ဆိုင်းမင်း၊ရှိန်း /People’s Spring
မန္တလေးမြို့၊ မဟာအောင်မြေမြို့နယ်၊ မန္တလေးတက္ကသိုလ်ဘေးရှိ ကမ္ဘောဇဘဏ်ခွဲ ကို ဓားမြတိုက်သွားသူကို ဒီနေ့မှာ ဖမ်းမိခဲ့တယ်လို့ စစ်တပ်ဝါဒဖြန့် တယ်လီဂရမ် ချန်နယ်တွေက ဖော်ပြလာပါတယ်။
KBZ ဘဏ်ခွဲအမှတ် ( ၃၇) ဗောဓိကုန်းဘဏ်ခွဲကို မနေ့ ဖေဖော်ဝါရီလ ၂၁ ရက် နေ့ခင်း ၁နာရီ ၅၀မိနစ်မှာ အမျိုးသားတစ်ဦးက သေနတ်ပြခြိမ်းခြောက်ပြီး ငွေကျပ်သိန်း ၁,၅၀၀ကို ယူ ဆောင်သွားတာလို့ ဆိုပါတယ်။
ဒီနေ့ နံနက် ၉နာရီမှာ ကျူးလွန်တယ်လို့စွပ်စွဲခံရတဲ့ အသက် ၅၄ နှစ်အရွယ် ဦးသိန်းဇော်ဦးဆိုသူအမျိုးသားကို ပြည်ကြီးတံခွန်မြို့နယ်၊ ၁၂၀လမ်း၊ ၆၈ ဘီလမ်းနဲ့ ၆၈ စီ လမ်းရှိ နေအိမ်မှာ ဖမ်းမိတာလို့ဓာတ်ပုံတွေနဲ့တကွဖော်ပြလာတာပါ။
Public Service Announcement
ဓားမြတိုက်စဥ်အသုံးပြုတဲ့ သေနတ်နဲ့အတူ ငွေကျပ် ၁,၀၉၈သိန်းကိုပါ သိမ်းဆည်းရမိခဲ့တယ်လို့ စစ်တပ် ဝါဒဖြန့်ချန်နယ်တွေကဆိုပါတယ်။
ဒါပေမယ့် စစ်တပ်နဲ့ နီးတဲ့မြို့လယ်နားက ကမ္ဘောဇဘဏ်ကို အေးအေးဆေးဆေးတကိုယ်တော်ဓါးပြတိုက်တယ်ဆိုတာရော ၊တစ်ရက်အကြာမှာဖမ်းမိတယ်ဆိုတာရော ဖြစ်စဥ် တစ်ခုလုံးကို ပြည်သူအချို့ ကမယုံကြပဲ သံသယရှိနေကြပါတယ်။
“ဘဏ် ဓားပြတိုက်ခံရပြီဆို KBZ Bankကြည့်ပဲ ထူးတော့ထူးတယ်။”လို့မန္တလေးမြို့ခံတဦးက မှတ်ချက်ပေးပါတယ် ။
အခြားမန္တလေးမြို့ခံ တဦးကလည်း “ငပျူထောက်ပံ့တာ ပေါ်တင်ထောက်ပံ့ရင်မကောင်းလို့ ဇာတ်လမ်းထွင်ပြီးထောက်ပံ့တာဖြစ်မယ်။”လို့ပြောပါတယ်။
ဓားပြတိုက်ခံရတဲ့ဒီဘဏ်ဟာ တက္ကသိုလ်အရံလေ့ကျင့်ရေးတပ်၊စစ်တပ်ဘန်ကာတွေနဲ့မျက်နှာချင်းဆိုင်မှာရှိတာလို့သိရပါတယ်။တက္ကသိုလ်အရံလေ့ကျင့်ရေးတပ်ရဲ့ ဝင်ပေါက်ကလည်း ၇၃လမ်း၊၄၀နဲ့၄၁လမ်းကြားမှာရှိပြီး လုံခြုံရေးဘန်ကာတွေလည်းချထားပါတယ်။
KBZ ဘဏ်ခွဲအမှတ် ( ၃၇) ဗောဓိကုန်းဘဏ်ခွဲ ကို ပြီးခဲ့တဲ့ တစ်လကျော်အကြာ ဇန်နဝါရီ လ၁၁ရက်က တစ်ကြိမ် ၊ ဖေဖော်ဝါရီ ၂၁ရက်က တစ်ကြိမ် စုစုပေါင်းနှစ်ကြိမ်လုံး တစ်ကိုယ် တော် ဓားမြတိုက်ခံခဲ့ရပြီး ကျူလွန်သူတွေကို ဖမ်းမိတယ်လို့ စစ်ကောင်စီက ဆိုပါတယ်။
KBZ ဘဏ်ခွဲ ၃၇ရှိရာနေရာဟာလည်း လူစည်ကားတဲ့ နေရာတစ်ခုဖြစ်သလို အနီးမှာ မန္တလေးတက္ကသိုလ်လုံခြုံဂိတ်ရှိသလို တက္ကသိုလ်ရှိ UTC တက္ကသိုလ်လေ့ကျင့်ရေးတပ်၊ တပ်ရင်းတွေရှိပါတယ်။
စစ်အုပ်စုဟာ ပြည်သူတွေကို အာရုံပြောင်းချင်တဲ့အခါ လူစိတ်ဝင်စားနိုင်မယ့် ဇာတ်လမ်းတွေထွင်လေ့ရှိတာမို့ ဒီရက်ပိုင်း ကချင်ပြည်နယ် ဒုတိယမြို့တော် ဗန်းမော်မြို့သိမ်းတိုက်ပွဲမှာ စစ်တပ် တပ်ရင်းတွေ စခန်းတွေဆက်တိုက်ဆုံးရှုံးနေပြီး ဗန်းမော်မြို့ ကို KIA နဲ့ ပူးပေါင်းတပ်တွေ သိမ်းပိုက်နိုင်ဖို့နီးလာချိန်မှာ အခုဓါးပြမှုပေါ်လာတာဟာ ဗန်းမော်တိုက်ပွဲကိုအာရုံပြောင်းချင်တာကြောင့်ဖြစ်နိုင်တယ်လို့ စစ်ရေး နိုင်ငံရေးလေ့လာသူအချို့ကပြောပါတယ်။
