အမေရိကန် စစ်သားတွေကို လက်မခံဖို့ ဒေသတွင်း ဟိုတယ်တွေကို အီရန်သတိပေး

အမေရိကန် စစ်သားတွေကို တည်းခိုခွင့် မပေးဖို့ ဒေသတွင်း နိုင်ငံတွေရဲ့ ဟိုတယ်တွေကို အီရန်က သတိပေးလိုက်ပါတယ်။

အဲဒီတားမြစ်ချက်ကို မလိုက်နာရင် နောက်ဆက်တွဲ ကြုံလာမယ့် အကျိုးဆက်တွေအပေါ် တာဝန်မယူဘူးလို့လည်း အီရန်က ခြိမ်းခြောက်ခဲ့ပါတယ်။ အီရန်ရဲ့ သတိပေးမှုဟာ ဘာရိန်းနဲ့ အာရပ်စော်ဘွားများ ပြည်ထောင်စု (ယူအေအီး)တို့လို နိုင်ငံတွေအပေါ် အဓိက ရည်ရွယ်ထားပါတယ်။

အီရန်အစိုးရက တစ်စိတ်တစ်ပိုင်း ပိုင်ဆိုင်တဲ့ Fars သတင်းဌာနက အမေရိကန် စစ်သားတွေကို တည်းခိုခွင့် ပြုထားတဲ့ ဟိုတယ်တွေဟာ အီရန် လက်နက်ကိုင် တပ်တွေအတွက် တရားဝင် ပစ်မှတ်ထားခွင့် ရှိလာမယ်လို့ ပြောပါတယ်။

အီရန်စစ်ပွဲတလျှောက် ဒေသတွင်း နိုင်ငံတွေထဲက အမေရိကန် စစ်စခန်းတချို့ကို အီရန်ဒုံးကျည်နဲ့ ဒရုန်းတွေ ထိမှန်ပြီး ထိခိုက်ပျက်စီးမှုတွေ ရှိခဲ့ပါတယ်။ အဲဒိနောက် အမေရိကန် တပ်ဖွဲ့ဝင် တချို့ဟာ ဟိုတယ်တွေမှာ ပြောင်းရွှေ့နေထိုင်နေကြောင်း Farsက ဆိုပါတယ်။

Public Service Announcement

ဘာရိန်းနဲ့ ယူအေအီးတို့မှာ အရပ်သားတွေ တည်းခိုနေတဲ့ ဟိုတယ်တွေ ဖြစ်နေတဲ့တိုင် အမေရိကန် စစ်သားတွေ ရှိနေတယ်ဆိုရင် အီရန်ကတော့ စစ်ရေးပစ်မှတ်လို့ပဲ သတ်မှတ်လိမ့်မယ်လို့ Farsက သတိပေးထားပါတယ်။

အီရန် နိုင်ငံခြားရေး အဘက်စ် အာရက်ချီကလည်း အမေရိကန် စစ်သားတွေဟာ စခန်းတွေကို စွန့်ခွာထွက်ပြေးပြီး အရပ်သားတွေကြား ရောနှောနေတာဟာ ပြည်သူတွေကို လူသားဒိုင်းအဖြစ် အသုံးချတဲ့ အဓိပ္ပါယ်နဲ့ တူတူပဲလို့ စွပ်စွဲ ဝေဖန်ခဲ့ပါတယ်။

ပင်လယ်ကွေ့ ပူးပေါင်းဆောင်ရွက်ရေး အဖွဲ့ (GCC) အဖွဲ့ဝင် နိုင်ငံတွေမှာရှိတဲ့ စစ်စခန်းတွေကနေ ထွက်ပြေးလာတဲ့ အမေရိကန် စစ်သားတွေဟာ ဟိုတယ်တွေနဲ့ ရုံးခန်းတွေထဲ ဝင်ပုန်းနေတယ် ဆိုတာဟာ GCC နိုင်ငံတွေရဲ့ ပြည်သူတွေကို လူသားဒိုင်းတွေအဖြစ် သုံးစွဲနေတာဖြစ်တယ်လို့ အာရက်ချီက မတ်လ ၂၆ ရက်နေ့မှာ လူမှုကွန်ရက် မီဒီယာ Xပေါ် ရေးသားသွားခဲ့ပါတယ်။

ကိုးကား: Fars, Xinhua