ရွှေဘိုနဲ့ ယင်းမာပင်ဒေသမှာ စစ်အာဏာရှင်ဆန့်ကျင်ရေး လှုပ်ရှားမှုတွေ ပြုလုပ်

ဖေဖော်ဝါရီ ၁၆၊၂၀၂၆။သုည/People’s Spring

စစ်ကိုင်းတိုင်း ရွှေဘိုနဲ့ ယင်းမာပင်ဒေသမှာ သပိတ်အဖွဲ့တွေ၊ ဒေသခံပြည်သူတွေဟာ စစ်အာဏာရှင်ဆန့်ကျင်ရေး လှုပ်ရှားမှုတွေ ဒီကနေ့ (ဖေဖော်ဝါရီ ၁၆)မှာ ပြုလုပ်ခဲ့ပါတယ်။

ယင်းမာပင်မြို့နယ်မြောက်ခြမ်းမှာ နောက်ပြန်မလှည့်ကြေးဒီတော်လှန်ရေးသပိတ်စစ်ကြောင်း၊ အောင်လံလွှင့်မည်ရွှေရေကြည်သပိတ်စစ်ကြောင်းတို့ဟာ “ စုစည်းပါဝင် တော်လှန်ရေးအရှိန်တင်” စာသားကို ကိုင်ဆောင်ပြီး စစ်အာဏာရှင်ကို ဆန့်ကျင်ကြောင်း ချီတက်ဆန္ဒပြခဲ့ပါတယ်။

ဒါ့အပြင် ဖမ်းဆီးခံထားရတဲ့ နိုင်ငံ့ခေါင်းဆောင်တွေနဲ့နိုင်ငံရေးအကျဉ်းသားတွေအားလုံး ချက်ချင်းလွှတ်ဖို့လည်း ကြွေးကြော်ဆန္ဒပြခဲ့ကြပါတယ်။

Public Service Announcement

ယင်းမာပင်မြို့နယ် ကျေးရွာတစ်ရွာမှာလည်း ရွှေဥက္ကံ လူထုသပိတ်စစ်ကြောင်းမှ စစ်အာဏာရှင်စနစ်ကို ဆန့်ကျင်ကြောင်းနဲ့ စစ်မှန်တဲဖက်ဒရယ်ဒီမို့ကရေစီသာ အလိုရှိကြောင်း လူထုသပိတ်ဆန္ဒဖော်ထုတ်ခဲ့ပါတယ်။

ရွှေဘိုမြို့နယ်အတွင်းမှာလည်း သပိတ်ဦးဆောင်သူတွေက ဒေသခံပြည်သူတွေကို တော်လှန်ရုပ်ရှင်ပြသရင်း ဗိုလ်ချုပ်မိန့်ခွန်းဖြစ်တဲ့ “ စည်းကမ်းမရှိတဲ့ စစ်တပ် မရှိတာက တိုင်းပြည်အတွက် ပိုကောင်းကြောင်း” ဟောပြောခြင်းနဲ့ ပြည်သူလူထုအား ခွန်အားပေးစကားပြောကြားခြင်းတို့ လုပ်ဆောင်ခဲ့ပါတယ်။

ပြည်သူလူထုနဲ့အတူ တော်လှန်သီချင်းတွေ သီဆိုပြီး စစ်အာဏာရှင်ဆန့်ကျင်ရေး ကြွေးကြော်သံတွေနဲ့လည်း ဆန္ဒထုတ်ဖော်ပြသခဲ့ပါတယ်။