Amerikanın “German Marshall Fund” beyin mərkəzi və Avropa İttifaqı Gürcüstanın qeyri-kommersiya təşkilatlarına maliyyə dəstəyi verməyə hazırlaşır.
Gununsesi.info xarici mediaya istinadən xəbər verir ki, qrant proqramına əsasən, vəsait QHT-lərin rəqəmsal təhlükəsizliyini və onların “çağırışlara tab gətirmək qabiliyyətini” gücləndirmək üçün ayrılacaq.
Qrantlar konsaltinq xidmətlərinin ödənilməsi üçün də istifadə oluna bilər. Maliyyələşdirmənin yuxarı həddi sənədlərdə göstərilməyib.
Bildirilir ki, fondun portalında yerləşdirilən qrant sənədlərinə əsasən, proqrama mərkəzin iki alt strukturu – Transatlantik və Qara Dəniz Regional Əməkdaşlıq Fondu tərəfindən nəzarət ediləcək.
Bu strukturlar Avropa İttifaqının dəstəyi ilə Gürcüstandakı müxtəlif QHT-lərə qrantlar vermək niyyətindədirlər.
Layihənin bəyan edilmiş məqsədi kibertəhlükəsizlik sahəsində cari və gələcək çağırışlara tab gətirmək qabiliyyətini gücləndirməkdir.
Qərb fondları həmçinin “vətəndaş cəmiyyəti təşkilatlarının uzunmüddətli davamlılığı üçün vacib olan sahələrə strateji investisiyaları təşviq etməyi” planlaşdırır.
Gürcüstanın qeyri-kommersiya icmalarının işçilərinin psixi və fiziki sağlamlığının yaxşılaşdırılması layihələri də qrant ala bilər.
Proqramın bir hissəsi olaraq, Gürcüstan QHT-lərinə “potensial hüquqi təhlükələrə” qarşı hüquqi dəstək də daxil olmaqla ekspert və məsləhət resurslarına çıxış təmin ediləcək.
Proqrama ayrılan qrantların maksimum məbləği sənədlərdə göstərilməyib, lakin hər bir layihə bir qrant çərçivəsində 10 min avroya qədər vəsait almağa ümid edə bilər.
Bundan əvvəl RT ABŞ-ın respublikada “Xarici agentlər” haqqında qanunun qəbulu ilə əlaqədar Gürcüstana yardımı dondurduğunu bildirmişdi.
Bu qərarın Amerikanın regiondakı qrant siyasətinə necə təsir edəcəyi rəsmi olaraq açıqlanmayıb.
Eyni zamanda, Rusiya Xarici Kəşfiyyat Xidməti qeyd edib ki, ABŞ prezident Salome Zurabişvilinin köməyi ilə Gürcüstanda “rəngli inqilab” hazırlaya bilər.
Şəbnəm Rəhimova
Gununsesi.info
