နိုဝင်ဘာ-၂၇၊ ၂၀၂၅။ People’s Spring
မြန်မာ-ထိုင်းနယ်စပ် မြဝတီမြို့နယ်ထဲက မင်းလက်ပံရှိ ငွေလိမ်လုပ်ငန်းတွေပြုလုပ်နေတဲ့ခြံဝန်းထဲမှာ မြန်မာနိုင်ငံသားတွေအပါအဝင် နိုင်ငံပေါင်း ၂၀က လူဦးရေ သုံးထောင်နီးပါးကို စိစစ်တွေ့ရှိခဲ့တယ်လို့ ကရင်အမျိုးသားအစည်းအရုံး(KNU) အွန်လိုင်းငွေလိမ်လည်မှုဆန့်ကျင်ရေးနဲ့ မူးယစ်ဆေးဝါးထိန်းချုပ်ရေးဗဟိုအဖွဲ့က ဒီနေ့ ညပိုင်းမှာ ထုတ်ပြန်ပါတယ်။
ဒီမိုကရက်တစ်ကရင့်အကျိုးပြုတပ်မတော်(DKBA)ရဲ့အကာအကွယ်အောက်မှာ လည်ပတ်နေတဲ့ အွန်လိုင်းငွေလိမ်လုပ်ငန်း(ကျားဖြန့်)လုပ်ကိုင်နေတဲ့ ခြံဝန်းတစ်ခုကို KNU က တွေ့ရှိခဲ့ကြောင်း နိုဝင်ဘာ ၂၅ရက်မှာ ထုတ်ပြန်ကြေညာခဲ့ပြီး အဲဒီနေ့ကစလို့ ဒီနေ့အထိ သုံးရက်အတွင်း KNU မြေပြင်အဖွဲ့ရဲ့စာရင်းကောက်ယူမှုတွေအရ မြန်မာအပါအဝင် နိုင်ငံပေါင်း ၂၀ က လူဦးရေ ၂,၈၄၁ ဦးကို စိစစ်နိုင်ခဲ့တယ်လို့ ဆိုပါတယ်။
အဲဒီထဲက တရုတ်နိုင်ငံသား ၆၅၆ဦး(မ-၇၊ကျား-၆၄၉)၊ လာအိုနိုင်ငံသား ၁၃ဦး(မ-၁၃)နဲ့ ဗီယက်နမ်နိုင်ငံသား ၂၆ဦး(မ-၂၆) စုစုပေါင်း ၆၉၅ဦးတို့ကို ထိုင်းအာဏာပိုင်တွေဆီ ချောချောမွေ့မွေ့လွှဲပြောင်းခဲ့တယ်လို့ ဆိုပါတယ်။
Public Service Announcement
KNU က အဲဒီကျားဖြန့်လုပ်ငန်းခြံဝန်းကြီးကိုတွေ့ရှိပြီးနောက်ပိုင်းကတည်းက အနီးပတ်ဝန်းကျင်နေရာတွေမှာ နေ့စဥ် ပစ်ခတ်မှုတွေ ရှိခဲ့ပြီး အာဏာသိမ်းစစ်ကောင်စီတပ်က လေကြောင်းကနေ ပေါင် ၅၀၀ ဗုံးကြဲချတိုက်ခိုက်တဲ့အပြင် လက်နက်ကြီးတွေနဲ့လည်း ပစ်ခတ်မှုရှိတယ်လို့ အသိပေးပါတယ်။
နိုဝင်ဘာ ၂၅ရက် မနက်အစောပိုင်း ထိတွေ့တိုက်ပွဲအတွင်း တရုတ်နိုင်ငံသား ကျားဖြန့်အလုပ်သမားတစ်ဦး သေဆုံးခဲ့ပြီး KNU က သက်ဆိုင်ရာအာဏာပိုင်တွေကို ဆက်သွယ်အကြောင်းကြားခဲ့တယ်လို့ ထုတ်ပြန်ပါတယ်။ ဒါ့အပြင် လူနေထိုင်ရာအဆောက်အဦကို ကျည်ထိမှန်ပြီး ပြတင်းပေါက်မှန်ကွဲစတွေကြောင့် တရုတ်နိုင်ငံသား ကျားဖြန့်အလုပ်သမား ၆ဦးထိခိုက်ဒဏ်ရာရရှိခဲ့ကြောင်းနဲ့ သူတို့ကို ခြံဝန်းအတွင်းက ဆေးရုံမှာ ဆေးကုသမှုခံယူဖို့ ပို့ဆောင်ခဲ့ကြောင်း ဖော်ပြပါတယ်။
သက်ဆိုင်ရာစုံစမ်းစစ်ဆေးရေးအရာရှိတွေလည်း အဲဒီကျားဖြန့်လုပ်ကိုင်ရာခြံဝန်းကို လာရောက်ကြည့်ရှုခဲ့ပြီး KNU တာဝန်ရှိသူတွေနဲ့ တွေ့ဆုံခဲ့တယ်လို့ ဆိုပါတယ်။
ဒီနေ့ညပိုင်း ၈ နာရီခန့်အထိ အဲဒီကျားဖြန့်ခြံဝန်းကနေ လွတ်မြောက်လာတဲ့ အလုပ်သမား လေးရာနီးပါး(ခန့်မှန်းခြေ ၃၉၂ဦး)ဟာ ထိုင်း-မြန်မာနယ်ခြားမြစ် သောင်းရင်းမြစ်နံဘေးမှာ သောင်တင်နေပြီး သူတို့ဟာ လူသားချင်းစာနာမှုအကူအညီ လိုအပ်နေတယ်လို့ KNU က အသိပေးပါတယ်။ အဲဒီကျားဖြန့်အလုပ်သမားတွေကို ထိုင်းအာဏာပိုင်တွေလည်း ဒီနေ့ညပိုင်းအထိ ဝင်ရောက်ခွင့်မပြုသေးဘူးလို့ ဆိုပါတယ်။ သူတို့ကို KNU က စားသောက်ဖွယ်ရာ၊ ယာယီသုံးတဲတွေ ပေးအပ်ထားတယ်လို့ သိရပါတယ်။
