ရဲခေါင်း/People’s Spring
ညောင်ရွှေမြို့နယ်ရှိ စစ်ဘေးရှောင်စခန်းအား စစ်ကောင်စီတပ်ပစ်ခတ်သည့် မပေါက်ကွဲသေးသော ၁၂၀ မမ စိန်ပြောင်းဗုံးသီးများအား ရှင်းလင်းခဲ့ကြောင်း အင်းလေးပြည်သူ့ကာကွယ်ရေးတပ်ဖွဲ့ (IPDF)တာဝန်ရှိသူ ကိုအင်းသွေးနီက လူထုနွေဦးသို့ ပြောသည်။
ဇန်နဝါရီ ၁၇ ရက်က ရှမ်းပြည်တောင်ပိုင်း ၊ ညောင်ရွှေမြို့နယ်၊ ဘုရားတောင်လွယ်နွဲ့ရှိ စစ်ရှောင်စခန်းအား စစ်ကောင်စီတပ်နှင့် ပအိုဝ်းပြည်သူ့စစ်(PNA)တို့က လက်နက်ကြီးများအသုံးပြု၍ ပစ်ခတ်ခဲ့သည်။
ထို့ကြောင့် ရေပူကျေးရွာမှ စစ်ရှောင် ၁၄ဦး ထိခိုက်ဒဏ်ရာရကာ (၆)နှစ်အရွယ် မိန်းကလေးတစ်ဦး ၊ အသက်(၅၀)ကျော်အရွယ်ရှိ ဦးစိုင်းနှင့် (၂၆)နှစ်ဝန်းကျင်ရှိ မောင်သိန်းအောင်တို့ လက်နက်ကြီးစ ထိမှန်ကာ သေဆုံးခဲ့ရသည်။
Public Service Announcement
စစ်ကောင်စီတပ်ပစ်သည့် မပေါက်ကွဲဘဲ ကျန်နေသည့် စိန်ပြောင်းဗုံးသီးများကို ရှင်းလင်းနေစဥ်(ဓာတ်ပုံ − IPDF) 
စစ်ကောင်စီတပ်ပစ်သည့် မပေါက်ကွဲဘဲ ကျန်နေသည့် စိန်ပြောင်းဗုံးသီးများကို ရှင်းလင်းနေစဥ်(ဓာတ်ပုံ − IPDF) 
စစ်ကောင်စီတပ်ပစ်သည့် မပေါက်ကွဲဘဲ ကျန်နေသည့် စိန်ပြောင်းဗုံးသီးများကို ရှင်းလင်းနေစဥ်(ဓာတ်ပုံ − IPDF)
“၁၇ ရက်နေ့က ဘုရားတောင်နဲ့ ရေပူရွာဘက်ကို လက်နက်ကြီးနဲ့ပစ်တယ်။အလုံးရေကို အတိအကျမသိရဘူး။ပစ်တာတော့ အများကြီးပဲ။သုံးကြိမ်ခွဲ ပစ်တာ။မကွဲဘဲ ကျန်သေးတဲ့ဗုံးသီးက ဘုရားတောင်နဲ့ရေပူ ကြားမှာ သုံးလုံးလောက်တူးဖော်တွေ့ရှိခဲ့တယ်”ဟု ကိုအင်းသွေးနီက ပြောသည်။
ယခင်ကလည်း မပေါက်ကွဲဘဲ ကျန်နေသည့် စစ်ကောင်စီတပ်၏ လက်နက်ကြီးကျည်များကို ရှစ်ကြိမ်ထက်မနည်း ရှင်းလင်းနိုင်ခဲ့ကြောင်းလည်း ၎င်းက အသိပေးသည်။
“ရှင်းလင်းတာတော့ ပြည်သူတွေ တောင်သူတွေ သူတို့ရဲ့အသက်အန္တရာယ်ကို အဓိကထားပြီးကာကွယ်ဖို့ လုပ်တာ။အခက်အခဲတော့အများကြီးရှိတယ်။ဒါပေမယ့် နဂိုကတည်းက ပြည်သူအတွက် အသက်ပေးဖို့ ကတိပြုပြီးသားပဲလေ”ဟု အထက်ပါတာဝန်ရှိသူက ပြောသည်။
၂၀၂၄ တစ်နှစ်တာအတွင်း အာဏာသိမ်းစစ်ကောင်စီတပ် တိုက်ခိုက်မှုကြောင့် ရှမ်းပြည်တောင်ပိုင်း၌ သေဆုံးသည့် အရပ်သားပြည်သူ ၁၃၀ ဦးခန့်တွင် ၆၀ ရာခိုင်နှုန်းသည် လေကြောင်းနှင့် လက်နက်ကြီးတိုက်ခိုက်မှုများကြောင့်ဟု ပအိုဝ်းလူငယ်အစည်းအရုံးက မကြာသေးမီရက်ပိုင်းက ထုတ်ပြန်ထားသည်။
