ်နေတဲ့အချိန်။ သူတို့ကားကဖြည်းဖြည်းပဲ မောင်းရတော့ကြောက်တာ နေမှာ။ဘေးကပ်ဆိုပြီး မောင်းနေတဲ့ဆိုင်ကယ်တွေ၊ ကားတွေရော လမ်းဘေးရပ်ထားတဲ့ ကားတွေကိုပါ အော်ဆဲကြတာ” လို့ မြို့ခံတစ်ဦးက ပြောပါတယ်။
ဆဲဆိုသံကြောင့် အိမ်တွေထဲက ပြည်သူတွေကပါ လမ်းပေါ် ကြောက်လန့်တကြားထွက်ကြည့်ကြပြီး ပျူစောထီးဆိုသူက သေနတ်ပြကာ ဆက်လက်ဆဲဆိုသွားတယ်လို့ ဆိုပါတယ်။
စစ်ကောင်စီရွေးကောက်ပွဲနဲ့ပတ်သက်ပြီး ဘာကြေညာလဲဆိုတာ မမှတ်မိလိုက်ဘဲ ဆဲဆိုသံကြောင့်သာ လူတွေ သတိထားမိကြတာလို့ ဆိုပါတယ်။
ရပ်ကွက်တိုင်းမှာ ဒီနေ့လို လိုက်ကြေညာနေသလို ညပိုင်းအထိလည်း လုံခြုံရေးတိုးကာ ဖုန်းနဲ့ လိုင်စင်စစ်ဆေးတာတွေ အတင်းအကြပ်ပြုလုပ်နေတယ်လို့ သိရပါတယ်။
