ဧပြီ-၇၊ ၂၀၂၆။ထားမြတ်/People’s Spring
ကရင်အမျိုးသားအစည်းအရုံး(KNU) မြိတ်ထားဝယ်ခရိုင် တပ်မဟာ(၄)နယ်မြေ ပုလော (လယ်မူလား)မြို့နယ်မှာ အာဏာသိမ်းစစ်တပ် လက်နက်ကြီးကြောင့် အရပ်သားပြည်သူ ၂ဦး သေဆုံးခဲ့ကြောင်း KNU မြိတ်ထားဝယ်ခရိုင်က ထုတ်ပြန်ပါတယ်။
ဧပြီ ၇ရက်မနက်က ပုလောမြို့နယ် ပလောက် ကျေးရွာအုပ်စု ပြည်ခြားကျေးရွာကို စစ်ကောင်စီတပ်က လက်နက်ကြီးနဲ့ ပစ်ခတ်လို့ အရပ်သား ပြည်သူသေဆုံးမှု နေအိမ်ပျက်စီးမှုတွေ ဖြစ်ခဲ့တာလို့ ဆိုပါတယ်။
စစ်ကောင်စီရဲ့အမြောက်တပ် (၂၈၀)တပ်ရင်းက လက်နက်ကြီးတွေနဲ့ ပစ်ခတ်ရ ကျေးရွာအတွင်းက အိမ် ၃လုံး မီးလောင်ပျက်စီးခဲ့တယ်လို့ ထုတ်ပြန်ပါတယ်။
Public Service Announcement
လက်နက်ကြီးကြောင့် သေဆုံးသွားသူနှစ်ဦးဟာ သားအဖ ဖြစ်တယ်လို့ ဒေသခံသတင်းရင်းမြစ်က ပြောပါတယ်။
သူတို့က စစ်တပ် လက်နက်ကြီးရန်ကြောင့် နေအိမ်အောက် အကာအကွယ်မှာ ပုန်းခိုနေစဉ် နေအိမ်ကို လက်နက်ကြီးကျရောက်ပေါက်ကွဲပြီး သေဆုံးခဲ့ရတာလို့ ပြောပါတယ်။
ဒေသတွင်း စစ်ရေးအခြေအနေတွေကိုတော့ မေးမြန်းစုံစမ်းနေဆဲဖြစ်ပါတယ်။
စစ်ကောင်စီတပ်ဟာ မတ်လ ၂၉ရက်ကလည်း တပ်မဟာ(၄)န ယ်မြေ သရက်ချောင်းမြို့နယ် သပြူချောင်းကျေးရွာ စာသင်ကျောင်းကို လေကြောင်းဗုံးကြဲခဲ့လို့ စာသင်ကျောင်းပျက်စီးမှုများ ဖြစ်ခဲ့ရပါတယ်။
စစ်ကောင်စီတပ်ဟာ KNU တပ်မဟာ(၄)နယ်မြေ အပါအဝင် KNUခရိုင်တပ်မဟာ အသီးသီးမှာ အရပ်သား ပြည်သူနေထိုင်ရာနေရာတွေကို ပစ်မှတ်ထားတဲ့ လေကြောင်း၊ လက်နက်ကြီး၊ ဒရုန်း တိုက်ခိုက်မှုတွေ မကြာခဏ ပြုလုပ်နေလို့ ပြည်သူသေဆုံးထိခိုက်မှုတွေ ဆက်တိုက်ဖြစ်ပေါ်လျက်ရှိပါတယ်။
