တနင်္သာရီတိုင်း ပုလောမြို့နယ်၊ ကဒဲကျေးရွာတွင် တိုက်ပွဲဖြစ်ပွားပြီးနောက် စစ်ကောင်စီတပ်က ဘုန်းကြီး ကျောင်းအပါအဝင် နေအိမ်များကို မီးရှို့ဖျက်ဆီးခဲ့ကြောင်း မြိတ်ခရိုင် PDF တပ်ရင်း (၁)က ပြောသည်။
ဖေဖော်ဝါရီ ၁၅ ရက် ည ၇နာရီခန့်တွင် ကဒဲကျေးရွာအနီးရောက်ရှိလာသည့် စစ်ကောင်စီတပ်ကို မိုင်းဆွဲတိုက်ခိုက်သည့်အပြင် လက်နက်ငယ်များဖြင့်ပါ ပစ်ခတ်တိုက်ခိုက်ခဲ့သည်ဟု မြိတ်ခရိုင် တပ်ရင်း (၁)က ပြောသည်။
“ထိခိုက်သေဆုံးရှိတယ်ဗျ။ ဒီကောင်တွေ မိုင်းထိထားတယ်။ အနည်းဆုံး ရှစ်ဦးလောက်မှန်းတယ်။ အတည်တော့ မပြုနိုင်သေးဘူး”ဟု မြိတ်ခရိုင် PDF တပ်ရင်း (၁)မှ ပြန်ကြားရေးတာဝန်ခံက People’s Spring သို့ ပြောသည်။
အဆိုပါတိုက်ပွဲဖြစ်ပွားပြီးနောက် ဖေဖော်ဝါရီ ၁၆ရက်တွင် ကဒဲကျေးရွာမှ ဘုန်းကြီးကျောင်းတစ်ကျောင်းအပါအဝင် နေအိမ်အလုံး (၅၀)ခန့်အား စစ်ကောင်စီတပ်က မီးရှို့ဖျက်ဆီးခဲ့ရာ ဒေသခံပြည်သူများနှင့် တော် လှန်ရေးရဲဘော်များပူးပေါင်းပြီး မီးငြှိမ်းသတ်ခဲ့ရကြောင်း ၎င်းပြန်ကြားရေးတာဝန်ခံက ဆက်ပြောသည်။
လတ်တလော စစ်ရေးအခြေအနေများအရ စစ်ကောင်စီတပ်နှင့် အချိန်မရွေးတိုက်ပွဲများထပ်မံဖြစ်ပွားလာနိုင်သောကြောင့် ပြည်သူများ သတိပြုနေထိုင်ကြရန် မြိတ်ခရိုင် PDF တပ်ရင်း (၁)က အသိပေးထားသည်။
