ဗန်းမောက်ကို ငါးလခန့်ကြာထိန်းချုပ်ပြီးနောက် တော်လှန်ရေးတပ်တွေ ဆုတ်ခွာထားရ

ဖေဖော်ဝါရီ-၉၊၂၀၂၆။မိုမို/People’s Spring

စစ်ကိုင်းတိုင်း၊ဗန်းမောက်မြို့ကနေ တော်လှန်ရေးတပ်တွေ ပြန်ဆုတ်ခွာထားရတယ်လို့ မြေပြင်မှာရှိ​နေတဲ့ ရဲဘော်အချို့က ပြောပါတယ်။

PDF ​တွေကငါးလခန်းအကြာ (၁၄၂ရက်)သိမ်းပိုက်ထိန်းချုပ်နိုင်ခဲ့တဲ့ဗန်းမောက်မြို့ကို စစ်တပ်နဲ့ ပြည်သူ့စစ်အဖွဲ့ဖြစ်တဲ့ ရှမ်းနီတပ်-SNAတို့က ​လေ​ကြောင်း၊ကုန်း​ကြောင်း က​နေအင်အားအများအပြားနဲ့ထိုးစစ်ကြောင့် ဖေဖော်ဝါရီ ၈ ရက်​နေ့မှာ မြို့ပေါ်ကနေ PDF ​တွေနောက်ဆုတ်ပေးခဲ့ရတယ်လို့ ရဲ​ဘော်အချို့က​ပြောပါတယ်။

“ အသေခံဒရုန်းတွေနဲ့ လေကြောင်းကနေ နေ့စဥ် တရစပ်နီးပါး ​ဗုံးကြဲတာတွေကြောင့်ပဲ” လို့ ဗန်းမောက်မြို့နယ် တော်လှန်ရေးတပ်ဖွဲ့ဝင်တစ်ဦးက ဆုတ်ခွာရတဲ့ အခြေအနေကို ရှင်းပြပါတယ်။

Public Service Announcement

စစ်အုပ်စုက ဗန်းမောက်မြို့ပြန်ရဖို့အတွက် မြို့အနောက်ခြမ်းက SNAရဲ့ နယ်မြေကနေ အင်အားစုဆောင်းပြီး ပြီးခဲ့နှစ် အောက်တိုဘာကတည်းကထိုးစစ်ဆင်ခဲ့တာပါ။

“ စစ်ကြောင်းတစ်ခုအစားထိုးရတဲ့အထိသူတို့(စစ်အုပ်စု)ဘက်က ဖြစ်ခဲ့တယ်။ပြည်သူ့စစ်နဲ့ စစ်မှုထမ်းအင်းအားတွေကြောင့်သာ မသိသာတာ” လို့ မြေပြင်ရဲ​ဘော်တစ်ဦးက ဗန်းမောက်မြို့တိုက်ပွဲမှာကြုံတွေ့ခဲ့ရတာကို ပြောပါတယ်။

စစ်တပ်ဝါဒဖြန့် တယ်လီဂရမ်ချန်နယ်တွေကလည်း ဗန်းမောက်မြို့ကို စစ်တပ်နဲ့ရှမ်းနီတပ်​ကထိန်းချုပ်နိုင်ပြီး တပ်သားတွေထိခိုက်သေဆုံးမှုအချို့ရှိတယ်လို့ ​ဖေ​ဖော်ဝါရီ ၈ ရက်ညပိုင်းမှာ သတင်းဖြန့်ချီခဲ့ပါတယ်။

“ ကိုယ့်ဘက် အဓိက ပြသနာကတိုက်ပွဲကိုအချိန်ဆွဲတာမကြိုက်ဘူး။ခံစစ်ဆိုတော့ပို ဂရုမစိုက်ဘူးဆိုတဲ့သူများတယ်။အင်းတော်ထိုးစစ် ရှစ်လကြာရင် တောင်ထိုးစစ်အနေအထားအရ အဆင်ပြေခဲ့ကြတယ်။ခံစစ်ကို အားမသာသေးတဲ့ လိုအပ်ချက်” လို့ ဗန်းမောက်မြို့သိမ်းတိုက်ပွဲမှာ ပါဝင်တဲ့ ရဲဘော်တစ်ဦးက ပြောပါတယ်။

စစ်အုပ်စုရဲ့ ဗန်းမောက်မြို့ထိုးစစ်မှာ ရှမ်းနီပြည် သူ့စစ် SNAနဲ့ စစ်တပ်ရဲ့တပ်မ(၃၃)၊ တပ်မ(၇၇) တပ်ရင်းတွေပါတယ်လို့ မြေပြင်စစ်ရေးသတင်းရင်းမြစ်တွေက ပြောထားပါတယ်။

စစ်ကိုင်းတိုင်းနဲ့ကချင်ပြည်နယ်အစပ်ကဗန်းမောက်မြို့ကို NUG ၊ကာကွယ်​ရေးဝန်ကြီးဌာန၊အမှတ်(၁)စစ်ဒေသကွပ်ကဲမှုနဲ့ PDF ​တွေ၊ပကဖ​တွေ ၊​တော်လှန်​ရေးအင်အားစု​တွေက ၂၀၂၅ခုနှစ် စက်တင်ဘာ၂၀ရက်က သိမ်းပိုက်ခဲ့တာဖြစ်ပါတယ်။

လတ်တ​လောမှာ စစ်ကိုင်းတိုင်းအထက်ပိုင်းက ထီးချိုင့်၊ ကသာနဲ့ ကောလင်းစတဲ့ မြို့နယ်​တွေမှာလည်း တော်လှန်ရေးတပ်တွေနဲ့ စစ်အုပ်စုကြား တိုက်ပွဲတွေဖြစ်နေပါတယ်။