ကဖေး/People’s Spring
စစ်ကိုင်းတိုင်း၊ ကနီမြို့ နတ်လာပို့မြောက်ရွာကို ယနေ့(ဖေဖော်ဝါရီ ၁၁ရက်) နံနက် အစောပိုင်းတွင် စစ်ကောင်စီက စက်တပ်လေထီးဖြင့် လေကြောင်းမှ တိုက်ခိုက်ရာ အရပ်သားနှစ်ဦးသေဆုံးပြီး နှစ်ဦး ဒဏ်ရာရသွားသည်။
ယမန်နေ့ည သန်းခေါင်ကျော်အချိန်မှာ တိုက်ခိုက်ခြင်းဖြစ်ပြီး လေးဦးဒဏ်ရာရသည့်အနက် နှစ်ဦးသေဆုံးသွားကြောင်း ဒေသခံတစ်ဦးက ပြောသည်။
” အိမ်ပေါ်ကို ပစ်ချတာ။ ဒဏ်ရာရသူတွေကို ဆေးခန်းပို့တုန်း နှစ်ဦးက လမ်းမှာတင်သေဆုံးတာ”ဟု ဒေသခံတစ်ဦးကပြောသည်။
Public Service Announcement
သေဆုံးသူနှစ်ဦးမှာ အသက် ၅၀ အရွယ်ခန့် ဦးအေးလင်းနှင့် ဒေါ်မုန်းတို့ဖြစ်ကြောင်း သတင်း ရရှိသည်။
ဖေဖော်ဝါရီ ၇ ရက်ကလည်း ကနီမြို့နယ်အတွင်း စစ်ကောင်စီက စက်တပ်လေထီးနှစ်စီးဖြင့် လေကြောင်းမှတိုက်ခိုက်ရာ အရပ်သားနှစ်ဦးသေဆုံးပြီး နေအိမ်အချို့ပျက်စီးခဲ့သည်။
ကနီမြို့နယ်သည် မုံရွာမြို့အခြေစိုက် အနောက်မြောက်တိုင်းစစ်ဌာနချုပ်(နမခ)နှင့် မဝေးသောကြောင့် ယခုဖြစ်စဉ်မျိုးမကြာခဏကြုံတွေ့လာနိုင်ပြီး ဒေသခံပြည်သူများအနေဖြင့် အထူးသတိပြုနေထိုင်ကြရန် ကနီမြို့နယ်ပြည်သူ့ကာကွယ်ရေးအဖွဲ့က သတိပေးထားသည်။
