ဖေဖော်ဝါရီ – ၁၁ ၊၂၀၂၆ ၊ ဆိုင်းမင်း/People’s Spring
စစ်ကောင်စီလေတပ်ရဲ့လေကြောင်းတိုက်ခိုက်မှုတွေကြောင့်ဖေဖော်ဝါ ရီ လ ၁၀ ရက်တစ်ရက်တည်းမှာတင်မကွေးတိုင်းနဲ့ ချင်းပြည်နယ်တို့မှာ အရပ်သား တစ်ဒါဇင်ခန့် သေဆုံးခဲ့ရပါတယ်။
ပေါက်မြို့နယ်နဲ့ ထန်တလန်မြို့နယ်အတွင်းလေကြောင်းတိုက်ခိုက်မှုပြီးနောက်တွေ့ရပုံ
လေကြောင်းတိုက်ခိုက်ခံရတဲ့နေရာတွေကတော့ မကွေးတိုင်း ၊ပေါက်မြို့နယ်တောင်ပိုင်းရှိချက်ကန်ရွာနဲ့ ချင်းပြည်နယ်၊ထန်တလန်မြို့နယ်ထဲက တလန်ခွါရွာတို့ဖြစ်ပါတယ်။
ပေါက်မြို့နယ်၊ချက်ကန်ရွာကိုမနက် ၁၁ နာရီဝန်းကျင်မှာ ဂျက်တိုက်လေ ယာဉ်နဲ့ဗုံးကြဲတာပါ။
Public Service Announcement
တိုက်ခိုက်ခံရတဲ့ရွာမှာ ဘုရားပွဲကျင်းပနေတာဖြစ်ပြီး ဂျက်တိုက်လေယာဉ်သုံးစီးနဲ့တိုက်ခိုက်တာလို့ အညာမြေ အရပ်ဖက်လူမှုအဖွဲ့အစည်း – မြိုင်က ထုတ်ပြန်ပါတယ်။
လေကြောင်းတိုက်ခိုက်မှုကြောင့် အရပ်သား ငါးဦးသေဆုံးခဲ့ရတယ်လို့ အဲဒီအဖွဲ့ကအသိပေးထားပါတယ်။ သေဆုံးသူငါးဦးမှာ အမျိုးသားတစ်ဦး နဲ့အမျိုးသမီးလေးဦးဖြစ်ပါတယ်။
လေကြောင်းတိုက်ခိုက်ခံရတဲ့ရွာဟာ စစ်ကောင်စီတပ်ရဲ့အမှတ်(၂၂ ) ကာကွယ်ရေးပစ္စည်းစက်ရုံနဲ့ ၁၅ မိုင်သာဝေးတာပါ။
ပေါက်မြို့နယ်ထဲ လေကြောင်းတိုက်ခိုက်ပြီးနောက် အဲဒီနေ့ နေ့လယ် ၁၂ နာရီခန့်မှာ ချင်းပြည်နယ် ၊ထန်တလန်မြို့နယ် ၊တလန်ခွါရွာကို A -5 ဂျက်တိုက်လေယာဉ်နဲ့ ဗုံးကြဲရာမှာ အရပ်သား ခြောက်ဦးသေဆုံးခဲ့ရတယ်လို့ ချင်းလူ့အခွင့်အရေးအဖွဲ့ (CHRO) က ထုတ်ပြန်ပါတယ်။
သေဆုံးသူခြောက်ဦးကအမျိုးသားတွေဖြစ်ပြီး ကျောင်းသားလေးဦးအပါအဝင် ခုနှစ်ဦး ထိခိုက်ဒဏ်ရာရတယ်လို့ CHRO ကအသိပေးထားပါတယ်။
ဒါကြောင့် ဖေဖော်ဝါရီလ ၁၀ ရက်တစ်ရက်တည်းမှာတင် စစ်ကောင်စီလေတပ်ရဲ့တိုက်ခိုက်မှုကြောင့်မကွေးတိုင်းနဲ့ချင်းပြည်နယ်မှာအရပ်သား၁၁ ဦးသေဆုံးခဲ့ရပါတယ်။
