တရုတ်ရေတပ်ရဲ့ တိုက်လေယာဉ် တစ်စီးဟာ လေ့ကျင့်ရေး မစ်ရှင်အတွက် ပျံသန်းရင်း ပျက်ကျခဲ့ကြောင်း သိရပါတယ်။
တရုတ် ပြည်သူ့လွတ်မြောက်ရေးတပ် (PLA)ရဲ့ တောင်ပိုင်းတိုင်း စစ်ဌာနချုပ် လက်အောက်ခံ တိုက်လေယာဉ်ဟာ နိုင်ငံတောင်ပိုင်း၊ ဟိုင်နန်ကျွန်းမှရှိတဲ့ ကွင်းပြင် တစ်နေရာဆီ မတ်လ ၁၅ ရက်နေ့တုန်းက ပျက်ကျခဲ့ပြီး လေယာဉ်မှူးကတော့ လေထီးနဲ့ ခုန်ထွက်ပြီး အသက်ရှင် လွတ်မြောက်နိုင်ခဲ့တယ်လို့ ရေတပ်က ထုတ်ပြန်ခဲ့ပါတယ်။
တောင်ပိုင်းတိုင်း စစ်ဌာနချုပ်ဟာ တောင်တရုတ်ပင်လယ်လိုမျိုး တရုတ်ရဲ့ ထိလွယ်ရှလွယ် အရှိဆုံး နယ်မြေတွေကို တာဝန်ယူ ကိုင်တွယ်နေပါတယ်။ အဲဒီ ပင်လယ်ပြင်မှာ တရုတ်နဲ့ ဖိလစ်ပိုင်ကြား နှစ်နဲ့ချီ ကြာမြင့်တဲ့ ရေပိုင်နက် အငြင်းပွားမှု ပြဿနာတွေ ပေါ်ပေါက်နေပါတယ်။
လေယာဉ်မှူးဟာ အောင်မြင်စွာ လေထီးနဲ့ ခုန်ထွက်နိုင်ခဲ့ကြောင်း၊ မြေပြင်ပေါ်မှာလည်း အထိအခိုက် မရှိခဲ့ကြောင်း ရေတပ်က ဆိုပါတယ်။ လေယာဉ် ပျက်ကျမှုနဲ့ ပတ်သက်ပြီး စုံစမ်း စစ်ဆေးမှုတွေ စတင်နေပြီလို့လည်း ရေတပ် ထုတ်ပြန်ချက်မှာ ဖော်ပြထားပါတယ်။
Public Service Announcement
ပျက်ကျခဲ့တဲ့ လေယာဉ် အမျိုးအစားကို ရေတပ်က အတိအကျ မထုတ်ပြန်ပေမယ့် လူမှုကွန်ရက် မီဒီယာတွေပေါ် ပျံ့နှံ့လာတဲ့ ဗီဒီယို မှတ်တမ်းတွေအရ J-15 တစ်စီးက မြေပြင်ပေါ် ဦးစိုက် ထိုးဆင်းလာပြီး မီးလောင် ပေါက်ကွဲသွားခဲ့တာကို တွေ့ရပါတယ်။
တရုတ်ဟာ တောင်တရုတ်ပင်လယ် ဧရိယာ တစ်ခုလုံးနီးပါးကို နိုင်ငံပိုင်နက်အဖြစ် သတ်မှတ်ထားတာကြောင့် ဖိလစ်ပိုင်သာ မကဘဲ ဗီယက်နမ်၊ အင်ဒိုနီးရှားတို့လို တခြားဒေသတွင်း နိုင်ငံတချို့နဲ့လည်း ပိုင်နက် အငြင်းပွားမှုတွေ ရှိနေပါတယ်။ ပြီးတော့ အဲဒီ ပင်လယ်ပြင်မှာ တရုတ်ရဲ့ ရေတပ်၊ လေတပ် စစ်ရေးလှုပ်ရှားမှုတွေကိုလည်း အရှိန်မြှင့် လုပ်ဆောင်နေပါတယ်။
ဖေဖော်ဝါရီ လတုန်းက တရုတ် ရေတပ် ရဟတ်ယာဉ် တစ်စီးဟာ ဂျာနယ်လစ်တွေ ပါလာတဲ့ ဖိလစ်ပိုင် ကမ်းခြေစောင့် လေယာဉ် တစ်စီးနဲ့ အန္တရာယ် ဖြစ်လောက်တဲ့ အကွာအဝေးမျိုး ချဉ်းကပ် ပျံသန်းခဲ့တဲ့အတွက် ဖိလစ်ပိုင်ဖက်က အပြင်းအထန် ရှုတ်ချခဲ့ပါတယ်။
ကိုးကား: CNA
