ဒါရိုက်တာကိုပေါက်ပို့စ်ကို အသဲပေးလို့ဆိုကာ စစ်တပ်ကဒါရိုက်တာတစ်ဦးအားထပ်မံဖမ်းဆီး

အောက်တိုဘာ-၃၁၊၂၀၂၅။တေဇ/People’s Spring

စစ်ကောင်စီရဲ့ ရွေးကောက်ပွဲ ဝါဒဖြန့်တဲ့ ခေတ်သမိုင်းကို ဒုန်းစိုင်းမည့်သူများ ဇာတ်ကားနဲ့ ပတ်သက်ပြီး ရေးသားထားတဲ့ ဒါရိုက်တာကိုပေါက်ရဲ့ ပို့စ်ကို အသဲ ပေးတာကြောင့် ဆိုပြီး ဒါရိုက်တာဇဗ္ဗူထွန်းသက်လွင်ကို စစ်ကောင်စီက မတရားဖမ်းဆီးလိုက်ပါတယ်။

ဒါရိုက်တာဇဗ္ဗူထွန်းသက်လွင်ကို ဖမ်းဆီးဖို့ ပြီးခဲ့တဲ့ ရက်ကတည်းက စစ်ကောင်‌စီထောက်ခံတဲ့ တယ်လီဂရန်ချန်နယ်တွေမှာ တိုက်တွန်းထားကြတာပါ။

ဝါဒဖြန့်ဇာတ်ကားပြသပြီး နောက်ရက်မှာ ဒါရိုက်တာကိုပေါက်က “ ပြည်တွင်းကအနုပညာသမားများသို့ ပေးစာ” ဆိုတဲ့ ခေါင်းစဉ်နဲ့ စစ်တပ်ရဲ့ အကြမ်းဖက်မှုတွေကို ကိုယ်တိုင်လိုက်ပြပေးနိုင်ကြောင်းအစချီပြီး စစ်ကောင်စီအတွက် ဇာတ်ကားရိုက်ကူးသူတွေကို ဝေဖန်ထားတာပါ။

Public Service Announcement

အဲဒီ့ပို့စ်ကို ဒါရိုက်တာဇဗ္ဗူထွန်းသက်လွင်ရဲ့ Thet Lwin အကောင့်က အသဲ React ပေးတယ်ဆိုပြီး ဖမ်းဆီးဖို့ တိုက်တွန်းထားကြတာပါ။

စစ်ကောင်စီရဲ့ ဝါဒဖြန့်ဇာတ်ကားကို ဝေဖန်လို့ ဆိုပြီး ဒါရိုက်တာ မိုက်တီး ၊ သရုပ်ဆောင် ကျော်ဝင်းထွဋ် ၊ ဟာသသရုပ်ဆောင် အုန်းဒိုင်း နဲ့ ဒါရိုက်တာ အောင်ချမ်းလူတို့ကို စစ်တပ်က မတရားဖမ်းဆီးထားတာကြောင့် ဒီဇာတ်ကားနဲ့ ပတ်သက်ပြီး အနုပညာလောကကနေ ငါးယောက်မြောက်ဖမ်းဆီးခံရတာဖြစ်ပါတယ်။၎င်းတို့အားလုံးကို စစ်အုပ်စုကပြဌာန်းထားတဲ့ ​ရွေး​ကောက်ပွဲကာကွယ်​ပေး​ရေးဥပ​ဒေနဲ့ အမှုဖွင့်ထားတာလို့သိရပါတယ် ။

သူတင်တဲ့​ဖေစ်ဘွခ်ပိုစ်မှာ အသဲ​ပေး( love react ​)သူကို စစ်တပ်က ဖမ်းတဲ့အ​ပေါ် ဒါရိုက်ကို​ပေါက်က “ ” ပြောတော့ ရွေးကောက်ပွဲကနေမှ မင်းတို့လိုချင်တဲ့ဒီမိုကရေစီလမ်းကြောင်းကိုသွားလို့ရမှာလေတဲ့၊အခုတော့ အသည်းလေးပေးမိတာတောင်ကြောက်ပြီး ဖမ်းသတဲ့လား။မင်းတို့က နိုင်ငံတော်ပိုင် စစ်တပ်ကြီးရှိပြီးသေလောက်အောင်ကြောက်နေတာက ရုပ်ပေါက်လွန်းနေတယ်။ပန်းပန်လည်းကြောက် လက်သုံးချောင်းထောင်လည်းကြောက် ငြိမ်သက်နေရင်လည်းကြောက်အခုအသည်းပေးလည်းကြောက်နေပါရောလား။” လို့ရေးသားထားပါတယ်

စစ်ကောင်စီရဲ့ ရွေးကောက်ပွဲ ဝါဒဖြန့်ဇာတ်ကားမှာပါဝင်တဲ့ နေတိုး၊ မြင့်မြတ် ၊ နေဝင်း ၊ အေးချမ်းမောင် ၊ ခြူးလေး ၊ မေမြင့်မိုရ် ၊ အောင်ခိုင် ၊ ငှက်ပျောကြော် စတဲ့ အနုပညာရှင်တွေကို ပြည်သူတွေရဲ့ သပိတ်​မှောက်(Boycott )တာခံနေရတာပါ။

အဲဒီလိုလူထုက Social Punishment တွေ Boycott တွေ ပြုလုပ်တာကြောင့် စစ်ကောင်စီ လက်အောက်ခံ ပြန်ကြားရေးဝန်ကြီးဌာနက အနုပညာရှင်အားလုံးကို အစည်းအဝေးခေါ်ပြီး ရွေးကောက်ပွဲအတွက် မဖြစ်မနေလုပ်ဆောင်ပေးရမယ့် အရာနဲ့ မလုပ်ဆောင်ရင် အရေးယူမယ်ဆိုပြီး ခြိမ်းခြောက်ထားတာပါ။

ဒါ့အပြင် စစ်ကောင်စီရဲ့ ရွေးကောက်ပွဲဝါဒဖြန့်ဇာတ်ကားကို ဝေဖန်သူတိုင်းကိုလည်း အရေးယူ‌သွားမယ်လို့ စစ်ကောင်စီရဲ့ ပြောရေးဆိုခွင့်ရှိသူ ဇော်မင်းထွန်းက ခြိမ်းခြောက်ထားပါသေးတယ်။

စစ်တပ်​ထောက်ခံတဲ့ တယ်လီဂရန် ချန်နယ်တွေမှာတော့ ဝေဖန်တဲ့ပို့စ်တင်သူတွေကို ဖမ်းဆီးဖို့ တိုက်တွန်းတာ​တွေ ဆက်တိုက်တင်ပြီး ပြည်သူ​တွေကို ခြိမ်း​ခြောက်ထားပါတယ်။အခုလို စစ်တပ်က ဖမ်းဆီး​နေတာဟာ ပြည်သူ​တွေကို အ​ကြောက်တရားရိုက်သွင်းဖို့ကြိုးစား​နေတာလို့ ပြည်သူ​တွေက​ပြောပါတယ် ။ စစ်တပ်ရဲ့ အခုလုပ်ရပ်​တွေအတွက်ပြည်သူ​တွေက အပြင်းအထန်​ဝေဖန်​နေကြပါတယ် ။