ဧပြီ ၁၄၊၂၀၂၅။ခွာညို၊ဟန်နွေPeople’s Spring
စစ်ကိုင်းတိုင်း တန့်ဆည်မြို့နှင့် မန္တလေးတိုင်း သပိတ်ကျင်းမြို့နယ်ကို စစ်ကောင်စီက ယမန်နေ့ သင်္ကြန်အကြိုနေ့ညနေနှင့် ညပိုင်းတွင် ပေါင် ၅၀၀ ဗုံးဖြင့် လေကြောင်းမှ ဗုံးကြဲတိုက်ခိုက်ရာ အရပ်သား သုံးဦးသေဆုံးပြီး ၁၁ ဦးဒဏ်ရာရရှိခဲ့သည်။
တန့်ဆည်မြို့နယ်၊ လယ်မကျေးရွာဘုန်းကြီးကျောင်းကို ဧပြီ ၁၃ ရက် ညနေ ၃ နာရီခွဲခန့်တွင် နှစ်ကြိမ်ဗုံးကြဲတိုက်ခိုက်ခြင်းဖြစ်ပြီး အမျိုးသမီးတစ်ဦး သေဆုံးကာ အမျိုးသမီးနှစ်ဦး၊ အမျိုးသားတစ်ဦးဒဏ်ရာရခဲ့သည်။
သပိတ်ကျင်းမြို့နယ် ချောင်းကြီးကျေးရွာအား စစ်ကောင်စီလေကြောင်းတိုက်ခိုက်အပြီး ပျက်စီးမှုများ။ ဓာတ်ပုံ – Min Khant Kyaw 
သပိတ်ကျင်းမြို့နယ် ချောင်းကြီးကျေးရွာအား စစ်ကောင်စီလေကြောင်းတိုက်ခိုက်အပြီး ပျက်စီးမှုများ။ ဓာတ်ပုံ – Min Khant Kyaw 
သပိတ်ကျင်းမြို့နယ် ချောင်းကြီးကျေးရွာအား စစ်ကောင်စီလေကြောင်းတိုက်ခိုက်အပြီး ပျက်စီးမှုများ။ ဓာတ်ပုံ – Min Khant Kyaw
ထို့အပြင် သပိတ်ကျင်းမြို့နယ် ချောင်းကြီးကျေးရွာကို ဧပြီ ၁၃ရက်ည ၁၀နာရီ ၁၄မိနစ်နှင့် ၁၀နာရီ ၂၄မိနစ်၌ ဗုံးကြဲတိုက်ခိုက်ခဲ့ခြင်းဖြစ်ပြီး ဒေသခံ နှစ်ဦး သေဆုံးကာ ၈ဦးဒဏ်ရာရခဲ့သည်ဟု ကာကွယ်ရေးရဲဘော်တစ်ဦးက ပြောသည်။
Public Service Announcement
“အရပ်သားပြည်သူတွေကို ပစ်မှတ်ထားဗုံးကြဲတိုက်ခိုက်ခဲ့တဲ့ အကြမ်းဖက်စစ်တပ်ရဲ့ လုပ်ရပ်တွေပါ။ဒီတကြိမ်နဲ့ဆို အဲဒီရွာကို ဗုံးကြဲတာ ၄ကြိမ်မြောက်ပါ”ဟု သပိတ်ကျင်းမြို့နယ်သတင်းတာဝန်ခံက ပြောသည်။
“တောက်လျှောက် လေကြောင်းကြဲနေတာ။စကစက သူ့ရဲ့ စကားနဲ့ လုပ်ရပ်နဲ့ဘယ်တော့မှ မတည်ဘူး။ “ဟု ပြင်ဦးလွင်ခရိုင် ပကဖ တာဝန်ခံက စစ်ကောင်စီ၏ အပစ်ရပ်ကြေညာထားပြီး လေကြောင်းမှ ဗုံးကြဲတိုက်ခိုက်မှု ဆက်တိုက်ပြုလုပ်နေသည့်အပေါ် ပြောသည်။
စစ်ကောင်စီထောက်ခံသူများမှအပ ပြည်သူအများစုသည် စစ်ကောင်စီ၏အလိမ်အညာများကို သိရှိနေကြပြီဖြစ်ကြောင်း၊ ငလျင်ဘေးသင့်နေချိန် ပြည်သူများစိတ်ဒုက္ခကြုံနေရချိန် စစ်ကောင်စီကပြည်သူကိုရက်ရက်စက်စက်လုပ်ဆောင်နေကြောင်း ပြင်ဦးလွင်ခရိုင် ပကဖ တာဝန်ခံက ပြောသည်။
စစ်ကောင်စီသည် ယနေ့(ဧပြီ ၁၄ရက်) နံနက်တွင်လည်း စစ်ကိုင်းတိုင်း၊ ကနီမြို့ကို လေကြောင်းမှာဗုံးကြဲတိုက်ခိုက်ရာ သံဃာတော်တစ်ဦး ပျံလွန်တော်မူပြီး အရပ်သားတစ်ဦးသေဆုံးခဲ့သည်။
စစ်ကောင်စီသည် ယာယီအပစ်ရပ်မည်ဟုကြေညာထားသော်လည်း သင်္ကြန်ကာလအတွင်း လေကြောင်းတိုက်ခိုက်မှုများ အရှိန်မြင့်ပြုလုပ်နေသည်။
သင်္ကြန်အကြိုနေ့နှင့် ယနေ့အထိ စစ်ကိုင်းတိုင်းအတွင်း ကနီ၊ တန့်ဆည်၊ ကောလင်းနှင့် ဝန်းသိုမြို့၊ မန္တလေးတိုင်း သပိတ်ကျင်းမြို့၊ ချင်းပြည်နယ်မင်းတပ်မြို့၊ ရခိုင်ပြည်နယ် ကျောက်တော်မြို့တို့ကို လေကြောင်းမှ ဗုံးကြဲတိုက်ခိုက်ခဲ့သည်။
