ဟန်နွေ၊ နိုင်ပကောင်း / People’s Spring
ကရင်အမျိုးသားအစည်းအရုံး(KNU) တပ်မဟာ (၇)နယ်မြေ လှိုင်းဘွဲ့မြို့နယ်ရှိစစ်ကောင်စီတပ် စခန်းတစ်ခုကို ယနေ့ (မတ်လ ၂ရက်) ညပိုင်း၌ အပြီး သတ်သိမ်းပိုက်နိုင်ပြီး နယ်မြေရှင်းလင်းရေးလုပ်ဆောင်နေကြောင်း KNU သတင်းရင်းမြစ်က ပြောသည်။
ထိုင်း – မြန်မာနယ်စပ်အနီး လှိုင်းဘွဲ့မြို့နယ်အတွင်းရှိ စစ်ကောင်စီ၏ ပူလူတူစခန်းကို KNU ပူးပေါင်းတပ်က ဖေဖော်ဝါရီ ၂၇ရက်က စတင်တိုက်ခိုက်ခဲ့ရာ တိုက်ပွဲ ၄ရက်မြောက်တွင် သိမ်းပိုက်နိုင်ခဲ့ခြင်းဖြစ်သည်ဟု ဆိုသည်။
စခန်းကိုသိမ်းလိုက်ပြီးနောက် ယနေ့ ည ၇ နာရီခန့်တွင် မီးရှို့ဖျက်ဆီးလိုက်နိုင် သည်ဟု ကရင်သတင်းရင်းမြစ်တစ်ဦးက ပြောသည်။
Public Service Announcement
” အခြေအနေက ထောက်ကြည့်တော့ သေချာတော့ သေချာပြီတဲ့။ အခုတော့ ရှင်းနေတုန်း။ ရန်သူ တချို့တော့ သေတယ်။တ ချို့တော့ ထွက်ပြေးတယ်။ ထွက်ပြေးတဲ့သူကျတော့ လိုက်လံပြီး ရှင်းလင်းတာပေါ့”ဟု KNU သတင်းရင်းမြစ်ကလည်း ယနေ့ မတ်လ ၂ရက်ညပိုင်း၌ ပြောသည်။
လက်နက်ရရှိမှု၊ စစ်ကောင်စီတပ်သေဆုံးထိခိုက်မှု အခြေအနေ အသေးစိတ်ကို မသိရသေးဘဲ ရှင်းလင်းရေး ဆောင်ရွက်နေဆဲဖြစ်သည်ဟု ပြောပြသည်။
တိုက်ပွဲစတင်ချိန်ကတည်းက စစ်ကောင်စီက လေကြောင်းပစ်ကူပေး တိုက်ခိုက်ခဲ့၍ ဒေသခံများလည်း ထိုင်းနိုင်ငံဘက်သို့ ထွက်ပြေးတိမ်းရှောင်ရမှုများ ရှိခဲ့သည်။
ထိုင်းစစ်တပ်က မြန်မာနယ်စပ်တွင်တိုက်ပွဲ ဖြစ်နေသည့်ကို စောင့်ကြည့်နေမှု။ ဓာတ်ပုံ – วันนี้ที่แม่สอด อ.แม่สอด/FB 
ထိုင်းစစ်တပ်က မြန်မာနယ်စပ်တွင်တိုက်ပွဲ ဖြစ်နေသည့်ကို စောင့်ကြည့်နေမှု။ ဓာတ်ပုံ – วันนี้ที่แม่สอด อ.แม่สอด/FB 
ထိုင်းစစ်တပ်က မြန်မာနယ်စပ်တွင်တိုက်ပွဲ ဖြစ်နေသည့်ကို စောင့်ကြည့်နေမှု။ ဓာတ်ပုံ – วันนี้ที่แม่สอด อ.แม่สอด/FB 
ထိုင်းစစ်တပ်က မြန်မာနယ်စပ်တွင်တိုက်ပွဲ ဖြစ်နေသည့်ကို စောင့်ကြည့်နေမှု။ ဓာတ်ပုံ – วันนี้ที่แม่สอด อ.แม่สอด/FB 
ထိုင်းစစ်တပ်က မြန်မာနယ်စပ်တွင်တိုက်ပွဲ ဖြစ်နေသည့်ကို စောင့်ကြည့်နေမှု။ ဓာတ်ပုံ – วันนี้ที่แม่สอด อ.แม่สอด/FB
ယခု KNU ပူးပေါင်းတပ်က တိုက်ခိုက် သိမ်းပိုက် လိုက်သည့် စစ်ကောင်စီတပ်စခန်းနေရာ မီးလောင်နေသည့် ဓာတ်ပုံမှတ်တမ်းကိုလည်း လူမှုကွန်ရက်၌ ယနေ့ ညပိုင်း၌ ဖော်ပြမှု အချို့တွေ့ရသည်။
စစ်တပ်အာဏာသိမ်းပြီးနောက်ပိုင်း KNU တပ်မဟာ(၇)နယ်မြေတွင် တိုက်ပွဲဖြစ်ပွားမှု နည်းခဲ့ပြီး ၂၀၂၄ နှစ်ကုန်ပိုင်းတွင် တိုက်ပွဲများ ဖြစ်ကာ KNU ဗဟို ဌာနချုပ်ဟောင်း မာနယ်ပလော ဌာနချုပ်နယ်မြေ အပါအဝင်စစ်ကောင်စီတပ်စခန်းများကို တော်လှန်ရေး ပူးပေါင်းတပ်က တိုက်ခိုက်သိမ်းပိုက်ရရှိထားသည်။
နယ်စပ်အနီး မြန်မာဘက်ခြမ်းတွင် တိုက်ပွဲဖြစ်ပွားပြီး လေကြောင်း ဗုံးကြဲ တိုက်ခိုက်မှုများ ကြောင့် ထိုင်းစစ်တပ်သည် နယ်စပ်တလျောက်၌ လုံခြုံရေး တိုးမြှင့်ချထားပြီး အသင့်အနေအထားဖြင့် အခြေအနေ အနီးကပ် စောင့်ကြည့်နေသည်ကို ထိုင်းစစ်ဘက် လူမှုကွန်ရက်များတွင် ဖော်ပြထားကြသည်။
