Ermənistan hökuməti respublikada yayımlanan Rusiya telekanalları ilə bağlı bütün mümkün hərəkət variantlarını nəzərdən keçirir.
Gununsesi.info erməni mətbuatına istinadən xəbər verir ki, bu barədə ölkənin yüksək texnologiyalar sənayesi naziri Robert Xaçatryan brifinqdə bildirib.
Bundan əvvəl hakimiyyətdə olan “Mülki Müqavilə” partiyasının deputatı Lusine Badalyan bildirib ki, Ermənistan hakimiyyəti Rusiya telekanallarının bağlanması imkanını müzakirə edir, çünki onların məzmunu antierməni məzmunludur və ölkənin təhlükəsizliyini təhdid edir.
“Nazirlik bütün mümkün ssenariləri müzakirə edir”, – Xaçatryan deyib. O, deyib ki, nazirliyin Rusiya telekanalları ilə imzaladığı müqavilədə pozuntular aşkar edilərsə, “müəyyən addımlar” nəzərdə tutulub. “Biz (müqavilənin) bütün bəndləri ilə tanışıq və müvafiq addımlar atacağıq”, – o əlavə edib, detalları açıqlamayıb.
Eyni zamanda, nazir jurnalistin Rusiya telekanallarının Ermənistanın milli təhlükəsizliyinə təhdid yaratdığı iddialarına münasibət bildirmək sualına cavab verməkdən imtina edib.
Ermənistanda Rusiyanın Birinci Kanalı, “Kultura” və “RTR-Planeta” ictimai multipleks vasitəsilə təkrar yayımlanır. Ermənistanda həmçinin mərkəzi ofisi Moskvada olan dövlətlərarası “Mir” telekanalı da yayımlanır.
