People’s Spring
စစ်တပ်လက်အောက်ခံ ကရင်နယ်ခြားစောင့်တပ် (BGF)ရဲ့ ခေါင်းဆောင် ၃ ယောက်ကို ဖမ်းဝရမ်း ထုတ်နိုင်ဖို့ ထိုင်းအထူးစုံစမ်းရေးဌာန (DSI)က ကြိုးစားနေကြောင်း ထိုင်းမီဒီယာတွေက ဖော်ပြခဲ့ပါတယ်။
DSIက ထိုင်းနိုင်ငံ တစ်ဖက်ခြမ်း၊ မြဝတီမြို့နယ်ထဲမှာ လှုပ်ရှားနေတဲ့စစ်ကောင်စီလက်အောက်ခံ BGFဟာ လူမှောင်ခိုမှု တစ်ခုနဲ့ ဆက်နွှယ်ကြောင်း အထောက်အထားတွေကို ထိုင်းအစိုးရ ရှေ့နေတွေဆီ ဖေဖော်ဝါရီ ၁၀ ရက်နေ့မှာ တင်ပြထားခဲ့ကြောင်း သိရပါတယ်။
အဲဒီ အထောက်အထားတွေကို အခြေခံပြီး BGF ခေါင်းဆောင်တွေဖြစ်တဲ့ ဗိုလ်မှူးကြီး စောချစ်သူ၊ ဒုတိယ ဗိုလ်မှူးကြီး စောမုတ်သုန်၊ ဗိုလ်မှူး စောတင်ဝင်းတို့ကို ဖမ်းဝရမ်း ထုတ်နိုင်ရေး ကိစ္စကို ညှိနှိုင်းဆွေးနွေးဖို့ DSIက စီစဉ်ထားကြောင်း Thai Enquirer သတင်းဌာနက ဖော်ပြခဲ့ပါတယ်။
Public Service Announcement
မြန်မာဖက်ခြမ်းက အွန်လိုင်းငွေလိမ်ဂိုဏ်း (ကျားဖြန့်) လုပ်ငန်းတွေမှာ အဓမ္မ ခိုင်းစေ ခံခဲ့ရတဲ့ လူကုန်ကူးမှုသားကောင် အိန္ဒိယ နိုင်ငံသားတွေကို ကယ်ဆယ်ခဲ့တဲ့ ဖြစ်စဉ်အပြီး DSIရဲ့ စုံစမ်းရေး အရာရှိတွေဟာ BGF ခေါင်းဆောင်တွေအပေါ် ဖမ်းဝရမ်း ထုတ်နိုင်မယ့် အမှုကို ထဲထဲဝင်ဝင် စတင် တည်ဆောက်ခဲ့တာ ဖြစ်ပါတယ်။
ထိုင်းရဲ့ အဓိက အတိုက်အခံ ပါတီတစ်ခုဖြစ်တဲ့ ပြည်သူ့ပါတီရဲ့ ဒုတိယ အကြီးအကဲ ရန်ဆီမန်ရုမ်းက ထိုင်းနယ်နိမိတ်အလွန် မြန်မာပိုင်နက်ထဲမှာ အခြေစိုက်တဲ့ ကျားဖြန့် လုပ်ငန်းတွေကို ထိထိရောက်ရောက် ဖြိုခွင်းဖို့ ထိုင်းအစိုးရဆီ တောင်းဆိုခဲ့တဲ့နောက် အခု အခြေအနေတွေ ဖြစ်ပေါ်လာတာပါ။ ရန်ဆီမန်က အစိုးရ အနေနဲ့ ရှိရင်းစွဲထက် ပိုပြတ်သားတဲ့ အရေးယူမှုတွေ မလုပ်နိုင်ဘူးဆိုရင် ကျားဖြန့် ပြဿနာက ပြီးဆုံးမှာ မဟုတ်ဘူးလို့ သတိပေးထားခဲ့ပါတယ်။
ရန်ဆီမန်ဟာ အရင်ကလည်း BGFပိုင် ရွှေမြစ်သောင်ရင်း (SMTY) စက်မှုနဲ့ ကုန်ထုတ်လုပ်ငန်းဟာ မူးယစ်ဆေးဝါး မှောင်ခိုမှုတွေနဲ့ ဆက်စပ်နိုင်တယ်လို့ ထောက်ပြခဲ့မှုပေမယ့် နောက်ဆက်တွဲ စုံစမ်းစစ်ဆေးမှုတွေတော့ ဖြစ်မြောက်မလာခဲ့ပါဘူး။ SMTYဟာ မြဝတီမှာ BGF စစ်နယ်မြေ ၂
ရဲ့ အကြီးအကဲ ဗိုလ်မှူး စောတင်ဝင်း ပိုင်ဆိုင်တဲ့ ကုမ္ပဏီပါ။
ရန်ဆီမန်က BGFဟာ ထိန်းချုပ်နယ်မြေ မြဝတီ မြို့နယ်ထဲမှာ ကျားဖြန့်ဂိုဏ်းတွေ လုပ်ငန်း လည်ပတ်နိုင်အောင် မြေနေရာတွေ ငှားရမ်းပေးခဲ့ပြီး အဲဒီ လုပ်ငန်းတွေက ထိုင်းပြည်သူတွေသာ မကဘဲ တစ်ကမ္ဘာလုံးမှာ ထိခိုက်နစ်နာ ဆုံးရှုံးမှုတွေ ဖြစ်ပေါ်စေခဲ့တယ်လို့ စွပ်စွဲ ပြောကြားခဲ့ပါတယ်။ ကျားဖြန့် လုပ်ငန်းတွေဟာ ငွေကြေး လိမ်လည်ရုံ သက်
သက် မဟုတ်ဘဲ လူကုန်ကူးမှု သားကောင်တွေကို ကျေးကျွန်တွေအဖြစ် အဓမ္မ ခိုင်းစေမှုတွေပါ ရှိနေတယ်လို့ သူက ထောက်ပြခဲ့ပါတယ်။ရန်ဆီမန်က စောချစ်သူဟာ ထိုင်းအာဏာပိုင် တ
ချို့နဲ့ အချိတ်အဆက်ရှိပြီး လာဘ်ပေးလာဘ်ယူ ကိစ္စတွေပါ ရှုပ်ထွေးနေနိုင်ကြောင်း၊ စောချစ်သူက အဖမ်းခံရမယ်ဆိုရင် အဲဒီ အဆက်အသွယ် အားလုံးကိုပါ ဖော်ကောင်လုပ်လာနိုင်ကြောင်းလည်း ပြောပါတယ်။ ဒါဟာ ကျားဖြန့်ဂိုဏ်းတွေကို ဖြိုခွင်းရုံသာ မကဘဲ ထိုင်းအာဏာပိုင် အဖွဲ့အစည်းထဲက အဂတိ ကိစ္စတွေကိုပါ ဖော်ထုတ်နိုင်မယ့် အခွင့်အလမ်းကောင်း တစ်ခုအဖြစ် ရန်ဆီမန်က ထောက်ခံပြီး ဖမ်းဝရမ်းကိစ္စ အမြန်ဆုံး အကောင်အထည်ဖော်ဖို့ အစိုးရကို တိုက်တွန်းသွားခဲ့ပါတယ်။
၂၀၁၂ ခုနှစ် ဧပြီလတုန်းကလည်း ထိုင်းအစိုးရက DKBA( ကလိုထူးဘော) အဖွဲ့ခေါင်းဆောင် ဗိုလ်ချုပ်စောလားပွယ် (ခေါ်) ဦးနှုတ်ခမ်းမွေးကို မူးယစ်ဆေးဝါးထုတ်လုပ်တယ်ဆိုပြီး မူးယစ်ရာဇာလိုစွပ်စွဲပြီး ဖမ်းဝရမ်းထုတ်ပြီး ဖမ်းမိရင် ဆုငွေ ဘတ်တစ်သန်း ချီးမြှင့်မယ်လို့ ဆုငွေထုတ်ခဲ့ဖူးပါတယ် ။ ဗိုလ်ချုပ်စောလားပွယ်က မဟုတ်မမှန်စွပ်စွဲချက်ဖြစ်ပြီး ထိုင်းအစိုးရပြန်ဖြေရှင်းပေးဖို့ သတင်းစာရှင်းလင်းပွဲလုပ်ပြီး ပြောဆိုခဲ့ပါတယ်။အဲဒီဖြစ်စဥ်တုန်းကတော့ ဗိုလ်ချုပ်စောလားပွယ်ဟာ ထိုင်းက ဖမ်းဝရမ်းအထုတ်ခံရပေမယ့်အဖမ်းတော့မခံခဲ့ရပါဘူး။
ထိုင်းအစိုးရဟာ ကျားဖြန့်နှိမ်နင်းရေးအတွက် တရုတ်အစိုးရရဲ့ ဖိအားပေးမှုကို ကြုံနေရတယ်လို့ လေ့လာစောင့်ကြည့်သူတွေကပြောပါတယ်။
