ဒီဇင်ဘာ-၄၊၂၀၂၅။သတိုး/People’s Spring
ပဲခူးတိုင်း၊ ရေတာရှည်မြို့နယ် ကွမ်းအုံးကျေးရွာဘက် စစ်ကြောင်းထိုးလာတဲ့ စစ်ကောင်စီတပ်ဖွဲ့ကို မိုင်းခွဲတိုက်ခိုက်ခဲ့ရာ ၆ဦးသေဆုံးပြီး နှစ်ဦး ဒဏ်ရာရခဲ့တယ်လို့ PDF တပ်ရင်း (၃၅၀၄)က ထုတ်ပြန်ထားပါတယ်။
တပ်ရင်း(၃၅၀၄) နဲ့ ရေတာရှည်မြို့နယ်ပကဖ က သတင်းရရှိတာကြောင့် နိုဝင်ဘာ ၂၆ ရက်နေ့လည်မှာ ကားသုံးစီးနဲ့ အင်အား ၈၀ ခန့်ရှိတဲ့ စစ်ကောင်စီတပ်ဖွဲ့ဝင်တွေကို ကွမ်းအုံးကျေးရွာ နဲ့ ဝမ်းမကြီးကျေပရွာကြားမှာ မိုင်းဆွဲတိုက်ခိုက်ခဲ့တာဖြစ်ပြီး နှစ်ဖက် ထိတွေ့တိုက်ပွဲဖြစ်ခဲ့ကြောင်း ဗီဒီယိုဖိုင်နဲ့အတူ သတင်းထုတ်ပြန်ထားပါတယ်။
တိုက်ပွဲက ၂နာရီခန့်ကြာမြင့်ခဲ့ပြီး တော်လှန်ရေး တပ်ဖွဲ့တွေဘက်က ထိခိုက်ဒဏ်ရာရရှိတာမရှိပေမယ့် စစ်ကောင်စီဘက်က ၆ဦးသေဆုံးကာ နှစ်ဦးဒဏ်ရာရရှိခဲ့တယ်လို့ဆိုပါတယ်။
Public Service Announcement
စစ်ကောင်စီဘက်က ထိခိုက်မှုနဲ့ပတ်သက်ပြီး လူထုနွေဦးအနေနဲ့ သီးခြားအတည်မပြုနိုင်ပါဘူး။
“ တိုက်ပွဲအတွင်း ရန်သူဘက်မှ အီနာဂါဗုံးသီးတစ်လုံး ၊ လက်ပစ်ဗုံးနှစ်လုံး၊ အီကွေးမန့်နှစ်ခု၊MA11ကျည်ဘောက်တစ်ခု ၊ ဦးထုပ် ၂လုံး၊ ၅.၅၆ကျည် ၈၉တောင့်ရရှိခဲ့ပါသည်။” လို့ တပ်ရင်း (၃၅၀၄)က သတင်းထုတ်ပြန်ထားပါတယ်။
ဒီတိုက်ပွဲမဖြစ်ခင် နိုဝင်ဘာ ၂၅ ရက်ကလည်း ကြိုတင်သတင်းရရှိတာကြောင့် စစ်တောင်းမြစ် အနောက်ခြမ်းမှာရှိတဲ့ တပ်ပိုင်မြေတွေမှာ သီးစားခလာဝောာင်းတဲ့ စစ်ကောင်စီရဲ့ တောင်ပိုင်းတိုင်းစစ်ဌာနချုပ်၊ လုံခြုံရေးတပ်ခွဲ (၂)ကတပ်ကြပ်ကြီး မြင့်လွင်ကို တခွဲကြဲကျေးရွာမှာ တပ်ရင်း(၃၅၀၄)က ဖမ်းဆီးနိုင်ခဲ့ပါတယ်။
အဲဒီ့တပ်ကြပ်ကြီးကို ကားတစ်စီးနဲ့အတူ ဖမ်းဆီးနိုင်ခဲ့တာဖြစ်ပြီး တပ်ရင်းက စစ်သုံ့ပန်း ဥပဒေနဲ့အညီ ထိန်းသိမ်းဆောင်ရွက်ထားတယ်လို့ သိရပါတယ်။
