Koronavirusun alt variantlarına qarşı təsirli olacaq vaksinlərin payızda hazır olacağı gözlənilir.
Gununsesi.info xarici mediaya istinadən xəbər verir ki, koronavirus peyvəndi istehsal edən alman biotexnologiya şirkəti BioNTech və digər subvariantlara qarşı təsirli olacaq peyvəndi rəsmi təsdiqlərə uyğun olaraq sentyabr ayında Avropaya çatdırmağı planlaşdırdığını açıqlayıb. BioNTech və ABŞ-ın Pfizer şirkəti Omicron variantının XXB.1.5 subvariantına qarşı peyvənd hazırlayıblar.
Almaniya və bir çox Avropa ölkələrində tədricən yayılan yeni EG.5 variantının da XBB-dən götürüldüyü bildirilir. ABŞ-ın Moderna şirkəti xarici qəzetə verdiyi açıqlamada hazırladığı peyvəndin payıza çatacağı mesajını verib və təsdiqini aldıqdan sonra bazara çıxarılacağını qeyd edib. Bundan əlavə, ABŞ-ın Novavax şirkəti də Omicron alt variantına qarşı təsirli olacaq peyvənd üzərində işləyir.
Yeni peyvəndlərin istifadəsinin daha asan olması planlaşdırılır. Biotexnologiya şirkətləri ilk növbədə vaksinləri tək dozalı formada istehsal edəcəklər. Əvvəllər vaksinlər bir neçə dozada istehsal olunurdu və açıldığı təqdirdə qısa müddətdə istifadə edilməli idi.
BioNTech-in qurucusu Uğur Şahin Frankfurter Allgemeine Zeitung-a verdiyi açıqlamada, yeni dərmanların hazırlanması zamanı təsdiqləmə prosesindəki səmərəsiz və uzun proseduru tənqid edib.
Koronavirus pandemiyası ərəfəsində ilk peyvəndin hazırlanması zamanı səlahiyyətli birliklərlə sıx əməkdaşlığa diqqət çəkən Uğur Şahin “Yenə normala qayıtdıq və bu, yenidən uzun bir proses deməkdir. Almaniyada və Avropada çox səlahiyyətli tənzimləyici orqanlar var. Amma səmərəsiz bir proses var ki, həm hakimiyyət orqanlarından, həm də dərman istehsalçılarından çoxlu resurs sərf edir” deyib.
Şahin texnoloji imkanlarla bürokratiyanın icazə verdiyi arasında uyğunsuzluğun olduğunu bildirib: “Bu, lazımsız bürokratiyadan qaynaqlanır. Digər çatışmazlıq emal müddətini uzadan resursların olmamasıdır. Sistem tənbəlliyi təsdiqləri gecikdirən bir darboğaz olmamalıdır”.
Qeyd edək ki, Avropa İttifaqında (Aİ) dərman və ya peyvəndlərin təsdiqi prosesi bir neçə mərhələdən ibarətdir. Bu mərhələlər arasında çoxlu sayda klinik tədqiqatların aparılması şərti də var. Bu mərhələlərin nəticəsi olaraq, Avropa Dərman Agentliyi (EMA) sözügedən dərman və ya peyvəndlə bağlı öz rəyini, Avropa İttifaqı Komissiyası isə təsdiqlə bağlı qərarını izah edir.
Aİ Komissiyası gələcəkdə təsdiq prosesinin son iki mərhələsi üçün son müddətin qısaldıla biləcəyini açıqlayıb.
