မေ-၂၅၊၂၀၂၆။ဇော်ရမ်း/People’s Spring
အာရက္ခတပ်တော်(AA)နဲ့ ပူးပေါင်းတပ်တွေက ပိတ်ဆို့ထားတဲ့နတ်ရေကန်ဗျူဟာဘက်ကို အာဏာသိမ်းစစ်တပ်က စစ်မှုထမ်းသင်တန်းဆင်းစစ်သားသစ်တွေ ထပ်ပို့နေပြီးတိုက်ပွဲတွေဆက်လက်ပြင်းထန်နေပါတယ်။
နတ်ရေကန်ဗျူဟာရဲ့နောက်ဆုံးကာကင်းဖြစ်တဲ့ ကြက်ခြံကုန်းကာကင်းကို AAနဲ့ ပူးပေါင်းတပ်တွေက မတ်လဆန်းတိုက်ပွဲတွေမှာ သိမ်းယူခဲ့ပြီးနောက် စစ်ကတပ်ကပဇီရွာနဲ့ ဂုတ်ကြီးရွာဘက်ကို အင်အားဖြည့်နေတာပါ။
“ တိုက်ပွဲကတော့ဆက်ပြင်းထန်ပြီးလေကြောင်းကနေလာလာပစ်နေတာ။ကျွန်တော်တို့ဘက်ကိုလည်း စစ်မှုထမ်းသင်တန်းဆင်းတွေ ထပ်ပို့နေပြီး တိုက်ပွဲတွေမှာ သူတို့ အသေများတယ်။ အဓိက ကတော့ လေကြောင်းရန်ကို သတိထားရင်း စစ်ရေးဖော်ဆောင်နေတာပါ။သူတို့ကပဇီရွာနဲ့ဂုတ်ကြီးရွာဘက်ကနေ တိုးနေပါတယ်” လို့ဒေသခံစစ်ရေးသတင်းရင်းမြစ်ကမေလ၂၅ ရက်နေ့လယ်ပိုင်းမှာ ပြောပါတယ်။
Public Service Announcement
ကြက်ခြံကုန်းကာကင်းကို AAနဲ့ ပူးပေါင်းတပ်တွေကသိမ်းယူလိုက်ပြီးတဲ့နောက် နတ်ရေးကန်ဗျူဟာကို သိမ်းယူဖို့ စစ်ရေးအရှိန်မြှင့်ထားပါတယ်။ စစ်တပ်ကလည်း နတ်ရေကန်ဗျူဟာကနေနှစ်မိုင်ခန့်အကွာမှာရှိတဲ့ အရှေ့မြောက်ဘက်က ပဇီရွာနဲ့အရှေ့တောင်ဘက်က ဂုတ်ကြီးရွာကို အင်အားဖြည့်ပြီး စစ်ကြောင်းထိုးဖို့ ကြိုးစားနေပါတယ်။
စစ်တပ်ကပဒါန်းမြို့နယ်မှာရှိတဲ့အမှတ်(၉၀၅)အမြောက်စခန်းကွပ်ကဲမှုဌာနချုပ်(အမတ)ကတဆင့် ပဇီရွာနဲ့ ဂုတ်ကြီးရွာကို လက်နက်၊ ရိက္ခာနဲ့ လူအင်အားတွေပို့နေတာပါ။
မေလ ၂၄ရက်က တိုက်ပွဲမှာလည်း စစ်တပ်ဘက်ကသေဆုံးသူတွေထဲမှာစစ်မှုထမ်းသင်တန်းဆင်းတွေအများဆုံးပါတယ်လို့ နယ်မြေခံသတင်းရင်းမြစ်ကပြောပါတယ်။
“ မဟာမိတ်တွေဆီကနေရတဲ့သတင်းအရ ဧရာဝတီနဲ့ ပဲခူးက စစ်မှုထမ်းသင်တန်းဆင်းတွေ နတ်ရေကန်ဘက်ကိုအများကြီး အပို့ခံရတယ်။ သေတာမှာ သူတို့ပဲ ပိုများတာ။ ရှေ့တန်းကို အတင်းအကျပ်အပို့ခံနေရတာ” လို့တော်လှန်ရေးရဲဘော်တဦးကပြောပါတယ်။
နတ်ရေကန်ဗျူဟာကိုခုခံဖို့စစ်တပ်က စစ်မှုထမ်းသင်တန်းဆင်းထောင်ချီပြီးရှေ့တန်းကိုပို့ခဲ့ပါတယ်။ နိုင်ငံတစ်ဝန်းအတင်းအကျပ်စစ်သားစုဆောင်းထားတဲ့စစ်မှုထမ်းသင်တန်းဆင်း စစ်သားသစ်တွေကို တိုက်ပွဲပြင်းထန်တဲ့ဒေသတွေကိုပို့ပြီးစစ်တိုက်ခိုင်းတာကြောင့် လူငယ်စစ်သားသစ်တွေ စစ်ကောင်စီအတွက် စတေးနေကြရတယ်လို့AAက ထုတ်ပြန်ထားပါတယ်။
နတ်ရေကန်ဗျူဟာနဲ့ အမ်း-ပဒါန်း စစ်မြေပြင်မှာ စစ်မှုထမ်းသင်တန်းဆင်းတွေကို မူးယစ်ဆေးကျွေးပြီးစစ်တိုက်ခိုင်းတာတွေ၊ စစ်ကြောင်းရှေ့ဆုံးကနေ တိုက်ခိုင်းပြီး မိုင်းကွင်းကိုဖြတ်ခိုင်းတာတွေ၊ ကြောက်လန့်ပြီး ပြန်ဆုတ်လာသူတွေကို စစ်ကောင်စီတပ်ဖွဲ့ဝင်တွေက သေနတ်နဲ့ ပစ်သတ်တာတွေရှိခဲ့တယ်လို့ AAထံ အလင်းဝင်ခဲ့တဲ့ စစ်မှုထမ်းသင်တန်းဆင်းတွေက ထုတ်ဖော်ပြောကြားခဲ့ပါတယ်။
နတ်ရေကန်ဗျူဟာကုန်းဟာ မကွေးတိုင်း၊ ငဖဲမြို့နယ်မှာ ရှိပါတယ်။ရခိုင်ပြည်နယ်၊ မကွေးတိုင်းနဲ့ ပဲခူးတိုင်းဆက်စပ်နေရာမှာရှိပြီး စစ်ရေးအရ အချက်အချာကျတဲ့ စစ်ကောင်စီရဲ့အမာခံစခန်းကြီးဖြစ်ပါတယ်။အခိုင်အမာကာကင်းစခန်ကြီး ၁၀ခုထက်မနည်းရှိပါတယ်။ နတ်ရေကန်ဗျူဟာကုန်းကိုAAနဲ့ မဟာမိတ်တွေက ပြီးခဲ့တဲ့ ၂၀၂၅ ဖေဖော်ဝါရီလမှာ ထိုးစစ်စတင်ခဲ့ပြီး ၁နှစ်ကျော်အတွင်းမှာ ကာကင်းစခန်းတွေအားလုံးကို သိမ်းယူခဲ့တာဖြစ်ပါတယ်။
လတ်တလော စစ်ရေးသတင်းတွေကို AAက မထုတ်ပြန်သေးပါဘူး။ လက်ရှိမှာ AAနဲ့ မဟာမိတ်တွေက ပဲခူးတိုင်း၊ ပန်းတောင်းမြို့နယ်ထဲမှာရှိတဲ့ ကပစ(၁၆)နဲ့ ဧရာဝတီတိုင်း၊ရေကြည်မြို့နယ်ထဲကအမြောက်တပ်(၃၄၄)ကိုလည်းထိုးစစ်ဆင်တိုက်ခိုက်နေပါတယ်။အဲဒီတိုက်ပွဲတွေမှာလည်း စစ်တပ်က စစ်မှုထမ်းသင်တန်းဆင်းတွေကိုအများဆုံးအသုံးပြုနေသလို လေကြောင်းကနေလည်း ဗုံးကြဲခုခံနေပါတယ်။ လတ်တလောတိုက်ပွဲပြင်းထန်နေတဲ့ ကချင်နဲ့စစ်ကိုင်းတိုင်းနယ်စပ်ဒေသမှာလည်း စစ်မှုထမ်းသင်တန်းဆင်းတွေအများအပြားသေဆုံးနေတယ်လို့ တော်လှန်ရေးရဲဘော်တွေကပြောပါတယ်။
