■မြန်မာ့ကမ်းရိုးတန်းအနီး ငလျင်ငယ်များတောက်လျောက်လှုပ်နေသည်ကိုသတိပြုရန် MOHADM သတိပေးထား
သြဂုတ်-၂၁၊၂၀၂၅။အိမ်သွင်/People’s Spring
မြန်မာ့ကမ်းရိုးတန်းအနီး ငလျင်လှုပ်ရှားမှု ခပ်စိပ်စိပ်ဖြစ်နေပြီး ယနေ့ နံနက်ပိုင်းတွင် ရန်ကုန်မြို့အနီးကမ်းရိုးတန်းအနီး ရစ်ခ်တာစကေး ၅.၄ အဆင့်မြေငလျင်လှုပ်သည့်ကို ရန်ကုန်တွင်လည်း ခံစားလိုက်ရသည်။
အထက်ပါ ငလျင်သည် ဩဂုတ်လ ၂၁ရက် နံနက် ၉နာရီ ၂၈မိနစ်ခန့်တွင် လှုပ်ရှားခြင်းဖြစ်သည်ဟု ထိုင်းမိုးလေဝသဌာနကထုတ်ပြန်သည်။
Public Service Announcement
ရန်ကုန်မြို့တွင် တာမွေ၊ ဒဂုံဆိပ်ကမ်း၊ လှိုင်သာယာ၊ ရွှေပြည်သာ၊ မင်္ဂလာတောင်ညွန့်၊ တောင်ဒဂုံ၊ကမာရွတ်၊ လှိုင်နှင့်စမ်းချောင်းမြို့နယ်တို့တွင်လည်း သိသိသာသာခံစားလိုက်ရသည်။ အဆိုပငလျင်လှုပ်သည်ကိုထိုင်းနိုင်ငံမှပါခံစားခဲ့ရကြောင်းထိုင်းသတင်းဌာနများကဖော်ပြသည်။
ရန်ကုန်တိုင်း၊ သုံးခွမြို့၏တောင် – အရှေ့တောင်ဘက် ၆၆ ကီလိုမီတာအကွာ၊မြန်မာနိုင်ငံတောင်ဘက်၊ကမ်းရိုးတန်းအနီး၊ မြေအောက်အနက် ၁၀ ကီလိုမီတာကိုဗဟိုပြု၍ ရစ်ခ်တာစကေး ၄ဒဿမ ၇ အဆင့်ဖြင့် ငလျင်လှုပ်ရှားသွားခြင်းဖြစ်ကြောင်း အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)က ထုတ်ပြန်သည်။
မြေငလျင်တိုင်းတာစက်များကအသုံးပြုသည့် စကေးနှင့်တိုင်းတာသည့်နည်းလမ်းတို့အပေါ်မူတည်၍လည်း ငလျင်အင်အားပမာဏ အနည်းငယ်ကွာခြားမှုရှိနိုင်ပါသည်ဟုလည်းဖော်ပြထားသည်။
“ရန်ကုန်နားမှာငလျင်တွေခဏခဏ လှုပ်နေတယ်။ ညကတစ်ချက်ပဲ။အခုကကျတိုက်ကခါသွားတယ်ကြောက်တယ်။နေရထိုင်ရတာ”ဟု ၆ ထပ်အဆောက်အအုံ၌ နေထိုင်သော တာမွေမြို့နယ်မှဒေသခံတစ်ဦးကပြောသည်။
“ညတုန်းက အိမ်မှာ မဟုတ်တော့ မသိလိုက်ပေမယ့် မနက်ကတော့ သိသာတယ်။ တိုက်ခန်းက ၇ လွှာမို့လားမသိ မျက်နှာကြပ်မီးချောင်းတွေပါ လှုပ်ရမ်းသွားတယ်။ အိပ်နေရင်းနဲ့ ကြမ်းပြင်ကြီး လှုပ်သလိုခံစားရတယ် ထလည်း မရပ်ရဲဘူး။ ခေါင်းတွေပါမူးတယ်။ အခုလူကြီးတွေကတော့ စိတ်ပူပြီး Emergency Bag တွေထည့်ဖို့လုပ်နေတယ်” ဟု စမ်းချောင်းမြို့နယ်နေပြည်သူတစ်ဦးကလည်းပြောသည်။
ရန်ကုန်၊ ဧရာဝတီတိုင်းတို့နှင့်ဆက်စပ်နေသော မြန်မာ့ကမ်းရိုးတန်းအနီးတွင်သြဂုတ် ၂၀ ရက်ညမှစ၍ ရစ်ခ်တာစကေး ၄ဒဿမ၂မှ ၅ဒဿမ၄ကြား ငလျင် လေးကြိမ် လှုပ်ရှားခဲ့သည်။ ရန်ကုန်တိုင်း သုံးခွမြို့အနီးတွင် သုံးကြိမ်၊ ဧရာဝတီတိုင်း ဒေးဒရဲမြို့အနီးတွင် တစ်ကြိမ် လှုပ်ရှားခဲ့သည်။
“မြန်မာ့ကမ်းရိုးတန်းအနီးတွင်ငလျင်ငယ်များတောက်လျောက်လှုပ်ခတ်နေသည်ကိုသတိပြုသင့်ပါသည်” ဟု MOHADMက သတိပေးထားသည်။
ရန်ကုန်မြို့သည် ရန်ကုန်မြစ်ဝအနီးရှိ ပြတ်ရွေ့များကြောင့် ငလျင်လှုပ်နိုင်သလို ဒေးဒရဲ ပြတ်ရွှေ့ကြောင့်လည်း ငလျင်လှုပ်ရှားနိုင်သည်။ ပဲခူးမြို့ကို ဖြတ်သွားသည့် စစ်ကိုင်းပြတ်ရွေ့၏ တောင်ဘက်စွန်းပိုင်းလှုပ်ရှားပါကလည်းရန်ကုန်မြို့တွင်ငလျင်လှုပ်စေသည်ဟုမြေငလျင်ပညာရှင်များကပြောထားသည်။ထိုအပြင် မြန်မာ့ပင်လယ်ပြင်နှင့် ဆက်စပ်သော ထိုးစိုက်ဇုန် လှုပ်ပါကလည်း ရန်ကုန်တွင် သက်ရောက်မှုရှိစေသည်။
ပြီးခဲ့သည့် မတ် ၂၈ ရက်က စစ်ကိုင်းမြို့အနီးဗဟိုပြု၍ အင်အား ၇ ဒသမ ၇ ရှိမြေငလျင်ကြီးနှင့် အိနစ်ပိုင်းအတွင်း တံတားဦးမြို့နယ်အတွင်းဗဟိုပြု၍အင်အားပြင်းနောက်ဆက်တွဲငလျင်ကြီးလှုပ်ခတ်ခဲ့သဖြင့် လူထောင်ပေါင်းများစွာသေဆုံးပြီး နေအိမ်အဆောက်အအုံများစွာပျက်စီးစေခဲ့ကာမြန်မာ့သမိုင်းတလျှောက်ပျက်စီးဆုံးရှုံးမှုအများဆုံးဖြစ်စေခဲ့သည်။
