အိမ်သွင်/People’s Spring
ရန်ကုန်တိုင်းတွင် အအေးပိုလာနိုင်ပြီး လေထုညစ်ညမ်းမှုအဆင့်အနီရောင်အဆင့်သို့ ရောက်ရှိနေကြောင်း အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)ကထုတ်ပြန်သည်။
ဖေဖော်ဝါရီလ ၂ ရက်အထိ မိုးလေဝသခန့်မှန်းချက်၌ ရန်ကုန်တိုင်းအတွင်း လေထုညစ်ညမ်းမှုအခြေအနေနှင့် မြန်မာနိုင်ငံတောင်ပိုင်းစွန်းနှင့် မြောက်ပိုင်း စွန်းဒေသများတွင် မိုးအနည်းငယ်ရွာသွန်းနိုင်ကြောင်း ခန့်မှန်းထားသည်။
ရန်ကုန်တိုင်းတွင် အထူးသဖြင့် နံနက်ပိုင်းအချိန်များ၌ အအေးပိုလာနိုင်ပြီး လေထုညစ်ညမ်းမှုအဆင့်အနီရောင်အဆင့်သို့ ရောက်ရှိနေသည်ဟုလည်း သတိပေးထားသည်။
Public Service Announcement
ကမ္ဘာနိုင်ငံအသီးသီးမှ လေထုညစ်ညမ်းမှုအခြေအနေများကို တိုင်းတာပေးနေသည့် IQ Air က ဇန်နဝါရီ ၂၇ ရက် တိုင်းတာချက်အရရန်ကုန် မြို့ လေထုညစ်ညမ်းမှုသည် ကမ္ဘာ့အဆင့် (၈) သို့ ရောက်ရှိနေသည်ဟု ဖော်ပြထားသည်။သို့သော် ဇန်နဝါရီ ၂၇ ရင်နေ့ မွန်းလွဲ ၂ နာရီခွဲတွင် လေထုအရည်အသွေးမှာ အဝါရောင်အဆင့်သို့လျော့ကျလာပြီး ကမ္ဘာတွင် အဆင့် ၁၈ ဖြစ်လာသည်။
“ရန်ကုန်က မနက်ပိုင်းအေးလည်း ခဏပဲ။ တနေကုန်နေလို့မကောင်းဘူး။ လေထုမှာကိုက အနံ့မကောင်းသလိုကြီး။ ဘယ်သွားသွား Maskတပ်နေရတယ်”ဟု ရန်ကုန်မြို့ခံတစ်ဦးကပြောသည်။
ရန်ကုန်၌ အအေးပိုလာနိုင်သလို ပြီးခဲ့သည့်ဒီဇင်ဘာလမှာစတင်၍ ပုံမှန်ထက်အေးနေခဲ့သည့် စစ်ကိုင်းတိုင်း၊ကချင်ပြည်နယ်နှင့် ရှမ်းပြည်နယ်တို့တွင်လည်း ဆက်လက် အအေးပိုနိုင်ကြောင်း ခန့်မှန်းထားသည်။
ဇန်နဝါရီလ ၂၇ရက်မှ ဖေဖော်ဝါရီလ ၂ ရက်အတွင်း ကချင်ပြည်နယ်၊ စစ်ကိုင်းတိုင်း၊ ရှမ်းပြည်နယ်၊ ပဲခူးတိုင်း၊ မန္တလေးတိုင်းတို့တွင် မိုးအနည်းငယ်ရွာနိုင်ပြီး ဖေဖော်ဝါရီ ၁ရက်နှင့် ဖေဖော်ဝါရီ၂ရက်တွင် ကချင်ပြည်နယ်၌ နှင်းမိုးရွာနိုင်သည်ဟုသတိပေးထားသည်။
ကချင်ပြည်နယ်အတွင်း အအေးပိုသောဒေသများဖြစ်သည့် တရုတ်နိုင်ငံနှစ်နယ်စပ်ဒေသများ၌ ရေခဲသည့်အထိ အေးနေသည်ဟု ဒေသခံများကပြောသည်။
