ရှမ်းပြည်နယ်တောင်ပိုင်း၊ မိုးဗြဲမြို့အခြေစိုက် ခမရ(၄၂၂)တပ်၌ တာဝန်ကျနေသည့် စစ်မှုထမ်းဥပဒေဖြင့် တပ်သားသစ် သုံးဦး ဖယ်ခုံ PDF(၁၀၀၆)တပ်ရင်းနှင့် ချိတ်ဆက်၍ အလင်းဝင်လာကြောင်း အဆိုပါတပ်ရင်းက အသိပေးထားသည်။
အဆိုပါတပ်သား သုံးဦးသည် MA1တစ်လက်၊ MA3 နှစ်လက်နှင့် ကျည်တောင့် ၁၂၀တို့သယ်ဆောင်လာပြီး ဖေဖော်ဝါရီ ၂၄ရက်တွင် ဖယ်ခုံ PDFက သွားရောက်ခေါ်ဆောင်ခဲ့သည်ဟု ဆိုသည်။
“စစ်မှုထမ်းဥပဒေနဲ့ မတရားတာဝန်ထမ်းဆောင်ရတဲ့သူတွေပါ။လောလောဆယ် တပ်ရင်းမှာဘေးကင်းလုံခြုံစွာရှိနေတယ်။ဆုကြေးငွေလည်း ချီးမြှင့်ထားတယ်။ထပ်ပြီးတော့လည်း NUG MOD ကနေ သူတို့အတွက် အထောက်အပံ့တွေ ဆက်လက်လုပ်ဆောင်နေပါတယ်”ဟု ဖယ်ခုံPDF (၁၀၀၆)တပ်ရင်းတာဝန်ရှိသူက လူထုနွေဦးသို့ ပြောသည်။
Public Service Announcement
စစ်တပ်မှ ပြည်သူလူထုအပေါ် နှိပ်စက်အကြမ်းဖက်မှုများကို လက်သင့်မခံနိုင်သောကြောင့် ဓမ္မတရားအတွက် အရဲစွန့် ရုန်းထွက်လာရခြင်းဖြစ်ဟု တပ်သားသစ်သုံးဦးက ထွက်ဆိုထားသည်။
ထို့အပြင် စစ်တပ်တွင်းမှ အလင်းဝင်ရောက်လိုသူများလည်း အစဥ်အမြဲကြိုဆိုနေပြီး ဘေးကင်းလုံခြုံမှုအာမခံကြောင်း ဖယ်ခုံPDF (၁၀၀၆)တပ်ရင်းက အသိပေးသည်။
မိုးဗြဲမြို့တိုက်ပွဲတွင် စစ်ကောင်စီက စစ်မှုထမ်းဥပဒေဖြင့် အဓမ္မစုဆောင်းထားသည့် တပ်သားသစ်များကို အသုံးပြုနေပြီး တော်လှန်ရေးအင်အားစုထံ အလင်းဝင်လာသူမှာလည်း ရာဂဏန်းခန့်ရှိနေသည်။
