Scorpio/People’s Spring
ဒီဇင်ဘာလရုံးပိတ်ရက် မန္တလေး-ပြင်ဦးလွင်လမ်းမှာ ကားတန်းတွေပိတ်တဲ့အထိ ခရီးသွားဧည့်သည်များပြားခဲ့ပါတယ်။ အလားတူ ပုဂံညောင်ဦးဒေသမှာ၊ ကျိုက်ထီးရိုးဘုရားမှာ ဧည့်သည်တွေများလို့ ယာဥ်ကြောပိတ်ဆို့မှုတွေ ဖြစ်ခဲ့ပါတယ်။
စစ်ကိုင်းတိုင်းထဲမှာလည်း အလားတူ ယာဥ်ကြောပိတ်ဆို့မှုတွေ ပြီးခဲ့တဲ့ ဒီဇင်ဘာ ဒုတိယပါတ်အတွင်းက ဖြစ်ပွားခဲ့ပါတယ်။ စစ်ကိုင်းတိုင်း၊ ရွှေဘို-မြစ်ကြီးနားလမ်းမှာ မြေနီသျှိုလမ်းဆုံဆိုတာ ရှိပါတယ်။ အနောက်ဘက်သွားမယ်ဆိုခင်ဦး၊ အရှေ့သွားမယ်ဆို ခင်ဦး နဲ့ ကန့်ဘလူနယ်အရှေ့ခြမ်း၊ တောင်ဘက်ကတော့ ရွှေဘိုနယ်၊ မြောက်ကတော့ ကန့်ဘလူနယ်ပါ။ ခင်ဦးမြို့သွားမယ့်လမ်းဆုံမို့ ခင်ဦးလမ်းဆုံလို့လည်း ခေါ်ကြပါတယ်။
လမ်းဆုံဖြစ်တာမို့ ခရီးသွားကားတွေ တထောက်နားတဲ့နေရာဖြစ်ပါတယ်။ ခရီးသည်တွေ အဆာပြေစားသောက်ရင်း နားနေကြတဲ့နေရာမို့ စျေးဆိုင်လေးတွေလည်း ရှိပါတယ်။
Public Service Announcement
အဲဒီလမ်းဆုံမှာ ပြီးခဲတဲ့ဒီဇင်ဘာ၁၀ရက်ကတည်းက လမ်းပိတ်ထားလို့ ခရီးသည်တင်ကားတွေ ကုန်တင်ယာဥ်တွေ ရာချီပိတ်မိခဲ့ပါတယ်။ ဘာတိုက်ပွဲမှမရှိဘဲ ကန့်ဘလူနယ်အတွင်းမှာရှိတဲ့ စစ်တပ်ဂိတ်တွေက ပိတ်ထားခဲ့တာပါ။
တချို့ကတော့ ကွင်းလမ်းကသွားကြတယ်။ အများစုကတော့ စောင့်ခဲ့ကြတယ်။ စောင့်ရင်း ရက်မခံတဲ့ ကုန်တွေပုပ်သိုးကုန်လို့ ရှုံးသွားကြတဲ့ ကုန်သည်တွေ ရှိခဲ့တယ်။
ပြည်သူတွေဟာ တိုက်ပွဲမရှိဘဲ ဘာကြောင့်လမ်းပိတ်ရတာလဲတွေးနေရင်း အဲဒီအဖြေကို တစ်ပါတ်အကြာ ဒီဇင်ဘာ ၁၈ ရက်မှာ သိခဲ့ရပါတယ်။
ဒီဇင်ဘာ ၁၈ရက် နေ့လယ်ပိုင်းက မြေနီသျှိုလမ်းဆုံ(ခင်ဦးလမ်းဆုံ)အနီးကို စစ်တပ်က ဂျက်ဖိုက်တာ ၄ စီး၊ ဂျိုင်ရိုကော်ပတာ ၃ စီးနဲ့ လေကြောင်းကတိုက်ခိုက်ခဲ့တာပါ။
လေကြောင်းပစ်ချိန် ခင်ဦးလမ်းဆုံနား ရပ်တန့်ထားရတဲ့ ကားပေါ်က ခရီးသည်တွေ၊ ဆီကားနဲ့ကုန်ကားပေါ်က ဒရိုင်ဘာတွေ ယာဥ်နောက်လိုက်တွေ လမ်းဘေးအကုန်ဆင်းပြေးကြတယ်။ ထန်းပင်တွေနား အပြေးအလွှား ကွယ်ကြတယ်။ “ ထန်းပင်ကို အရှေ့အနောက် ပတ်ပြေးနေရတာ” လို့ ကားသမားတစ်ဦးက ပြောပါတယ်။
အဲဒီတိုက်ခိုက်မှုမှာ ဆီခြံပေါ်တည့်တည့်ကျပြီး သေဆုံးပြည်သူ ၆ ဦးထက်မနည်းရှိကာ ဒဏ်ရာရရှိသူများ များပြားခဲ့ကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က ပြောပါတယ်။
“ ပြည်သူတွေကော၊ ကားတွေကော ပစ်တာ။ ပစ်တာတောင် ရိုးရိုးမပစ်ဘူး။ ၁ဝ ရက်လောက် လမ်းပိတ်ပြီးမှ ပစ်တာ” လို့ ကားသမားတစ်ဦးက ပြောပါတယ်။
ဆီခြံ ပေါက်ကွဲမီးလောင်ခဲ့လို့ ရွှေဘို-မြစ်ကြီးနားလမ်းကြောပိတ်မိနေတဲ့ ကားသမားတွေနဲ့ ခရီးသွားပြည်သူတွေအပါအဝင် လမ်းဆုံအနီးရှိ ဈေးဆိုင်ရှင်များ၊ အရပ်သားများ ထိခိုက်ခဲ့တာဖြစ်ကြောင်း သိရပါတယ်။
စစ်တပ်ဟာ အဲဒီတနေ့တည်း ခရီးသွားတွေရှိတဲ့နေရာကို လေကြောင်းတိုက်ခိုက်တာ မဟုတ်ပါဘူး။ ဒီဇင်ဘာ ၁၇ ရက်နေ့ကလည်း ခင်ဦးနယ် အရှေ့တောင်ခြမ်း ဧရာဝတီ မြစ်ကူး ဆိပ်ကမ်းနှစ်ခုကို စစ်တပ်က ဂျက်ဖိုက်တာ ၅ စီးနဲ့ အကြိမ်ရေ ၃၀ ထက်မနည်း လေကြောင်းတိုက်ခိုက်လို့ မန္တလေး-စဉ်ကူးနယ်က ဒေသခံ ၇ ဦးခန့်သေဆုံးခဲ့ကာ ၁၅ဦး ဒဏ်ရာရရှိခဲ့ကြောင်း ခင်ဦးမြို့နယ် သတင်းမှန်ပြန်ကြားရေးအဖွဲ့က ပြောပါတယ်။
စစ်အုပ်စုကတော့ PDF တွေကို ပစ်ခတ်ခဲ့တာဆိုပြီးလိမ်လည်ကာအောင်ပွဲခံသတင်းဖြန့်ခဲ့ပါတယ်။
တကယ်တော့ အာဏာသိမ်းစစ်တပ် ကစဥ့်ကူးနယ်ထဲ တော်လှန်ရေးအဖွဲ့တွေသိမ်းထားတဲ့ နယ်မြေတွေကို ဝင်ရောက်လာလို့ ဒေသခံပြည်သူတွေဟာ ဧရာဝတီမြစ်တစ်ဖက်ကမ်းကို ပြေးခဲ့ချိန် လှေဆိပ်မှာပိတ်ဆို့လေကြောင်းတိုက်ခိုက်ခံခဲ့ရတာဖြစ်ကြောင်း ဒေသခံတွေက ပြောပါတယ်။
အထက်က သတင်းတွေကတော့ ခင်ဦးနယ်ပါ။ ခင်ဦးတင်မကသေးပါဘူး။ ဝက်လက်နဲ့ ရွှေဘိုနယ်စပ်မှာလည်း စစ်တပ်က ခရီးသွားကားတွေကို လေကြောင်းကနေ ထပ်မံတိုက်ခိုက်ခဲ့ပြန်ပါတယ်။ ဒီဇင်ဘာ ၁၆ ရက်က ရွှေဘိုမြို့နယ်အရှေ့ခြမ်း၊ အမှတ် ၃ လမ်းမ(ခရိုင်ချင်းဆက်လမ်း)ပေါ်နဲ့ ဂွေးကုန်းရွာအနီးကို ဂျက်ဖိုက်တာနဲ့ လေကြောင်းတိုက်ခိုက်လို့ ကားသမား နှစ်ဦး၊ အဘွားအိုတစ်ဦးအပါအဝင် ပြည်သူ လေးဦး သေဆုံးကာ ထိခိုက်ဒဏ်ရာ ရသူ အများအပြား ရှိခဲ့ပါတယ်။
ဒီဇင်ဘာ ၁၅ရက်ရဲ့ ၁၆ ရက်ကလည်း စဥ့်ကူးနယ်မှာ စစ်ရှောင်တွေလိုက်ပါလာတဲ့ ရေယာဥ်ကို စစ်တပ်က ပစ်ခတ်တိုက်ခိုက်လို့ ပြည်သူ ၂ ဦး ထပ်မံ သေဆုံးခဲ့ပြန်ပါတယ်။
အာဏာသိမ်းစစ်တပ်က ရွေးကောက်ပွဲပထမပိုင်းပြုလုပ်မယ်လို့ ကြေညာထားတဲ့ ဒီဇင်ဘာလအတွင်း လေကြောင်းကနေ ဗုံးကြဲတိုက်ခိုက်မှုတွေဟာ အရှိန်မလျော့ဘဲ နေ့စဥ်ရက်ဆက် တိုက်ခိုက်ခဲ့တာပါ။
လူထုနွေဦးသတင်းဌာနစုဆောင်းထားတဲ့အချက်အလက်တွေအရ ဒီဇင်ဘာ ၁ ရက်ကနေ ဒီဇင်ဘာ ၂၁ ရက်အတွင်း စစ်တပ်ရဲ့ လေကြောင်းတိုက်ခိုက်မှုကြောင့် အနည်းဆုံး ပြည်သူ ၁၃၆ ဦးသေဆုံးခဲ့ပြီး အနည်းဆုံး ၁၈၂ ဦး ထိခိုက်ဒဏ်ရာရခဲ့ပါတယ်။
ဒီဇင်ဘာလအတွင်း စစ်တပ်ရဲ့လေကြောင်းတိုက်ခိုက်မှုတွေကို ကြည့်ရင် စစ်ကိုင်းတိုင်း၊ မန္တလေးတိုင်း၊ ရခိုင်ပြည်နယ်၊ ချင်းပြည်နယ်၊ ကချင်ပြည်နယ်၊ ရှမ်းပြည်နယ်၊ မကွေးတိုင်း၊ ပဲခူးတိုင်း၊ ဧရာဝတီတိုင်းတွေ ပါဝင်ပါတယ်။ အကြိမ်အရေအတွက်အများဆုံးက စစ်ကိုင်းတိုင်းဖြစ်ပြီး အစုလိုက်အပြုံလိုက် သေဆုံးမှုအများဆုံးကတော့ ရခိုင်ပြည်နယ် ဖြစ်တာတွေ့ရပါတယ်။
အာဏာသိမ်းစစ်တပ်ဟာဆေးရုံကိုပါ မချန် ဗုံးကြဲတိုက်ခိုက်ခဲ့သလို လေကြောင်းတိုက်ခိုက်မှုကြောင့် သေဆုံးသူတွေထဲ သံဃာတော်၊ လသားအရွယ် ကလေးငယ်၊ အမျိုးသမီး၊ CDM ဆရာဝန်၊ စစ်ရှောင်သက်ကြီးရွယ်အိုတွေအထိ ပါဝင်ခဲ့ပါတယ်။ အဲဒီသေဆုံးသူတွေထဲ ခရီးသွားရင်း သေဆုံးခဲ့ရသူတွေ ၂၀ ထက်မနည်း ရှိခဲ့ပါတယ်။ စစ်ကိုင်းတိုင်းထဲက ခရီးသွားတွေကတော့ လမ်းခရီးတလျှောက် သွားလမ်းမသာခဲ့ကြပါဘူး။
စစ်တပ်က အာဏာသိမ်းပြီးတော့ ငြိမ်းချမ်းစွာဆန္ဒပြတဲ့ပြည်သူတွေကို အကြမ်းဖက်ဖြိုခွင်းခဲ့တဲ့အချိန်ကတည်းကနေ ပြည်သူတွေကို သတ်ဖြတ်ခဲ့တာဟာ ငါးနှစ်နီးပါးရှိလာတဲ့တိုင် လျော့မသွားပဲတိုးလာပါတယ် ။နိုင်ငံရေးအကျဥ်းသားများကူညီစောင့်ရှောက်ရေးအဖွဲ့ (AAPP)ကပြုစုထားတဲ့အချက်အလက်တွေအရ ၂၀၂၁ ဖေဖော်ဝါရီ ၁ ရက်ကနေ ၂၀၂၅ ဒီဇင်ဘာ ၂၂ ရက်အထိ့ ပြည်သူပေါင်း ၇၆၂၅ ဦးကိုသတ်ဖြတ်ခဲ့ပါတယ်။ အဲဒီစာရင်းကအတည်ပြုပြီးဖြစ်ပါတယ်။ အတည်ပြုဖို့ကျန်နေတာ ၄၂၀၀ ခန့်လည်းရှိပါသေးတယ်။ဒါကြောင့် ဒီစာရင်းနှစ်ခုစလုံးပေါင်းရင် စစ်တပ်သတ်ဖြတ်တာ ပြည်သူပေါင်း တစ်သောင်းနှစ်ထောင်ခန့်ရှိနေပြီဖြစ်ပါတယ် ။ဖုန်းနဲ့ အင်တာနက် ဖြတ်တောက်ခံရတာတွေအချက်အလက်မရတဲ့ဖြစ်စဥ်တွေများစွာရှိနိုင်သေးတာကြောင့် မြေပြင်မှာ စစ်အုပ်စုရဲ့သတ်ဖြတ်တာခံရသူပေါင်း အထက်ပါအရေအတွအတွက်ထက်တောင်များနိုင်ပါသေးတယ် ။
“ စစ်ရှောင်ပြည်သူတွေကော တော်လှန်ရေးနယ်မြေမှာ ကုန်စည်စီးဆင်းမှုတွေ ရပ်တန့်ကုန်အောင် ကုန်ကားတွေပါ ပစ်တာ” လို့ စစ်ကိုင်းတိုင်းအတွင်း သွားလာနေတဲ့ ကုန်ကားသမားတစ်ဦးက ပြောလိုက်ပါတယ်။ ။
