ယူကရိန်းကို Tomahawk ဒုံးကျည်တွေ အမေရိကန် ထောက်ပံ့ရင် ရုရှားနဲ့ ဆက်ဆံရေး ထိခိုက်လိမ့်မယ်လို့ ပူတင်ပြော

ယူကရိန်းအတွက် တာဝေးပစ် ဒုံးကျည်တွေ ထောက်ပံ့မယ်ဆိုရင် နှစ်နိုင်ငံ ဆက်ဆံရေးကို ထိခိုက်သွားစေလိမ့်မယ်လို့ ရုရှားသမ္မတ ဗလာဒီမာ ပူတင်က အမေရိကန်ကို ရည်ရွယ်ပြီး သတိပေး ပြောကြားသွားပါတယ်။

ဒုတိယ သမ္မတ ဂျိမ်းစ်ဒေးဗစ် ဗန့်စ် အပါအဝင် အမေရိကန် အစိုးရ ထိပ်ပိုင်း အရာရှိတွေက သမ္မတ ဒေါ်နယ်လ် ထရမ့်အနေနဲ့ ယူကရိန်းဆီ အမေရိကန်ရဲ့ စွမ်းဆောင်ရည်မြင့် တာဝေးပစ် Tomahawk ခရုစ်ဒုံးကျည်တွေ ထောက်ပံ့ဖို့ စဉ်းစားနေကြောင်း ပြောကြားထားပါတယ်။

ရုရှားနိုင်ငံ၊ ဆိုချီမြို့မှာ အောက်တိုဘာ ၂ ရက်နေ့ နိုင်ငံတကာ နိုင်ငံခြားရေး မူဝါဒဆိုင်ရာ ပညာရှင်တွေနဲ့ တွေ့ဆုံချိန်မှာ အမေရိကန် အနေနဲ့ ယူကရိန်းကို Tomahawk ဒုံးကျည်တွေ ပံ့ပိုးခဲ့မယ်ဆိုရင် လက်ရှိ စစ်ပွဲရဲ့ တင်းမာမှုတွေကို မြင့်တက်သွားစေရုံသာ ရှိမှာဖြစ်ပြီး အကျိုးဖြစ်ထွန်းမှုတော့ တွေ့ရမှာ မဟုတ်ဘူးလို့ ပူတင်က ဆိုပါတယ်။

Tomahawkတွေဟာ ရုရှားအတွက် ခြိမ်းခြောက်မှုအသစ် ဖြစ်လာမှာ သေချာပေမယ့်လည်း ရုရှားရဲ့ လေကြောင်း ကာကွယ်ရေး စနစ်တွေက မကြာခင်မှာပဲ အသားတကျ ကိုင်တွယ်လာနိုင်မှာ သေချာတယ်လို့ သူက မှတ်ချက်ပေးခဲ့ပါတယ်။

Public Service Announcement

Tomahawkတွေကလည်း စစ်မြေပြင်မှာ ရုရှားက အသာစီး ရနေတဲ့ အရှိတရားကို ပြောင်းလဲစေမှာ မဟုတ်ကြောင်း၊ ဒါပေမဲ့ ယူကရိန်းဆီ အဲဒီဒုံးကျည်တွေကို အမေရိကန်က ပေးပို့ရင် ရုရှားနဲ့ အမေရိကန် ဆက်ဆံရေးမှာပဲ ထိခိုက်မှုတွေ ဖြစ်လာစေနိုင်ကြောင်း ပူတင်က ဆိုပါတယ်။

အိမ်နီးချင်း နိုင်ငံလေး တစ်ခုအပေါ် ၃ နှစ်ခွဲလောက် စစ်တိုက်နေတာတောင် မနိုင်တဲ့အတွက် ရုရှားကို စက္ကူကျား ဖြစ်နေပြီလို့ ထရမ့်က ပြောဆိုခဲ့ဖူးတာနဲ့ ပတ်သက်ပြီး ပူတင်ကို သဘောထား မေးမြန်းကြတဲ့အခါ သူက တကယ်တမ်းမှာ ရုရှားဟာ NATOက အလုံးအရင်း ကျောထောက်နောက်ခံ ကူညီနေတဲ့ ယူကရိန်းနဲ့ တိုက်နေရတာ ဖြစ်တယ်လို့ ထောက်ပြခဲ့ပါတယ်။ တကယ်တမ်းဆိုရင် ရုရှားကသာ နိုင်ငံတွေ အများကြီး စုထားတဲ့ NATO မဟာမိတ်နဲ့ ရင်ဆိုင် တိုက်နေရတဲ့ သဘောဖြစ်ကြောင်း၊ ဒါတောင်မှ ရုရှားက ရှေ့ဆက်တိုးနေဆဲ၊ စစ်ရေး ရည်မှန်းချက်တွေအတွက် ယုံကြည်မှု ပြည့်ဝနေဆဲဖြစ်ကြောင်း၊ ဒီအခြေအနေမျိုးမှာ ရုရှားကို စက္ကူကျားလို့ပြောရင် NATOရဲ့ အဆင့်က ဘာဖြစ်သွားမလဲဆိုတာ မှန်းကြည့်လို့ရကြောင်း ပူတင်က တုံ့ပြန်ခဲ့ပါတယ်။

အိမ်ဖြူတော်ကတော့ ပူတင်ရဲ့ မှတ်ချက်တွေနဲ့ ပတ်သက်ပြီး ဘာမှ မပြောသေးပါဘူး။ ပူတင်က ထရမ့်အနေနဲ့ ရုရှားနဲ့ ယူကရိန်းကြား စစ်ရပ်စဲရေးအတွက် အမှန်တကယ် အားထုတ်နေတယ်လို့တော့ ချီးကျူးခဲ့ပြီး ဩဂုတ်လတုန်းက အမေရိကန်ရဲ့ အလာစကာ ပြည်နယ်မှာ သူနဲ့ ထရမ့်တို့ တွေ့ဆုံ ဆွေးနွေးခဲ့မှုတွေက အပြုသဘော ဆောင်ခဲ့ကြောင်း ပြောကြားသွားပါတယ်။

ယူကရိန်း အကျပ်အတည်းနဲ့ ပတ်သက်ပြီး ဖြေရှင်းနိုင်မယ့် ဖြစ်နိုင်ခြေ နည်းလမ်းတွေကို ဝိုင်းစဉ်းစားခဲ့တယ် ဆိုတာက ကောင်းတဲ့ကိစ္စ ဖြစ်ကြောင်း၊ ထရမ့်နဲ့ ဆွေးနွေးရတာကလည်း သက်တောင့်သက်သာ ရှိခဲ့ကြောင်း ပူတင်က ပြောဆိုသွားခဲ့ပါတယ်။

ကိုးကား: CTV