ဧပြီ ၇၊၂၀၂၅/People’s Spring
အင်အားပြင်းငလျင်လှုပ်ခတ်ခဲ့မှုကြောင့် မန္တလေးမြို့ရှိ Win Star Hotel အဆောက်အအုံ ပြိုကျ၍ ပိတ်မိနေသူများအားရှာဖွေရာ အမျိုးသားတစ်ဦးနှင့် အမျိုးသမီးတစ်ဦး၏ ရုပ်အလောင်းရှာဖွေတွေ့ရှိခဲ့ကြောင်း မြန်မာနိုင်ငံမီးသတ်ဌာနက ထုတ်ပြန်သည်။
ယနေ့(ဧပြီ ၇ရက်)တွင် Win Star Hotel အဆောက်အအုံ ပြိုကျပျက်စီး၍ ပိတ်မိနေသူများအား ရုရှားနိုင်ငံမှ အဖွဲ့ဝင်များနှင့် ပူးပေါင်းရှာဖွေရာ အမျိုးသားတစ်ဦးနှင့် အမျိုးသမီးတစ်ဦး၏ ရုပ်အလောင်းရှာဖွေတွေ့ရှိပြီး ဆက်လက်၍ ရှာဖွေကယ်ဆယ်ရေးလုပ်ငန်းများ ဆောင်ရွက်နေကြောင်းလည်း အသိပေးထားသည်။
ထို့အပြင် မန္တလေးမြို့၊ အောင်မြေသာစံမြို့နယ်၌ ပြိုကျခဲ့သည့် Sky Villaကွန်ဒိုအဆောက်အဦးအတွင်းမှ ကလေးနှစ်ဦးအပါအဝင် ရုပ်အလောင်း ၁၀လောင်း ထပ်မံတွေ့ရှိကြောင်း မြန်မာနိုင်ငံမီးသတ်တပ်ဖွဲ့က ယနေ့(ဧပြီ ၇ရက်) နေ့လည်ပိုင်းတွင် ထုတ်ပြန်သည်။
Public Service Announcement
Sky Villa ကွန်ဒိုအဆောက်အဦး ပြိုကျပျက်စီး၍ ပိတ်မိနေသူများအား တရုတ်နိုင်ငံမှ Blue Sky Rescue ကယ်ဆယ်ရေးအဖွဲ့ဝင်များနှင့် ပူးပေါင်း၍ ရှာဖွေနေကြောင်း အသိပေးသည်။
ယနေ့ရှာဖွေကယ်ဆယ်ရေးလုပ်ငန်းများ ဆောင်ရွက်လျက်ရှိရာ ကလေး နှစ်ဦးအပြင် အမျိုးသမီးရုပ်အလောင်း ရှစ်လောင်းတွေ့ရှိသည်ဟု ဆိုသည်။
ငလျင်ဘေးကြောင့် ဧပြီ ၆ရက်ညနေအထိ စာရင်းအရ သေဆုံးသူ ၃၅၆၄ဦး သေဆုံးပြီး၊ ၅၀၁၂ဦး ဒဏ်ရာရရှိကာ ပျောက်ဆုံးနေသူ ၂၁၀ဦးရှိကြောင်း စစ်ကောင်စီက ထုတ်ပြန်ထားသည်။
