ဇေအောင်/People’s Spring
စစ်ကောင်စီတပ်၏ ပစ်ခတ်သတ်ဖြတ်မှုများကြောင့် စက်တင်ဘာအတွင်း အမျိုးသမီး ၆၀ ကျော် သေဆုံးခဲ့ကြောင်း မြန်မာ့အမျိုးသမီးသမဂ္ဂ(Burmese Womens Union)က အသိပေးထုတ်ပြန်သည်။
စက်တင်ဘာ ၁ ရက်မှ ၃ဝရက်အတွင်း စစ်ကောင်စီ၏ ပစ်ခတ်သတ်ဖြတ်မှုကြောင့် နိုင်ငံတဝှမ်းမှ အမျိုးသမီး ၆၃ ဦး အသက်ဆုံးရှုံးခဲ့ရပြီး လေကြောင်းတိုက်ခိုက်ခံရမှုကြောင့် ၄၄ ဦး၊
Public Service Announcement
လက်နက်ကြီးပစ်ခတ်မှုကြောင့် ၈ ဦး၊ သတ်ဖြတ်ခံရမှုကြောင့် ၆ ဦး၊ ဒရုန်းတိုက်ခိုက်မှုကြောင့် ၂ ဦး၊ မီးရှို့သတ်ဖြတ်ခံရမှုကြောင့် ၂ ဦး၊ ဆေးကုသခွင့်မရမှုကြောင့် တစ်ဦး သေဆုံးခဲ့ကြောင်း မြန်မာ့အမျိုးသမီးသမဂ္ဂ(Burmese Womens Union)က အောက်တိုဘာ၄ရက်ကထုတ်ပြန်သည်။
ထို့အပြင် အထက်ပါဖြစ်စဥ်များတွင် အမျိုးသမီး ၆၂ ဦး ထိခိုက်ဒဏ်ရာများရရှိခဲ့ပြီး အဓမ္မပြုကျင့်ခံရသည့် အမျိုးသမီး ၆ ဦးလည်း ပါဝင်ကြောင်း Burmese Womens Unionက အသိပေးသည်။
သေဆုံးသူအမျိုးသမီးများအနက် ရှမ်းပြည်နယ်မှ ၂၁ ဦးဖြင့် အများဆုံးဖြစ်ပြီး မန္တလေးတိုင်းမှ ၁၅ဦး၊ စစ်ကိုင်းတိုင်းမှ ၈ဦး သေဆုံးခဲ့ကြောင်း၊ အခြားသေဆုံးသူများမှာ ပဲခူး၊ မကွေး၊ ရခိုင်၊ မွန်၊ကချင်နှင့် တနင်္သာရီတိုင်းတို့မှဖြစ်ကြောင်း Burmese Womens Unionက ထပ်မံအသိပေးသည်။
မန္တလေးတိုင်း၊ မြင်းခြံမြို့နယ်တွင် စက်တင်ဘာ ၂၂ ရက် နံနက်ပိုင်းက ခြေဆေးကျေးရွာအား စစ်ကောင်စီတပ်က ဂျက်ဖိုက်တာဖြင့် ၂ ကြိမ်တိုက်ခိုက်ခဲ့ရာ ယာခင်းထဲပေါင်းနှုတ်နေသည့် အမျိုးသမီးတစ်ဦး သေဆုံးပြီး ကိုယ်ဝန်ဆောင်အမျိုးသမီးတစ်ဦးအပါအဝင် သုံးဦး ဒဏ်ရာရရှိခဲ့ကြောင်း ဒေသခံများက ပြောသည်။
“တိုက်ပွဲမရှိဘဲ ပစ်တာ။နှစ်ကြိမ်ပစ်တာ ဘယ်အကြိမ်မှာထိတယ်တော့မသိဘူး”ဟု ဒေသခံတစ်ဦးက ပြောသည်။
ထို့အပြင် စက်တင်ဘာအတွင်း အမျိုးသမီး ၅ ဦးထက်မနည်း စစ်ကောင်စီတပ်က ဖမ်းဆီးသွားခဲ့ကြောင်း Burmese Womens Union၏ ထုတ်ပြန်ချက်တွင် ဖော်ပြသည်။ မြေပြင်တွင် အထက်ပါအရေအတွက်ထက်ပိုများနိုင်ကြောင်းလည်း BWUက ထုတ်ပြန်ထားသည်။
