နေ့သစ်/People’s Spring
ရန်ကုန် – မန္တလေး အမြန်လမ်းမကြီးပေါ်က မိုင်တိုင်(၃၁၈)မှာ ခရီးသွားကားတွေကို နွားထိုးကြီး PDFက လမ်းပိုင်းစစ်ဆေးမှု ပြုလုပ်ခဲ့တယ်လို့ သတင်းရရှိပါတယ်။
ဒီကနေ့ (ဒီဇင်ဘာ ၂၃ ရက်) မနက် ၁၀ နာရီခွဲခန့်က နွားထိုးကြီးမြို့နယ်နဲ့ မိတ္ထီလာမြို့နယ်ကြားက မိုင်တိုင်(၃၁၈)မှာ Natogyi People Defence Forceက နယ်မြေစိုးမိုးရေးလုပ်ဆောင်ခဲ့ပြီး ခရီးသွားယာဉ်တွေကို စစ်ဆေးတာ၊ ခရီးသည်တွေနဲ့ တွေ့ဆုံတာတွေ လိုအပ်တဲ့အသိပညာပေးမှုတွေ ပြုလုပ်ခဲ့တယ်လို့ သိရပါတယ်။
ပြည်သူတွေအနေနဲ့ ရန်ကုန် -မန္တလေး အမြန်လမ်းမကြီးပေါ်ကို မလိုအပ်ဘဲ ခရီးမသွားကြဖို့၊ည အချိန်မတော် မထွက်ကြဖို့နဲ့ တိုက်ပွဲနဲ့တိုးရင် ရှေ့ဆက်မမောင်းဘဲ နီးစပ်ရာ လုံခြုံတဲ့ နေရာတွေမှာ နေထိုင်ကြဖို့ နွားထိုးကြီး PDFက သတိပေးပါတယ်။
Public Service Announcement
စစ်ကောင်စီဘက်က ဒီနေ့မနက်၁၀နာရီခွဲမှာ နွားထိုးကြီး PDFက ရန်ကုန်-မန္တလေးအမြန်လမ်းမိုင်တိုင်၃၁၈/၆၈ဖာလုံမှာ ကားတွေကို စစ်ဆေးပြီး ယာဥ်ငယ်တစီးကို ဇီးတောဆည်ဘောင်ဘက်ကို ခေါ်သွားတယ်လို့ ရေးသားဖော်ပြထားကြပါတယ်။
ဒီကိစ္စနဲ့ပတ်သက်ပြီး နွားထိုးကြီးမြို့နယ်က တာဝန်ရှိသူတွေကိုမေးမြန်းကြည့်ရာမှာ အမြန်လမ်းပေါ်ကို လုံခြုံရေးအရ တော်လှန်ရေးတပ်တွေက စစ်ဆေးခဲ့တာမှန်ကန်ပြီး အိမ်စီးကားတစီးပေါ်မှာ ပြောက်ကျားအင်္ကျီတွေ့တာမို့ ကားပေါ်ပါလာတဲ့သူတွေကို အောက်ခဏဆင်းခိုင်းကာ ယာယီစစ်ဆေးမှုပြုလုပ်ပေးပြီးပြန်လွှတ်ပေးလိုက်တာလို့ ဆိုပါတယ်။
“တပ်ရင်းတစ်ခုက ခဏတင် စစ်လိုက်တာပါ။ဖမ်းတယ်ဆိုတာမဟုတ်ပါဘူး။ပြီးတော့ စစ်တဲ့ကားကပြည်သူတွေကားမို့အေးအေးဆေးဆေးပြန်လွှတ်လိုက်တာပါ”လို့ နွားထိုးကြီးမြို့နယ်၊ပြည်သူ့အုပ်ချုပ်ရေးအဖွဲ့က တာဝန်ရှိသူတစ်ဦးက ပြောပါတယ်။
နွားထိုးကြီးPDFက ယခုလိုစစ်ဆေးမှုတွေပြုလုပ်အပြီးမှာ စစ်ကောင်စီတပ်တချို့နဲ့ပြည်သူ့စစ်တွေအဲဒီနေရာကိုရောက်လာသေးတယ်လို့ ပြည်သူတွေဆီကသိရပါတယ်။
တော်လှန်ရေးကာလ ၄ နှစ်ပြည့်တော့မှာမို့ ပြည်သူတွေအနေနဲ့ စည်းကမ်းလိုက်နာပြီး တော်လှန်ရေးမှာ ပါဝင်ပေးကြဖို့ နွားထိုးကြီး PDFက မေတ္တာရပ်ခံထားပါတယ်။
ပြီးခဲ့တဲ့ ဒီဇင်ဘာ ၁၂ ရက်ကလည်း ရန်ကုန်-မန္တလေး အမြန်လမ်းမကြီးပေါ်၊ မိုင်တိုင်(၃၁၉)က စစ်ဆေးရေးဂိတ်ကို နွားထိုးကြီး PDFက တိုက်ခိုက်ခဲ့ပါသေးတယ်။
