မြန်မာနိုင်ငံနဲ့ နယ်စပ်နားမှာ နင်းမိုင်းပေါက်ကွဲလို့ ဘင်္ဂလားဒေ့ရှ် နယ်ခြားစောင့်တပ် (BGB) အဖွဲ့ဝင်တစ်ဦး ဒဏ်ရာရသွားကြောင်း သိရပါတယ်။
အောက်တိုဘာ ၁၇ ရက်နေ့ နေ့လယ်ပိုင်းက နယ်စပ်လုံခြုံရေးအတွက် ကင်းလှည့်ရင်း တပ်ဖွဲ့ဝင်တစ်ဦး မိုင်းနင်းမိခဲ့တာလို့ BGBက ထုတ်ပြန်ပါတယ်။ အဲဒီ နင်းမိုင်းကို အာရက္ခတပ်တော် (AA)က ထောင်ထားခဲ့တာလို့ ဘင်္ဂလားဒေ့ရှ် မီဒီယာတွေကစွပ်စွဲဖော်ပြခဲ့ပါတယ်။
အဆိုပါသတင်းဖော်ပြချက်တွေနဲ့ပတ်သက်ပြီး People’s Spring က အာရက္ခတပ်တော်(AA)ကိုဆက်သွယ်မေးမြန်းဖို့ကြိုးစားပေမယ့် ဆက်သွယ်လို့မရသေးပါဘူး။
ပေါက်ကွဲမှု ဖြစ်ပွားရာ ဘန်ဒါဘန် ဧရိယာဟာ AAထိန်းချုပ် နယ်မြေတွေနဲ့ ဆက်စပ်တည်ရှိနေတယ်လို့ဆိုပါတယ်။
Public Service Announcement
ဒဏ်ရာရသွားခဲ့တဲ့ တပ်ဖွဲ့ဝင်ကို ရာမူး စစ်ဆေးရုံဆီ တင်ပို့ထားတယ်လို့လည်း BGBရဲ့ ရာမူးဒေသ တပ်ဖွဲ့ခွဲ အကြီးအကဲ ဗိုလ်မှူး မိုဟူဒင် အာမက်က ပြောပါတယ်။ ထိခိုက်ခဲ့တဲ့ တပ်ဖွဲ့ဝင်ရဲ့ ဒဏ်ရာက ပြင်းထန်ပြီး ခြေထောက်တစ်ချောင်းကို ခြေကျင်းဝတ်နားကနေ ဖြတ်တောက်ခဲ့ရတယ်လို့လည်း သိရပါတယ်။
အရင်ကလည်း နယ်စပ်မှာ AA ထောင်ထားခဲ့တဲ့ နင်းမိုင်းတွေကြောင့် ဘင်္ဂလားဒေ့ရှ် နိုင်ငံသားတွေ ထိခိုက်ဒဏ်ရာရတာတွေ ရှိခဲ့တယ်လို့ ဘင်္ဂလားဒေ့ရှ် မီဒီယာတွေက စွပ်စွဲဖော်ပြထားပါတယ်။
ဧပြီလ ၆ ရက်နေ့တုန်းကလည်း ကော့စ်ဘဇားမှာရှိတဲ့ တက်ခ်နက်ဖ် အူပါဇီလာ ဒေသမှာ ဘင်္ဂလားဒေ့ရှ် အမျိုးသားတစ်ဦး မိုင်းနင်းမိပြီး ခြေထောက်ပြတ်ခဲ့ပါတယ်။ဇွန်လ၂၂ ရက်နေ့တုန်းကလည်း အလားတူပဲ လူငယ်တစ်ဦးဟာ နိုင်ခန်ချာရိုင်မှာ မိုင်းနင်းမိပြီး ခြေထောက်တစ်ဖက် ဆုံးရှုံးခဲ့ပါတယ်။
နာခွန်ချာရိုင်မှာပဲ ဩဂုတ် ၁၁ ရက်နေ့က နင်းမိုင်း ပေါက်ကွဲခဲ့တဲ့အတွက် တောဆင်ရိုင်း တစ်ကောင်ရဲ့ ခြေထောက်တစ်ချောင်းဟာ ခြေကျင်းဝတ်က ပြတ်ထွက်တဲ့ဒဏ်ရာ ရခဲ့ပါတယ်။
ကိုးကား: BD News
