■တပ်ကူလာသည့်အဖွဲ့ပါ ထပ်မံမိုင်းဆွဲခံရ
ကျော်ဇော/People’s Spring
မန္တလေးတိုင်း၊ မြင်းခြံခရိုင် ငါန်းဇွန်မြို့နယ်ရဲစခန်းမှ စျေးဝယ်ထွက်လာသော စစ်ကောင်စီတပ်သားသုံးဦးကို စျေးအနီးလမ်းပိုင်းတနေရာ၌ မိုင်းဆွဲတိုက်ခိုက်ခဲ့ကြောင်း မြင်းခြံ ပကဖ အဖွဲ့ဝင် နဂါးနီပြောင်ကျားတပ်ဖွဲ့-မြင်းခြံမှ တာဝန်ရှိသူတစ်ဦးက လူထုနွေဦးသို့ ပြောသည်။
ယမန်နေ့(ဖေဖော်ဝါရီ ၉ ရက်)နံနက် ၉ နာရီခန့်က ငါန်းဇွန်ရဲစခန်း၌ တပ်စွဲထားသော စစ်ကောင်စီတပ်မှ တပ်သားနှစ်ဦး စခန်းအပြင်ထွက်လာစဥ် စခန်းနှင့် မီတာ ၂၀၀ခန့်အကွာတွင် ပဒေသာမိုင်းတစ်လုံးဖြင့် ဖောက်ခွဲတိုက်ခိုက်ခဲ့ခြင်းဖြစ်ကြောင်း ၎င်းတာဝန်ရှိသူက ပြောသည်။
Public Service Announcement
“ပထမလာတာ နှစ်ယောက်ဗျ။ (စျေးအနီး)အမြဲ ပတ်လေ့ရှိတယ်။ အဲဒီနှစ်ကောင်ကို အရင်(မိုင်း)ဆွဲတာ။ တစ်ယောက်က နေရာမှာတင် ပွဲချင်းပြီး။ နောက်တစ်ယောက်က ခြေနှစ်ဖက်ဖြတ်ရတယ်လို့ သတင်းရထားတယ်”ဟု နဂါးနီပြောက်ကျားတပ်ဖွဲ့-မြင်းခြံမှ တာဝန်ရှိသူတစ်ဦးက ဆိုသည်။
မိုင်းဆွဲတိုက်ခိုက်ခံရပြီးနောက် ငါန်းဇွန်ရဲစခန်းဘက်မှ စစ်ကားတစ်စီး အင်အား ၈ဦးဖြင့် ထပ်မံရောက်ရှိလာရာ ရုပ်အလောင်းနှင့် ဒဏ်ရာရသူတစ်ဦးအား ကားပေါ်ဆွဲတင်မည်ပြုစဥ် နောက်ထပ်ပဒေသမိုင်းတစ်လုံး ထပ်မံဖောက်ခွဲတိုက်ခိုက်ခဲ့ပြီး နှစ်ဦးထိခိုက်သွားကြောင်း ၎င်းက ဆက်ပြောသည်။
“ကားပေါ်ကဆင်းပြီး အလောင်းကောက်တဲ့နှစ်ကောင်ကတော့ ဘာမှပြန်မလုပ်နိုင်တော့ဘူး။ ကျန်တဲ့ကောင်တွေကတော့ ကားပေါ်ကနေ ပတ်ဝန်းကျင်ကို ရမ်းသမ်းပစ်တာရှိတယ်” ဟု နဂါးနီပြောက်ကျားတပ်ဖွဲ့-မြင်းခြံမှ တာဝန်ရှိသူက ရှင်းပြသည်။
စစ်ကောင်စီဘက်မှ ထိခိုက်ဒဏ်ရာရသူသုံးဦးအနက် တစ်ဦးမှာ မင်းနေကုန်းစခန်းမှ ရဲတပ်သား လင်းအောင်ဆိုသူဖြစ်ပြီး ၎င်းအား မြို့သာဆေးရုံသို့ ပို့ဆောင်၍ ကျန်နှစ်ဦးမှာ ဒဏ်ရာပြင်းထန်သဖြင့် မန္တလေးဆေးရုံသို့ ပို့ဆောင်လိုက်ရကြောင်း နဂါးနီပြောက်ကျားတပ်ဖွဲ့ထံမှ သိရသည်။
ဖေဖော်ဝါရီ ၂ ရက်နေ့ကလည်း အင်အား ၄၀ခန့်ဖြင့် တပ်စွဲထားသော စစ်ကောင်စီတပ်၏ မင်းနေကုန်းရွာ စစ်တပ်စခန်းကို နဂါးနီပြောက်ကျားတပ်ဖွဲ့-မြင်းခြံမှ SHAR HTOO WAW နည်းပညာသုံး Fixed Wings ဒရုန်းနှစ်စင်းဖြင့် ၁,၃၀၀ ဂရမ်ရှိ ဗုံးသီးသုံးလုံး၊ ၆၀၀ ဂရမ်ရှိ ဗုံးသီးသုံးလုံး ပေါင်းဗုံးသီးခြောက်လုံးဖြင့် ကြဲချတိုက်ခိုက်ခဲ့သေးသည်။
လတ်တလောစစ်ရေးအခြေအနေများအရ ငါန်းဇွန်မြို့နယ်အတွင်းရှိ ပြည်သူများအနေဖြင့် စစ်ကောင်စီနှင့် သက်ဆိုင်သောနေရာများကိုရှောင်ရှားသွားလာကြရန် နဂါးနီပြောက်ကျား တပ်ဖွဲ့က အသိပေးကြေညာထားသည်။
(ဖောက်ခွဲတိုက်ခိုက်ရာတွင် အသုံးပြုခဲ့သော ပဒေသမိုင်းနှင့် နဂါးနီပြောက်ကျားတပ်ဖွဲ့မှ ရဲဘော်အချို့ကို တွေ့ရစဥ်။ ဓာတ်ပုံ – နဂါးနီ)
