ကဖေး/People’s Spring
စစ်ကိုင်းတိုင်း၊ ခါမ်းပါတ်မြို့မှ နေရာသုံးခုကို စစ်ကောင်စီက ယနေ့ညပိုင်းတွင် ဗုံးကြဲတိုက်ခိုက်ရာ ကလေးငယ်နှစ်ဦးအပါအဝင် ပြည်သူခြောက်ဦး သေဆုံးခဲ့ရကြောင်း ကနဦးသတင်းရရှိသည်။
ခါမ်းပါတ်မြို့တစ်နေရာ၊ ကနန်ကျေးရွာနှင့် ထင်းဇင်ကျေးရွာ တစ်နေရာကို ယနေ့ (ဇန်နဝါရီ၁၆ရက်) ည ၈နာရီ ၂၁မိနစ်၊ ၂၂မိနစ်နှင့် ၃၆မိနစ်တို့တွင် ဗုံးတစ်လုံးစီကြဲချခြင်း ဖြစ်သည်။
သတင်းရင်းမြစ်တစ်ဦးက ကလေးငယ်နှစ်ဦး၊ ဘုန်းကြီးတစ်ပါးနှင့် အမျိုးသားသုံးဦး သေဆုံးခဲ့ကြောင်း ပြောသည်။ နောက်ထပ် သတင်းရင်းမြစ်ဦးက ယနေ့ညလေ ကြောင်းတိုက်ခိုက်ခံရမှုတွင် အရပ်သားငါးဦးသေဆုံးကြောင်း ပြောသည်။
Public Service Announcement
စစ်ကိုင်းတိုင်းပြည်သူ့ကာကွယ်ရေးအဖွဲ့(ပကဖ)မှ တာဝန်ရှိသူတစ်ဦးကလည်း “အခုည ၈နာရီ ၂၅ မှစပြီး တမူးခရိုင် ခမ်းပါတ်မြို့ကို လေကြောင်းတိုက်ခိုက်မှု ၃ကြိမ်ပြုလုပ်ပါတယ်။ ကလေး၂ယောက်၊လူကြီး၃ယောက်၊ ဘုန်းကြီး၁ပါး သေဆုံးပါတယ်။ ကနဦးသတင်းရရှိပါတယ်”ဟု အသိပေးထားသည်။
နောက်ထပ်လေကြောင်းတိုက်ခိုက်ခံရမည်ကို ဒေသခံများစိုးရိမ်နေကြပြီး ဗုံးခိုးကျင်းများအတွင်း ပုန်းအောင်းနေကြရသည်။
ခမ်းပါတ်မြို့ကို အမျိုးသားညီညွတ်ရေးအစိုးရ (NUG)၏ ပြည်သူ့ကာကွယ်ရေးတပ်ဖွဲ့များက ၂၀၂၃ နိုဝင်ဘာ ၇ရက်တွင် တိုက်ခိုက်သိမ်းပိုက်ထားသည်။
စစ်ကောင်စီသည် တော်လှန်ရေးအင်အားစုများ ထိန်းချုပ်ထားသည့်မြို့နယ်များကို ၂၀၂၅ ဇန်နဝါရီလဆန်းမှစ၍ ဗုံးကြဲတိုက်ခိုက်မှုများ ဆက်တိုက်လုပ်ဆောင်နေသည်။
