မေ – ၂၅ ၊၂၀၂၆ ၊နိုင်ပကောင်း/People’s Spring
ကရင့်နယ်ခြားစောင့်တပ် (BGF)ခေါင်းဆောင်ပိုင်းဗိုလ်မှုးချုပ်စောချစ်သူ ထိန်းချုပ်ထားတဲ့ထိုင်း – မြန်မာနယ်စပ်ရှိ ရွှေကုက္ကိုလ်မြို့ကို လာမယ့်ရက်ပိုင်းအတွင်းအာဏာသိမ်းစစ်တပ်ကကျားဖြန့်နှိမ်နင်းရေးအကြောင်း ပြချက်နဲ့ ထပ်မံဝင်ရောက်စစ်ဆေးဖို့ရှိနေတယ်လို့ BGF နဲ့နီးစပ်တဲ့ကရင်သတင်းရင်းမြစ်က ပြောပါတယ်။
စစ်ကောင်စီတပ်ဦးဆောင်တဲ့စစ်ဆေးရေးအဖွဲ့ဟာရွှေကုက္ကိုမြို့ကို မေလကုန်ခါနီးရက်ပိုင်းတွေ မှာထပ်မံဝင်ရောက်စစ်ဆေးဖို့ စီစဉ်နေတာပါ။
အဲဒီစစ်ဆေးမှုမှာလည်းထိုင်းဘက်ကလည်းပါဝင်မယ်လို့ကနဦးသိထားရပါတယ်။
Public Service Announcement
လက်ရှိမှာတော့ရွှေကုက္ကိုလ်မှာရှိတဲ့တရုတ်နိုင်ငံသားအချို့ဟာတခြားနေရာတွေဆီကြိုတင်ပြီးရွှေ့ပြောင်းနေကြပြီလို့ ကရင်သတင်းရင်းမြစ်က အသိပေးပါတယ်။
BGF ရဲ့ပြောရေးဆိုခွင့်ရှိ ဗိုလ်မှူးကြီးနိုင်မောင်ဇော်ကတော့ရွှေကုက္ကိုဒေသမှာ ကျားဖြန့်လုပ်ငန်းတွေ လုပ်ကိုင်ဆောင်ရွက်နေတာမရှိဘူးလို့ ပြီးခဲ့တဲ့နှစ်ကုန်ပိုင်းက ပြောကြားထားပါတယ်။
ပြီးခဲ့တဲ့နှစ် ၊နိုဝင်ဘာလအတွင်း စစ်တပ်ဦးဆောင်တဲ့အဖွဲ့စုံကရွှေကုက္ကိုမြို့မှာရှိတဲ့ ကျားဖြန့်လုပ်ငန်းနေရာတွေကို ဝင်ရောက်စီးနင်းခဲ့ပြီး တရုတ်နိုင်ငံသားတွေပါဝင်တဲ့ကျားဖြန့်လုပ်သားတွေကိုသက်ဆိုင်ရာနိုင်ငံတွေဆီပြန်လွှဲပြောင်းပေးပို့ခဲ့တယ်လို့ ဝါဒဖြန့်ထုတ်ပြန်ထားပါတယ်။
ဗိုလ်မှုးချုပ်စောချစ်သူ BGF တပ်ဖွဲ့ဟာကျားဖြန့် ၊လူကုန်ကူးမှုနဲ့ တရားမဝင်ရာဇဝတ်စီးပွားရေးလုပ်ငန်းတွေကိုလုပ်ကိုင်နေတယ်လို့ Justice For Myanmar (JFM) က ၂၀၂၄ မေလက ထုတ်ပြန်ထားပါတယ်။
ပြီးခဲ့တဲ့ နှစ် ၊မေလမှာလည်းအမေရိကန်အစိုးရကကရင်နယ်ခြားစောင့်တပ် (BGF) ခေါင်းဆောင် ဗိုလ်မှုးကြီးစောချစ်သူနဲ့ သားနှစ်ယောက်ကို ပစ်မှတ်ထားတဲ့ အရေးယူ ပိတ်ဆို့ ဒဏ်ခတ်မှု အသစ်တွေကိုချမှတ်လိုက်ပါတယ်။
အမေရိကန်နိုင်ငံသားတွေကိုပစ်မှတ်ထားပြီးအွန်လိုင်းငွေကြေးလိမ်လည်မှု တွေ၊ လူမှောင်ခိုမှုတွေနဲ့ နယ်စပ်ဖြတ်ကျော်မှောင်ခိုမှုတွေအတွက် အရေး ယူတာဖြစ်တယ်လို့အမေရိကန်ဘဏ္ဍာရေးဝန်ကြီးဌာနကဆိုထားပါတယ်။
ဗိုလ်မှုးချုပ်စောချစ်သူကတော့ ကျားဖြန့် လုပ်ငန်းအပြင် တရားမဝင်လုပ်ငန်းတွေ နဲ့ပတ်သက်တာမရှိဘူးလို့ စွပ်စွဲချက်တွေကို မီဒီယာတွေကတဆင့် ငြင်းဆိုထားပါတယ်။
