ဖေဖော်ဝါရီ-၁၁၊ ၂၀၂၆။ ထားမြတ်/People’s Spring
တနင်္သာရီတိုင်း၊ သရက်ချောင်းမြို့နယ် ဝင်း၀ စစ်ကောင်စီတပ်စခန်းကို အင်အားဖြည့်ဖို့ ကြိုးပမ်းလာတဲ့ စစ်တပ်ကို တိုက်ခိုက်ခဲ့ရာသေဆုံးမှု ရှိခဲ့ပြီး လက်နက်တွေရခဲ့တယ်လို့ ကရင်အမျိုးသားအစည်းအရုံး(KNU) မြိတ် ထားဝယ်ခရိုင်က သတင်းထုတ်ပြန်ပါတယ်။
ဖေဖော်ဝါရီ ၁၀ရက်မှာ သရက်ချောင်းမြို့က တဆင့်စစ်ကြောင်းထိုးလာတဲ့ စစ်ကောင်စီရဲ့ တပ်ရင်း(၄၀၃)၊ (၄၀၄)၊ (၄၀၅) ပူးပေါင်းစစ်ကြောင်းကို ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ (၄) တပ်ရင်း(၁၂)၊တပ်မဟာ(၆) တပ်ရင်း(၂၇) တော်လှန်ရေးပူးပေါင်းစစ်ကြောင်းက တိုက်ခိုက်ခဲ့တာလို့ ဆိုပါတယ်။
အဲဒီ တိုက်ပွဲမှာ စစ်ကောင်စီတပ် ၉ဦးသေဆုံးပြီး MA1(၂)လက်၊ MA3(၅)လက်နဲ့ လက်နက်ခဲယမ်းအချို့ သိမ်းရကြောင်း ထုတ်ပြန်ပါတယ်။
Public Service Announcement
” စစ်ကြောင်းက သရက်ချောင်းကနေ သူတို့ ဝင်း၀ တပ်စခန်းကို အင်အားပြန်ဖြည့်ဖို့ စစ်ကြောင်းထိုးတာ။ ဒီဘက်က ကြားဖြတ်တိုက်ခိုက်တာ။ ဟိုဘက်က အထိနာတာတော့ များတာပေါ့။ လောလောဆယ် အလောင်းတော့ ၉လောင်းရထားတယ်။ လက်နက်တချို့လည်း ရရှိတယ်ပေါ့။ ဒါကတော့ ကျနော်တို့ ထုတ်ပြန်ချက်မှာလည်း ပါပြီးသားဖြစ်တယ်” လို့ KNLA တပ်မဟာ(၄) သတင်းရင်းမြစ်က ပြောပါတယ်။
ဝင်း၀တပ်စခန်းဟာ စစ်ကောင်စီရဲ့ ရှေ့တန်းစခန်းဖြစ်ပြီး အင်အား ၁၀၀ ခန့်ရှိတဲ့ အခြေအနေမှာ စစ်ကောင်စီက အင်အားထပ်ဖြည့်ဖို့ လုပ်ဆောင်ခဲ့တာလို့ ပြောပါတယ်။
လက်ရှိမှာ အင်အားဖြည့်ဖို့ ကြိုးပမ်းလာတဲ့ စစ်ကောင်စီ စစ်ကြောင်းဟာ ဆက်တိုးလို့မရလို့ နောက်ပြန်ဆုတ်သွားတယ်လို့လည်း KNLA သတင်းရင်းမြစ်က ပြောပါတယ်။
