ဒီဇင်ဘာ ၂၀၊ ၂၀၂၅ ဇေအောင်/People’s Spring
စစ်ကိုင်းတိုင်း၊ မုံရွာ-မန္တလေးလမ်းပိုင်းမှာ ကြေးနီတင်ယာဥ်တွေ ဖြတ်သန်းလာပြီး စစ်တပ်က ရမ်းသမ်းပစ်ခတ်လုံခြုံရေးယူနေလို့ ခရီးသွားယာဥ်တွေ ပိတ်မိနေပါတယ်။
ဒီကနေ့ ဒီဇင်ဘာ ၂၀ ရက်မနက်ပိုင်းမှာ မုံရွာမြို့အနောက်မြောက်တိုင်းစစ်ဌာနချုပ်(နမခ)ကနေ ကြေးနီတင်ယာဥ်တန်းတွေဟာ မုံရွာ-မန္တလေးလမ်းအတိုင်း ထွက်ခွာလာပြီး ယာဥ်တန်းလုံခြုံရေးအတွက်ဆိုကာ လမ်းပိုင်းပေါ်က စစ်ကောင်စီဂိတ်တွေက ရမ်းသမ်းပစ်ခတ်နေကြောင်း ဒေသခံတွေက ပြောပါတယ်။
“ ငါးယှန်ဂိတ်ကနေ လက်နက်ကြီးတွေနဲ့ ပစ်နေတယ်” လို့ ဒေသခံတစ်ဦးက ပြောပါတယ်။
Public Service Announcement
ရမ်းသမ်းပစ်ခတ်နေတာကြောင့် မုံရွာ-မန္တလေးလမ်းပေါ်က နတ်ရေကန်ဂိတ်မှာ ကားတွေပိတ်မိနေတယ်လို့ ကားသမားအချို့က ပြောပါတယ်။
ပစ်ခတ်မှုတွေဖြစ်ပွားနိုင်တာကြောင့် ကြေးနီတင်ယာဥ်တန်းတွေနဲ့ ကပ်မလိုက်ကြဖို့နဲ့ အရေးကြီးကိစ္စကလွဲပြီး ခရီးအသွားအလာတွေ သတိပြုသွားလာကြဖို့ တော်လှန်ရေး အင်အားစုတွေက သတိပေးနေပါတယ်။
စစ်ကောင်စီတပ်ဟာ ယခုရက်ပိုင်းအတွင်း စစ်ကိုင်းတိုင်းထဲက ရွှေဘို၊ ခင်ဦး၊ ဝက်လက်နယ်တွေမှာ ခရီးသွားတွေ စစ်ဘေးရှောင်တွေကိုပါ လေကြောင်းတိုက်ခိုက်နေပြီး ပြည်သူဆယ်ချီ သေဆုံးနေပါတယ်။
