မေ ၂၃၊ ၂၀၂၆။ ထားမြတ်/People’s Spring
တနင်္သာရီမြို့နယ် ကျွဲထိန်ကုန်းကျေးရွာကို စစ်တပ်ပစ်ခတ်တဲ့ လက်နက်ကြီး ကျရောက်ပေါက်ကွဲပြီး ပြည်သူ ၁ဦးသေဆုံးကာ ကလေးငယ်အပါအဝင် ပြည်သူ ၂ဦး ဒဏ်ရာရခဲ့တယ်လို့ ကရင်အမျိုးသားအစည်းအရုံး(KNU)က သတင်းထုတ်ပြန်ပါတယ်။
KNU မြိတ်ထားဝယ်ခရိုင် တပ်မဟာ(၄)နယ်မြေဖြစ်တဲ့ တနင်္သာရီမြို့နယ်က ကျွဲထိန်ကုန်းကျေးရွာကို မေလ ၂၁ရက်မှာ စစ်တပ်ရဲ့ ခမရ(၅၆၁) တပ်ရင်းက လက်နက်ကြီးနဲ့ ပစ်ခတ်ခဲ့တာလို့ ဆိုပါတယ်။ အဲဒီလို ပစ်ခတ်လို့ အသက် (၄၀)အရွယ် အမျိုးသား ၁ဦး သေဆုံးကာ (၅)နှစ်အရွယ် ကလေးငယ် အပါအဝင် ၂ဦး ဒဏ်ရာရခဲ့တယ်လို့ ဖော်ပြထားပါတယ်။
စစ်တပ်က အရပ်သား ပြည်သူတွေကို ပစ်မှတ်ထား နေ့စဉ်တိုက်ခိုက်နေလို့ KNU နယ်မြေအတွင်း အရပ်သားပြည်သူတွေ စိုးရိမ်ထိတ်လန့်ကြောက်ရွံ့မှုတွေနဲ့ အသက်ရှင် နေထိုင်နေကြရတယ်လို့လည်း ထုတ်ပြန်ပါတယ်။
Public Service Announcement
တနင်္သာရီမြို့နယ်မှာ တော်လှန်ရေးပူးပေါင်းတပ်တွေနဲ့ စစ်တပ်အကြား တိုက်ပွဲတွေ မကြာခဏ ဖြစ်ပွားလျက်ရှိပါတယ်။ အထူးသဖြင့် ခမရ(၅၆၁)တပ်ရင်း အခြေစိုက်ရာ နဲ့ ဆက်စပ်ဒေသတွေမှာ စစ်တပ်ကို PDF တပ်တွေက တိုက်ခိုက်မှု မကြာခဏ ရှိခဲ့ပါတယ်။
မေလ ၁၄ရက်ကလည်း ခမရ(၅၆၁)တပ်ရင်း ဦးတည်လာတဲ့ စစ်ယာဉ်တန်းကို PDF က ကြားဖြတ်တိုက်ခိုက်ခဲ့သလို လုံခြုံရေးယူပေးတဲ့ စစ်သားတွေကိုလည်း တိုက်ခိုက်ခဲ့ကြောင်း PDFမြိတ်ခရိုင် တပ်ရင်း(၂)က အသိပေး ထုတ်ပြန်ထားပါတယ်။
