ဒီဇင်ဘာ-၂၇၊ ၂၀၂၅။ ဟန်နွေ/People’s Spring
အာဏာသိမ်း စစ်ကောင်စီကျင်းပမယ့်ရွေးကောက်ပွဲဆန့်ကျင်ကြောင်း တနင်္သာရီမြို့နယ်u ပြည်သူတွေ ဆန္ဒထုတ်ဖော်ခဲ့တယ်လို့ ဒေသသတင်းရင်းမြစ်က ပြောပါတယ်။
စစ်အာဏာရှင်တွေ တည်တံ့ဖို့ ပြုလုပ်တဲ့ ရွေးကောက်ပွဲကို ဒီကနေ့ ဒီဇင်ဘာ ၂၇ရက်မှာ ပြည်သူတွေ ကန့်ကွက်ခဲ့ခြင်းဖြစ်တယ်လို့ သတင်းရင်းမြစ်က ပြောပါတယ်။
ဆန္ဒပြသူတွေဟာ “အတုအယောင်ရွေးကောက်ပွဲ ကို ဆန့်ကျင်၊ အာဏာရှင်စနစ်ကို သုတ်သင်”၊ “သင့်မဲဖြင့် တရားဝင် လူသတ်ခွင့် မပေးနဲ့” ၊ “ လူသတ်ခွင့်ပြုတာ သင့်မဲတပြားပါ” စတဲ့ စာသားတွေ ရေးသား ကိုင်ဆောင်ပြီး စစ်တပ်ရွေးကောက်ပွဲကို ဆန့်ကျင်ခဲ့တာပါ။
Public Service Announcement
စစ်တပ်က မနက်ဖြန် ဒီဇင်ဘာ ၂၈ရက်မှာ ရွေးကောက်ပွဲလုပ်မယ်လို့ သတ်မှတ်ထားတာဖြစ်လို့ အခုရက်ပိုင်းမှာ စစ်တပ်ရွေးကောက်ပွဲ ဆန့်ကျင်တဲ့ လှုပ်ရှားမှုတွေကို တနင်္သာရီတိုင်းအပါအဝင် နိုင်ငံတဝန်းက တော်လှန်ပြည်သူ အဖွဲ့အစည်းတွေ ရွေးကောက်ပွဲ ဆန့်ကျင်ကြောင်း ဖော်ပြမှုတွေ ပြုလုပ်လျက်ရှိပါတယ်။
စစ်တပ်ရွေးကောက်ပွဲ ဆန့်ကျင်တဲ့အနေနဲ့ စစ်ကောင်စီတပ်တွေကို တော်လှန်ရေးအဖွဲ့တွေက တိုက်ခိုက်တာ၊ ပြည်သူတွေက ဆန္ဒထုတ်ဖော်မှု ပြုလုပ်တာ ၊ စစ်တပ်ရွေးကောက်ပွဲနေ့မှာ မိမိအိမ် နေထိုင်ပြီး ရွေးကောက်ပွဲ ဆန့်ကျင်ဖို့ လှုံ့ဆော်ကြေညာတာ၊ စစ်တပ်ရွေးကောက်ပွဲမှာ ပူးပေါင်းဆောင်ရွက်မှု မလုပ်ဖို့ သတိပေးတာ စတဲ့ နည်းမျိုးစုံနဲ့ စစ်ကောင်စီရွေးကောက်ပွဲကို ဆန့်ကျင်ကြောင်း ပြသနေတာဖြစ်ပါတယ်။
