ဝပ်ရှော့နေအိမ်ထိမှန်ပြီး ကား ၁၅စီးနဲ့ ဆိုင်ကယ် ၁၅စီး မီးလောင်
ဖေဖော်ဝါရီ ၄၊ ၂၀၂၆။ ဆန်အောင်၊ကဖေး/People’s Spring
ကချင်ပြည်နယ်၊ ဝိုင်းမော်မြို့နယ် ရွှေညောင်ပင်ကျေးရွာကို အာဏာသိမ်းစစ်တပ်က လေကြောင်းဗုံးကြဲတိုက်ခိုက်ခဲ့လို့ အရပ်သား သေဆုံးထိခိုက်မှု ရှိခဲ့တယ်လို့ ကချင်သတင်းရင်းမြစ်က ပြောပါတယ်။
ဖေဖော်ဝါရီ ၂ရက် ညနေပိုင်းမှာ ကချင်လွတ်လပ်ရေးတပ်မတော်(KIA) သိမ်းပိုက်ထားတဲ့ ခလရ(၃၂၁)တပ်ရင်းအနီးကို စစ်ကောင်စီက လေကြောင်းကနေ ဗုံးကြဲခဲ့တာဖြစ်ပါတယ်။
Public Service Announcement
လေကြောင်းတိုက်ခိုက်မှုကြောင့် ရွှေညောင်ပင်ကျေးရွာက ရွှေညီကို ကားဝပ်ရှော့ထိမှန်ကာ ပြည်သူ တစ်ဦးသေ၊ ၂ဦး ဒဏ်ရာပြင်းထန်ခဲ့ကြောင်း ကချင်သတင်းရင်းမြစ်က ပြောပါတယ်။
“လိုင်ဇာကို ဆေးသွားကုတယ်”လို့ သတင်းရင်းမြစ်က ပြောပါတယ်။ လေကြောင်း တိုက်ခိုက်မှုကြောင့် ကားဝပ်ရှော့နေအိမ်က ကားကြီး ၁စီး၊ ကားသေး၊ ၁၄စီး၊ ဆိုင်ကယ် ၁၅စီး မီးလောင်ပျက်စီးခဲ့ကြောင်းလည်း သတင်းရင်းမြစ်က ပြောပါတယ်။
စစ်ကောင်စီတပ်နဲ့ KIA တို့ဟာ ဝိုင်းမော်မြို့နယ်က လမြန်ဒေသ၊ မိုင်းနားဒေသတွေမှာ တိုက်ပွဲဖြစ်ပွားခဲ့ရာ စစ်ကောင်စီတပ် အထိနာခဲ့ပါတယ်။
” ရွှေညောင်ပင်ရွာဆိုတာက လိုင်ဇာကို သွားတဲ့လမ်းမှာရှိတာ။ စားသောက်ဆိုင်တွေနဲ့လူအရမ်းစည်ကားတယ်။ အဲဒီနေရာကို ကြဲတာ။ကားဝပ်ရှော့ မီးလောင်သွားပါတယ်” လို့ ဝိုင်းမော်မြို့ခံသတင်းရင်းမြစ်က ပြောပါတယ်။
ဖေဖော်ဝါရီ ၂ရက်နဲ့ ၃ရက်တိုက်ပွဲတွေမှာ စစ်ကောင်စီတပ်စခန်းနေရာအချို့ကို KIAက တိုက်ခိုက်သိမ်းပိုက်ခဲ့ပြီး စစ်အင်အားဖြည့်လာတဲ့ စစ်ကြောင်းလည်း KIA ရဲ့ တိုက်ခိုက်မှုကြောင့် အထိနာခဲ့ပါတယ်။
တိုက်ပွဲမှာ အထိနာတဲ့ စစ်ကောင်စီတပ်ဟာ ဒီကနေ့မှာတော့ စစ်ရေးနဲ့ မသက်ဆိုင်တဲ့ အရပ်သား ပြည်သူ နေထိုင်ရာ နေရာကို လေကြောင်းဗုံးကြဲခဲ့လို့ ပြည်သူထိခိုက်သေဆုံးမှုတွေ ဖြစ်ပေါ်ခဲ့တာပါ။
ကချင်ပြည်နယ်မှာ ၂၀၂၆ အတွင်း အဆိုးရွားဆုံး လေကြောင်းတိုက်ခိုက်မှုအဖြစ် ဇန်နဝါရီ၂၂ရက်က ဗန်းမော်မြို့ ဧရာဝတီမြစ်အနောက်ဘက်ကမ်း၊ ကောင်ဂျာကျေးရွာအုပ်စု၊ ထီးလင်းကျောင်းရှေ့မှာပြုလုပ်နေတဲ့ဆုတောင်းပွဲကို ဂျက်ဖိုက်တာနဲ့ ဗုံးကြဲခဲ့တာပါ။ ကလေးငယ်အချို့အပါအဝင် သေဆုံးသူ ၂၃ဦး သေဆုံးပြီး ၄၀ခန့်ဒဏ်ရာရခဲ့ပါတယ်။
စစ်ကောင်စီတပ်ဟာ ဖားကန့်တိုက်ပွဲမှာလည်း အရာရှိတွေအပါအဝင် ထိခိုက်သေဆုံးမှုတွေရှိနေတဲ့ အခြေအနေမှာ လက်နက်ကြီးနဲ့ ရမ်းပစ်တာ၊ လေကြောင်း ဗုံးကြဲတာတွေ ပြုလုပ်နေပါတယ်။
