စကန်ဒီနေးဗီးယန်း လေကြောင်းလိုင်း (SAS)က စက်တင်ဘာ ၁၉ ရက်နေ့မှာ လေကြောင်းလိုင်းပိုင် ခရီးသည်တင် လေယာဉ်တစ်စီးဟာ နော်ဝေးနိုင်ငံ၊ အော်စလိုမြို့ကနေ စပိန်နိုင်ငံ မာလာဂါမြို့ဆီ ဦးတည် ပျံသန်းနေရာက ကြွက်အရှင်ကို ရှာတွေ့ပြီး လွတ်မြောက်သွားတာကြောင့် ကိုပင်ဟေဂင်မှာ အရေးပေါ် ဆင်းသက်ခဲ့ရကြောင်း အတည်ပြု ထုတ်ပြန်သွားခဲ့ပါတယ်။
လေကြောင်းလိုင်းရဲ့ လုံခြုံရေးဆိုင်ရာ ညွှန်ကြားချက်တွေမှာ လေယာဉ်ပေါ် ကြွက်တွေ့တာနဲ့ အရေးပေါ် ဆင်းသက်ရမယ် ဆိုတာကို တိတိကျကျ သတ်မှတ်ပြီးသားပါ။ အကြောင်းကတော့ ကြွက်တွေက လေယာဉ်ပေါ်က ဝါယာကြိုးတွေကို ကိုက်ဖြတ်လိုက်ရင် ဆိုးရွားတဲ့ နောက်ဆက်တွဲ အခြေအနေတွေဆီ ဦးတည်သွားနိုင်တဲ့အတွက် ဖြစ်ပါတယ်။
အရေးပေါ် ဆင်းသက်ခဲ့ရတဲ့ လေယာဉ်ပေါ်မှာ ခရီးသည် ဘယ်နှဦး လိုက်ပါလာသလဲ ဆိုတာကို လေကြောင်းလိုင်းက မကြေညာပေမယ့် ခရီးသည်တွေကို တခြားလေယာဉ် တစ်စီးပေါ် ရွှေ့ပြောင်းပေးပြီး လိုရာခရီး ပို့ဆောင်ပေးခဲ့ကြောင်း ဖော်ပြထားခဲ့ပါတယ်။
လေကြောင်းလိုင်းရဲ့ ပြောရေးဆိုခွင့်ရ အရာရှိ အွိုင်စတိန်း ရှမစ်ဒ်ကတော့ ဒီကိစ္စမျိုးဟာ အရမ်းရှားပါးလွန်းတဲ့ ဖြစ်စဉ်တစ်ခုလို့ မှတ်ချက် ပေးခဲ့ပါတယ်။ ဒါပေမဲ့လည်း ဒီအခြေအနေမျိုး ကြုံလာတဲ့ အခါကျရင် ဘယ်လိုစီမံ တုံ့ပြန်ရမလဲ ဆိုတာကို တိတိကျကျ လမ်းညွှန်ချက်တွေ ရှိနေပြီး ဖြစ်သလို နောက်ထပ် အလားတူ ထပ်မဖြစ်အောင် အာရုံစိုက် ပြင်ဆင်မှုတွေလည်း လုပ်ဆောင်ဖို့လိုကြောင်း၊ လေကြောင်းလိုင်းအတွက် အစားအသောက် ထောက်ပံ့ပေးတဲ့ မိတ်ဖက် ကုမ္ပဏီနဲ့ ဆွေးနွေးဖို့လည်း လုပ်ဆောင်သွားမှာဖြစ်ကြောင်း သူက ဆိုပါတယ်။
Public Service Announcement
ခရီးသည် တစ်ဦးကတော့ လေယာဉ် အမှုထမ်းတွေဟာ အခြေအနေကို တည်တည်ငြိမ်ငြိမ်နဲ့ ထိန်းသိမ်း ကိုင်တွယ်ခဲ့သလို ခရီးသည်တွေအတွက် စိတ်ဖိစီးစရာ အခြေအနေ မဟုတ်ခဲ့ဘူးလို့ ပြောပါတယ်။ ဒါပေမဲ့ လေယာဉ်ပေါ်မှာ ကြွက်တစ်ကောင် ရှိနေတယ်ဆိုတဲ့ အတွေးကြောင့် သူ့ခြေထောက်ပေါ် တက်လာမလား ဆိုတာကို တွေးပြီး အသည်းယားနေမိတယ်လို့ ခရီးသည်က ပြောပါတယ်။
အခုသီတင်းပတ်ထဲမှာပဲ အင်္ဂလန်တောင်ပိုင်းမှာ ကုန်တင်ရထား တစ်စီးပေါ် ရှဉ့်နှစ်ကောင် တက်လာပြီး တစ်ကောင်က ပြန်မဆင်းဘဲ ရထားတွဲထဲမှာပဲ လှည့်ပတ်ပြေးနေတာကြောင့် အဲဒီရထားရဲ့ ပုံမှန်ပြေးဆွဲမယ့် ခရီးစဉ်ကို ရွှေ့ဆိုင်းခဲ့ရပါတယ်။
ကိုးကား: BBC
