ဇန်နဝါရီ-၁၊၂၀၂၆။ ထားမြတ်/People’s Spring
ချင်းပြည်နယ် မင်းတပ်၊ ကန်ပက်လက်၊ မတူပီနဲ့ ပလက်၀မြို့နယ်တွေက ချင်းဒေသကာကွယ်ရေးတပ်(CDF) လေးဖွဲ့ကို Chin People’s Union/Chin People Army(CPU/CPA) အဖြစ် ပေါင်းစည်းလိုက်ကြောင်း CPU ဥက္ကဋ္ဌ ဆလိုင်းထန်းချွန်းဖေက အတည်ပြုပြီး ချင်းညီနောင် သဘာပတိ ဆလိုင်းပီတာထန်းက ပြောပါတယ်။
ချင်းညီနောင်အဖွဲ့ဝင်တွေဖြစ်တဲ့ CDF မင်းတပ်၊ CDF ကန်ပက်လက်နဲ့ CDF မတူပီတို့အပြင် ချင်းညီနောင်အဖွဲ့ဝင် မဟုတ်သေးတဲ့ ပလက်၀မြို့နယ် က Daai Regional Council/CDF Daai စတဲ့ တပ်ဖွဲ့ ၄ခုကို CPU/CPA အဖြစ် စုဖွဲ့ခဲ့တာလို့ ဆိုပါတယ်။
” CPUက ချင်းပြည်နယ် တောင်ပိုင်းက လက်နက်ကိုင်အဖွဲ့အစည်းတွေက ပေါင်းစည်းတည်ထောင်ထားတာပါ” လို့ ဆလိုင်းထန်းချွန်းဖေက ပြောပါတယ်။
Public Service Announcement
ချင်းညီနောင် သဘာပတိ ဆလိုင်းပီတာထန်းကလည်း ချင်းညီနောင်ကို စတင်ဖွဲ့စည်းချိန်က အဖွဲ့ ၃ဖွဲ့နဲ့ စုဖွဲ့ခဲ့တာ ဖြစ်ပြီး ၂နှစ်တာအတွင်း အဖွဲ့ဝင် ၆ဖွဲ့ ရှိလာကြောင်း အသိပေးပါတယ်။ဒါပေမဲ့ ချင်းတောင်ပိုင်းက မင်းတပ်၊ ကန်ပက်လက်နဲ့ မတူပီရှိ ချင်းညီနောင်အဖွဲ့ဝင်တွေဟာ DRC နဲ့ ပေါင်းပြီး CPU/CPA အနေဖြင့် တဖွဲ့တည်း ပေါင်းစည်းလိုက်တာကြောင့် ချင်းညီနောင်အဖွဲ့ဝင်ဟာ ၄ဖွဲ့သာ ဖြစ်သွားကြောင်း ရှင်းပြပါတယ်။
ချင်းညီနောင်ရည်ရွယ်ချက်မှာ ချင်းညီနောင်မှာရှိတဲ့ အဖွဲ့ဝင်တွေအားလုံး တပ်တွေအားလုံး စုဖွဲ့သွားဖို့ ရှိကြောင်းလည်း ဆလိုင်းပီတာထန်းက ပြောပါတယ်။ လက်ရှိမှာ လည်း ချင်းညီနောင်အနေနဲ့ ချင်းအမျိုးသားရေး၊ ပြည်ထောင်စုအရေးနဲ့ ပတ်သက်လာပါက မူဝါဒတခုတည်း၊ အသံတသံတည်းအဖြစ် ဆောင်ရွက်ဖို့ ရှိကြောင်း အသိပေးပါတယ်။ ဒါ့အပြင် ပြည်ထောင်စုအဆင့်မှာလည်း ပါဝင်နိုင်ဖို့ နွေဦးတော်လှန်ရေးမဟာမိတ်တပ်ပေါင်းစု(SRA)မှာ ပါဝင်ထားတယ်လို့လည်း ဆလိုင်းပီတာထန်းက ပြောပါတယ်။
ချင်းညီနောင်အနေနဲ့ ဒေသလွတ်မြောက်ရေးသာမက ပြည်ထောင်စုတခုလုံးလွတ်မြောက်ရေး ကိုယ်စွမ်းဉာဏ်စွမ်းရှိသလောက် ကြိုးပမ်းသွားမယ်လို့ ချင်းညီနောင် စစ်ရေးကော်မတီဥက္ကဋ္ဌအဖြစ် တာဝန်ယူခဲ့တဲ့ ဆလိုင်းထန်းချွန်းဖေကအဖွဲ့ နှစ်ပတ်လည်နေ့ အခမ်းအနားမှာ ထုတ်ဖော်ပြောဆိုခဲ့ပါတယ်။
